Aldın xabar berilgenindey, 2025-jıldıń 19-sentyabr kúni Ózbekstan Respublikası Prezidentiniń “Ózbekstan Respublikasında xalıqtı hám awıl xojalıǵın dizimge alıw ilajın ótkeriw haqqında”ǵı PP-173-sanlı pármanı qabıl etildi. Usı pármanǵa muwapıq, Ózbekstanda 2026-jıl 15-yanvardan 28-fevralǵa shekemgi aralıqta xalıqtı hám awıl xojalıǵın dizimge alıw ilajları ótkeriliwi belgilendi.
Bul ilaj eki basqıshta ámelge asırıladı.
Dáslepki basqıshı 15-31-yanvar kúnleri aralıǵında ótkerilip, puqaralar “census.stat.uz” portalı arqalı (fizikalıq shaxstıń jeke identifikaciya nomeri) onlayn dizimnen ótedi. Usı basqıshta toplanǵan maǵlıwmatlar 3 kún ishinde analiz etiledi.
Bul ushın úlken tayarlıq jumısları alıp barıldı. Barlıq juwapker mákeme hám uyımlarda, máhállelerde dizimge alıw jumısların shólkemlestiriw máselelerine baǵıshlanǵan seminarlar ótkerilip, túsinik jumısları alıp barıldı. Mekteplerde hám bilimlendiriw shólkemlerinde xalıqtı dizimge alıwdıń mazmun-mánisi hám maqsetleri túsindirildi.
Búgin elimiz boylap xalıqtı hám awıl xojalıǵın dizimge alıw ilajları baslandı.
– Búgin statistika basqarması xızmetkerleri “census.stat.uz” portalı arqalı tolıq dizimnen ótip boldı. Juwapker xızmetkerler rayonlarǵa bólinip, dizimge alıw jumısların muwapıqlastırıp barıw boyınsha jumıslar alıp barılmaqta. Kárxana, mákeme hám shólkemlerde de bul jumıslar shólkemleskenlik penen ámelge asırılmaqta, – deydi basqarmanıń baspasóz xızmeti baslıǵı S.Qaypov.
Biz barlıq puqaralardı bul ilajlarda belsene qatnasıwǵa shaqırıp qalamız.
Sebebi, dizimge alıw procesi tek ǵana sanlardı jıynaw ushın emes, al puqaralardıń turmıs dárejesin jaqsılawǵa xızmet etetuǵın áhmiyetli qararlar qabıl etiwge tiykar boladı.
Maǵlıwmat ushın, dizimge alıwdıń keyingi basqıshı 4-28-fevral kúnleri aralıǵında ótkerilip, onda “máhálle jetiligi” hám basqa da belsendiler úyme-úy júrip kerekli maǵlıwmatlardı toplaydı.
Bul arqalı – xalıq haqqında tolıq maǵlıwmat jıynaw, yaǵnıy shańaraqlardıń quramı, ondaǵı jaslardıń hám kekselerdiń úlesi, bilimlendiriw dárejesi, bántlik jaǵdayı hám migraciya processleri boyınsha maǵlıwmatlar toplanadı. Sonıń menen birge, awıl xojalıǵındaǵı jaǵday – jerden paydalanıw, sharwashılıq hám qusshılıq kórsetkishleri anıqlanadı.

Á.Jiyemuratov,
Qaraqalpaqstan xabar agentligi