Nókis qalasında 2026-jıl ótkeriletuǵın “Prezident Olimpiadası”na puqta tayarlıqlar kóriw hám respublikamız saylandı komandasına kúshli oyınshılardı tańlap alıw maqsetinde, sporttıń voleybol túrinen jas óspirimler arasında Qaraqalpaqstan ashıq birinshiligi bolıp ótti.
Jarısqa respublikamızdıń barlıq aymaqlarınan komandalar qatnasıp, jeńimpazlıq ushın óz-ara bellesti.
Oǵada qızıqlı ótken jarıs juwmaǵında, balalar arasında Beruniy rayonı sport mektebi komandası barlıq qarsılasların jeńip shıǵıp, Qaraqalpaqstan chempionı ataǵına miyasar boldı.
Al, ekinshi hám hám úshinshi orınlar Nókis hám Ámiwdárya rayonları jaslarına nesip etti.
Qızlar arasında ótkerilgen jarısta bolsa, Nókis qalasındaǵı 1-sanlı sport mektebi tárbiyalanıwshıları birinshi orındı iyeledi.
CHempionattıń gúmis hám qola medalları Moynaq hám Taxtakópir rayonı komandalarına tapsırıldı.
Jarıstıń sıylıqlaw máresimine Qaraqalpaqstan Respublikası Sport ministrligi bólim baslıǵı A.Temirbaev, Ózbekstan Voleybol federaciyası Qaraqalpaqstan bólimi atqarıwı direktorı A.Kazakov hám Qaraqalpaqstan Respublikası Ishki isler ministrliginen S.Seytovlar jas sportshılardı erisken jetiskenligi menen qutlıqlap, olardıń aldaǵı jarıslarda jeńimpaz bolıwına tilekleslik bildirdi.

Adilbay Orazov,
Qaraqalpaqstan xabar agentligi sholıwshısı