Sońǵı jılları xalqımız Jańa Ózbekstandı qurıw jolında úlken jetiskenlik hám sheklerdi qolǵa kirgizbekte. Turmısımızdıń barlıq taraw hám tarmaqlarında ámelge asırılıp atırǵan shın mánisindegi tariyxıy ózgerislerde dańqlı Qurallı Kúshlerimizdiń múnásip úlesi bar. Keyingi jılları “Ózbekstan – 2030” strategiyası sheńberinde artqa qaytpaytuǵın reformalarımızdıń bekkem kepillikleriniń birine aylanıp atırǵan Qurallı Kúshlerimizdiń áskeriy qúdiretin arttırıw boyınsha keń kólemli jumıslar ámelge asırılmaqta. Sonıń ishinde, basqarıw hám támiynat sisteması jetilistirilip, zamanagóy málimleme texnologiyaları tiykarında modernizaciyalanbaqta, áskerlerimizdiń jawıngerlik qatarları jańasha tálim hám tárbiya alǵan tájiriybeli oficer hám serjantlar menen tolıqtırılmaqta. Jeke quramnıń tayarlıq dárejesi, áskeriy xızmetkerlerdiń kásiplik, intellektuallıq hám ruwxıy potencialı basqıshpa-basqısh arttırıp barılmaqta. Qurallı Kúshlerimiz zamanagóy qural-jaraq hám áskeriy texnika menen basqıshpa-basqısh támiyinlenbekte. Jaslar arasında áskeriy xızmetke qızıǵıwshılıqtı arttırıw, olardı watansúyiwshilik ruwxında tárbiyalaw, xalıq penen armiya arasındaǵı bekkem birlik hám awızbirshilikti bunnan bılay da kúsheytiwge qaratılǵan nátiyjeli jumıslarımız isenimli dawam ettirilip, Milliya Armiyamız qatarında xızmet etiw úlken abıray-mártebege aylanıp barmaqta.
14-yanvar – Watan qorǵawshıları kúni hám Ózbekstan Respublikası Qurallı Kúshleri dúzilgeniniń 34 jıllıǵı múnásibeti menen paytaxtımızdıń bir qatar orınlarında bayram saltanatları bolıp ótti.
Atap aytqanda Nókis qalası A.Dosnazarov kóshesinde áskeriy sapqa dizilip, Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Qaraqalpaqstan Respublikası Joqarǵı Keńesi menen Ministrler Keńesi, Arqa-batıs áskeriy okrugi, huqıq qorǵaw uyımları, miynet jámáátleri, oqıw orınları xızmetkerleri, urıs hám miynet veteranları, jaslar atınan «Hásiretli ana» esteligine gúl sheńberleri qoyıldı.
Sońınan Berdaq atındaǵı Qaraqalpaq mámleketlik akademiyalıq muzıkalı teatrında Watan qorǵawshıları kúni hám Qurallı Kúshlerimiz dúzilgeniniń 34 jıllıǵı múnásibeti menen bayram saltanatı bolıp ótti.
Ilajda Ózbekstan hám Qaraqalpaqstan Respublikalarınıń mámleketlik gimnleri jańladı.
Májiliste Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, áskeriy taraw xızmetkerleri, veteranlardı hám pútkil xalqımızdı bayram menen qızǵın qutlıqladı.
Atap ótilgenindey, shegaralarımızdıń qáwipsizligin, Watanımızdıń tınıshlıǵın támiyinlewde milliy armiyamızdıń xızmeti ayrıqsha. Watan qorǵawshıları bar eken, elimiz tınısh, aspanımız ashıq, xalqımızdıń tınısh hám abadan turmısı támiyinlenedi.
Ilajda Mámleketimiz Prezidenti, Qurallı Kúshler Joqarı Bas Sárkardası tárepinen tarawǵa qaratılıp atırǵan úlken itibar ayrıqsha tilge alınıp, áskeriy xızmetkerlerdi hám olardıń shańaraq aǵzaların sociallıq qollap-quwatlaw, áskeriy qalashalardı abadanlastırıw, zamanagóy infrastrukturanı qáliplestiriw boyınsha sistemalı jumıslar ámelge asırılıp atırǵanı húrmet penen tilge alındı.
Saltanatlı máresimde milliy armiyamız hám huqıq qorǵaw uyımlarında pidákerlik penen xızmet etip atırǵan bir qatar oficerler, serjantlar hám nuranıylar Qaraqalpaqstan Respublikası Joqarǵı Keńesi Prezidiumınıń arnawlı qararı tiykarında, kókirek belgileri menen sıylıqlandı.
Bayram ilajı kórkem óner sheberleriniń koncert baǵdarlaması menen dawam etti.

Qaraqalpaqstan xabar agentligi