Ekonomika hám qarjı ministrligi tárepinen shólkemlestirilgen ilaj Prezidentimizdiń 2025-jıl 26-dekabrdegi “Mámleketlik satıp alıwlar sistemasında báseki ortalıǵı hám ashıq-aydınlıqtı támiyinlew boyınsha gezektegi ilajlar haqqında”ǵı pármanınıń mazmun-mánisine baǵıshlandı.
Onda ministrliktiń mámleketlik satıp alıwlar siyasatı departamentiniń juwapker xızmetkerleri, elektron sistema operatorları, mámleketlik buyırtpashılar, iri mámleketlik kárxanalar, ǵazna xızmeti komitetiniń aymaqlıq bólimleriniń qánigeleri qatnastı.
Onda shıǵıp sóylegenler bul párman menen mámleketlik satıp alıwlar sistemasın túpkilikli jetilistiriw, ashıq-aydınlıq hám báseki ortalıǵın kúsheytiw, jergilikli islep shıǵarıwshılardı qollap-quwatlaw jáne byudjet qarjılarınan nátiyjeli paydalanıwdı támiyinlewge qaratılǵan tiykarǵı maqsetler belgilep berilgenin atap ótti. Atap aytqanda, basqıshpa-basqısh túrde básekili satıp alıwlardıń úlesin 80 procentke, únemlengen qarjılardıń kólemin 25 trillion sumǵa, satıp alıwlarda jergilikli ónimlerdiń úlesin bolsa keminde 85 procentke jetkeriw rejelestirilgen.
Atap ótilgenindey, bul párman ashıq sóylesiwler procesinde isbilermenler tárepinen bildirilgen usınıs hám baslamalar tolıq esapqa alınǵan halda qabıl etilgen. Oǵan bola, mámleketlik satıp alıwlar ámeliyatına bir qatar áhmiyetli jańalıqlar engiziledi. Sonıń ishinde, satıp alıwlarda jańa básekili usıl – “usınıs soraw” mexanizmi jolǵa qoyılatuǵını, mámleketlik buyırtpashılardıń satıp alıw rejeleri járiyalanǵannan soń, bul maǵlıwmatlar jergilikli islep shıǵarıwshılarǵa elektron xabarnama arqalı avtomat túrde jetkeriletuǵını belgilengen.
Sonıń menen birge, lokalizaciyalaw dárejesi 30 procentten artıq bolǵan jergilikli kárxanalarǵa avans tólemlerin olardıń lokalizaciyalaw dárejesinen kelip shıǵıp tólewge ruqsat beriletuǵını, byudjet buyırtpashıları hám jergilikli islep shıǵarıwshılar arasında jergilikli aukcion sawdaların shólkemlestiriw tártibi engiziletuǵını málim etildi.
Pármanǵa muwapıq, mámleketlik buyırtpashılardıń tovarlar, jumıslar hám xızmetlerdi qabıl etiwshi shaxslarǵa beriletuǵın isenim xatların mámleketlik satıp alıwlardıń elektron sisteması arqalı elektron túrde rásmiylestiriw ámeliyatı engizilmekte. Sonday-aq, satıp alıw hújjetlerin ekspertizadan ótkeriw múddetleri olardıń bahası hám quramalılıǵına qarap qısqartılıwı, barlıq satıp alıw hújjetleri joybarlarınıń jámiyetlik dodalawdan ótkeriliwi názerde tutılǵan.
Satıp alıwlarda ortasha bazar bahaların avtomat esaplaytuǵın elektron moduldi iske qosıw arqalı bahalardıń tiykarsız asırılıwınıń aldın alıw hám finanslıq tártipti kúsheytiw ilajların ámelge asırıw da mine usı hújjette kórsetip ótilgen.
Ilaj juwmaǵında qatnasıwshılar pármannıń ámeliy orınlanıwı, jańa mexanizmlerdi engiziw processleri hám mámleketlik satıp alıwlar sistemasınıń nátiyjeliligin arttırıw máseleleri boyınsha aldaǵı wazıypalardı belgilep aldı.

N.Ziyodullaeva,
ÓzA