Watandı qorǵaw – saqshılarımız ushın maqtanısh, muqaddes minnet, ar-namıs, turmıs mazmunına aylanǵan túsinik. Usı kúnlerde mámleketimiz boylap 14-yanvar – Watan qorǵawshıları kúni hám Ózbekstan Respublikası Qurallı Kúshleri dúzilgeniniń 34 jıllıǵı keńnen belgilenbekte.
Watan qorǵawshıları kúni múnásibeti menen paytaxtımızdıń “Jańa Ózbekstan” baǵındaǵı Ǵárezsizlik monumentine Qurallı Kúshler kúsh strukturalarınıń basshılıǵı hám jeke quramı tárepinen gúl qoyıw máresimi bolıp ótti.
Paytaxtımızdaǵı “Xalıqlar doslıǵı” sarayında 14-yanvar – Watan qorǵawshıları kúni hám Ózbekstan Respublikası Qurallı Kúshleri dúzilgeniniń 34 jıllıǵı múnásibeti menen saltanatlı ilaj shólkemlestirildi.
Oǵan Ózbekstan Respublikası Prezidenti Administraciyasınıń wákilleri, senatorlar, deputatlar, Milliy gvardiya, Qorǵanıw, Ishki isler, Ayrıqsha jaǵdaylar ministrlikleri, Mámleketlik qáwipsizlik xızmeti, MQX Shegara áskerleri, Bajıxana komiteti hám basqa da áskeriy taraw, huqıq qorǵaw uyımlarınıń wákilleri, veteranlar, áskerlerdiń ata-anaları, shańaraq aǵzaları mirát etildi.
Ózbekstan Respublikası Prezidenti, Qurallı Kúshler Joqarı Bas Sárkardası Shavkat Mirziyoevtiń Ózbekstan Respublikası Qurallı Kúshleri dúzilgeniniń 34 jıllıǵı hám Watan qorǵawshıları kúni múnásibeti menen bayram qutlıqlawın Ózbekstan Respublikası qorǵanıw ministri, general-leytenant Shuhrat Holmuhamedov oqıp esittirdi.
Qutlıqlawda atap ótilgenindey, búgingi kúnde xalqımız Jańa Ózbekstandı qurıw jolında úlken jetiskenlikler hám sheklerdi qolǵa kirgizbekte. Turmısımızdıń barlıq taraw hám tarmaqlarında ámelge asırılıp atırǵan shın mánisindegi tariyxıy ózgerislerde Qurallı Kúshlerimizdiń de múnásip úlesi bar.
Haqıyqatında da, derlik on jıllıq dáwir dawamında mámleketimizde bolıp atırǵan jedel jańalanıw processleri watanlaslarımız, olardıń turmıs tárizi, arzıw-niyetleri, iygilikli maqset-niyetlerinde óziniń ayqın kórinisin tappaqta. Óziniń bekkem poziciyası, túpkilikli unamlı jańalanıwları menen dúnyaǵa tanılıp atırǵan Ózbekstan tınıshlıqtı súyetuǵın, isenimli, uzaqtı gózleytuǵın siyasatı menen dúnya jámiyetshiliginde barǵan sayın ózine tán abıray-mártebege iye bolıp barmaqta. Házirgi waqıtta Watanımız regionda tınıshlıq hám turaqlılıqtıń kepilligin támiyinlewshi tiykarǵı kúshke aylanıp úlgerdi.
Keyingi jılları mámleketimizde jaqın qońsı hám uzaq mámleketler menen isenim hám húrmetke tiykarlanǵan, óz-ara paydalı baylanıslardı jolǵa qoyıwǵa tiykarǵı áhmiyet qaratılmaqta. Sonıń menen birge, bul baǵdarda Milliy armiya sistemasın, áskeriy tarawdı túpkilikli reformalaw, onı zaman talabına sáykes túrde modernizaciyalaw boyınsha sistemalı jumıslar alıp barılmaqta.
Ómirin janajan Ózbekstanımızdıń qorǵawı menen tıǵız baylanıstırǵan áskerlerimizdi materiallıq hám ruwxıy jaqtan qollap-quwatlaw, olardıń abadan hám múnásip turmıs keshiriwi, shańaraqlıq sharayat hám imkaniyatların bunnan bılay da jaqsılaw maqsetinde áhmiyetli sociallıq ilajlar turmısqa keńnen engizilmekte.
Sonıń menen birge, Jańa Ózbekstannıń imkaniyatlarınan paydalanıp kamalǵa kelip atırǵan jaslarımızdı Watanǵa sadıqlıq, eldiń táǵdirine baylanıslılıq ruwxında tárbiyalaw, jaslarda belsendi puqaralıq poziciyasın qáliplestiriw máselesine tiykarǵı áhmiyet qaratılmaqta.
Mámleketimiz basshısı, Qurallı Kúshler Joqarı Bas Sárkardası Shavkat Mirziyoevtiń sáne qarsańında Qorǵanıw ministrligi sistemasındaǵı obektlerge saparı usı baǵdarǵa baylanıslı áhmiyetli wazıypalardı belgilep bergeni menen áhmiyetli boldı. Prezidentimizdiń “Ózbekstan Respublikası Qurallı Kúshleri dúzilgeniniń 34 jıllıǵı hám Watan qorǵawshıları kúni múnásibeti menen áskeriy xızmetkerler hám huqıq qorǵaw uyımlarınıń bir topar xızmetkerlerin sıylıqlaw haqqında”ǵı pármanı sánege ózgeshe kóterińki ruwx baǵıshladı.
Bul baǵdardaǵı barlıq háreketler, iygilikli baslamalar eldiń táǵdiri, onıń qáwipsizligi, tınıshlıǵı hám paraxatshılıǵı ushın tek ǵana áskerler emes, al pútkil xalqımız, hámme juwapker ekenin búgingi oǵada qıyın, qáweterli hám tez ózgerip atırǵan, xalıqaralıq huqıq normaları, xalıq diplomatiyasına baylanıslı túsinikler bir qansha azayıp baratırǵan zamannıń ózi kórsetpekte.
– Ózi tuwılıp ósken, ata-babalarımızdıń topıraǵı aralas muqaddes topıraǵımızdı qorǵaw hár bir jigit ushın shın mánisinde maqtanıshlı is bolıp esaplanadı, – dedi Qorǵanıw ministrliginiń vzvod komandiri, “Sodiq xizmatlari uchun” medalınıń iyesi Abdurauf Karimov. – Bul wazıypa Ana Ózbekistanımızdı, onıń keleshegin, xalqımızdı, perzentlerimizdi, keleshegimizdi kózdiń qarashıǵınday qásterlep saqlaw, degen sóz.
– Kishipeyil miynetlerim joqarı bahalandı, – dedi Qorǵanıw ministrliginiń kapitanı, “Jasorat” medalınıń iyesi Mansur Shomurodov. – “Eń aldıńǵı komandir” tańlawında jeńimpaz boldım. Bir neshe jıllar dawamında Hindstan, ǴMDA mámleketleri komandirleriniń jıynalıslarında qatnastım. Bir qatar mámleketlerde ótkerilgen “Armiya oyınları” jarıslarında joqarı orınlardı qolǵa kirgizdim. Maǵan bildirilgen isenim kásipke jáne de kóbirek juwapkershilik penen qarawǵa iytermeleydi.
Keshede ǵárezsizligimizdi, tınısh-tatıw kúnlerimizdi, miynetsúygish xalqımızdı, Ana Ózbekstanımız hám ondaǵı jańalanıw processlerin ulıǵlawshı videokórinisler, kórkem jámáátler, ustaz kórkem óner ǵayratkerleri hám atqarıwshı jaslar qatnasıwında úlken koncert baǵdarlaması qoyıp berildi.
Saltanatlı ilajda Ózbekstan Respublikası Oliy Majlisi Senatı Baslıǵı Tanzila Norboeva, Nızamshılıq palatası Spikeri Nuriddinjan Ismoilov, Bas ministr Abdulla Aripov qatnastı.

Nazokat USMONOVA,
ÓzAnıń xabarshısı