“Jergilikli jeńil sanaat kárxanalarınıń xalıqaralıq jetkerip beriw shınjırlarında qatnasıwın keńeytiw hám sırtqı bazarlardaǵı ornın bekkemlewge qaratılǵan ilajlar haqqında”ǵı Prezident pármanı qabıl etildi.
Pármanǵa bola, toqımashılıq kárxanaların ekonomikalıq hám finanslıq kórsetkishlerinen kelip shıqqan halda “jasıl,” “sarı” hám “qızıl” kategoriyalarǵa ajıratıw hám olardıń jumısına mánzilli járdemlesiw boyınsha kárxanalardı qollap-quwatlaw baǵdarlaması ámelge asırıladı.
Bunda tómendegilerge ruqsat beriledi:
– kárxanalarǵa kommerciyalıq bankler tárepinen 2 million AQSh dollarına shekem olar tárepinen satıp alınǵan hám tólemleri tolıq ámelge asırılǵan yamasa ózi jetistirgen shiyki zattı girewge alǵan halda Jeńil sanaattı rawajlandırıw agentliginiń resursları esabınan kreditler ajıratıwǵa;
– salamatlandırıw imkaniyatı bar dep tabılǵan kárxanalardıń aldın alǵan kommerciyalıq kreditleriniń múddetin 7 jılǵa shekem sozdırıwǵa;
– paxta shiyki zatın satıp alıw ushın tartılǵan kreditler boyınsha 2026-2027-jıllarda tólem grafiklerinde yanvar-fevral ayları ushın belgilengen tólemlerdi kredit shártnamasına tiykarlanıp aqırǵı 6 ayǵa teń bólingen halda tólewge.
Sonday-aq, jeńil sanaat kárxanalarında 2026-jıl 1-yanvardan quwatlılıǵı 5 MVtqa shekemgi qayta tikleniwshi energiya dárekleri qurılmalarınan paydalanǵan halda islep shıǵarılǵan elektr energiyasınıń kárxana zárúrliginen artıqsha bólegin satıw sisteması engiziledi.
2026-jıl 1-yanvardan 2028-jıl 1-yanvarǵa shekem paxta tayarlaw punktleri jumısınıń máwsimligin esapqa alǵan halda paxta tayarlaw punktlerine múlk hám jer salıqların 50 procentke azaytılǵan stavkada tólewge ruqsat beriledi.
2026-jıl 1-yanvardan 2029-jıl 1-yanvarǵa shekem:
– kommerciyalıq banklerdiń balansındaǵı toqımashılıq hám tigiw-trikotaj kárxanalarınıń múlkleri investorlarǵa realizaciyalawda QQStan azat etiledi;
– kommerciyalıq banklerdiń balansındaǵı toqımashılıq hám tigiw-trikotaj kárxanalarınıń múlklerin satıp alǵan investorlarǵa usı kárxanalardıń óndirislik jumısın 6 ayda tolıq tiklew shárti menen 1 jıl múddetke múlk salıǵın 50 procentke azaytılǵan stavkada tólewge ruqsat beriledi;
– bılǵarı ayaq kiyim, teri islep shıǵarıw kárxanaları hám sharwa malların soyıw hám terini qayta islewshi shólkemler ushın názerde tutılǵan payda salıǵı, múlk salıǵı, jer salıǵı, aylanıstan alınatuǵın salıq tólemleri boyınsha jeńillikler múddeti sozdırıladı,- dep málimleme beredi xabar.uz saytı.

Qaraqalpaqstan xabar agentligi