“Ózbekstan-2030” strategiyası joybarın dodalaw dawam etpekte. Onda sociallıq tarawǵa baylanıslı bir qatar áhmiyetli maqsetler belgilengen.
Atap aytqanda, ata-ana qaramaǵınan ayırılǵan balalardı tárbiyalawda 100 procent alternativ formalardı engiziw, “Hayal-qızlar dápteri” arqalı kámbaǵallıqtan shıǵarılǵan hayal-qızlardıń úlesin 70 procentke jetkeriw názerde tutılǵan.
Isbilermen hayal-qızlarǵa járdemge mútáj hayal-qızlardı biriktiriw arqalı olardıń kásipke hám turaqlı dáramat deregine iye bolıwına erisiw jáne 100 mıń hayal-qızdıń imkaniyatların arttırıw sıyaqlı wazıypalar da belgilengen.
Senattıń Jaslar, hayal-qızlar, mádeniyat hám sport máseleleri komiteti májilisinde bul haqqında sóz boldı. Mádeniyat hám sport tarawlarında da keń kólemli rejeler belgilengeni atap ótildi.
Sonıń ishinde, mádeniy miyras obektlerin saqlaw ushın mámleketlik byudjetten ajıratılatuǵın qarjılardı 30 procentke arttırıw, 2,5 mıń arxeologiyalıq predmetti mámleketlik katalogqa kirgiziw, 1,1 million muzey predmetin sanlastırıw rejelestirilgen.
Jaslar arasında jumıssızlıq dárejesin 15 procentten 11 procentke túsiriw, 2030-jılǵa shekem sanaat tarawın rawajlandırıw esabınan qosımsha 400 mıń jastı jumıs penen támiyinlew ilajları názerde tutılǵan.
Májilis dawamında Strategiya joybarı boyınsha pikir-usınıslar bildirildi.
Senattıń tiyisli qararı tiykarında jas óspirim balalardıń támiynatı ushın aliment óndiriw hám tólew sistemasın jetilistiriw boyınsha Ministrler Kabinetine jiberilgen parlamentlik soraw nátiyjeleri de dodalandı.
Tallaw nátiyjesinde ayırım máseleler tolıq sheshimin tappaǵanı málim boldı. Atap aytqanda, turaqlı jumıs ornına iye bolmaǵan yamasa dáramatı anıqlanbaǵan aliment tólewshilerden aliment óndiriw tártibin jetilistiriw, “Aliment tólemleri” qorı esabınan tólep berilgen qarjılardı qarızdarlardan óndiriw, sonday-aq, “Balalarǵa aliment óndiriw hám shańaraqtı támiyinlewdiń basqa da túrleriniń xalıqaralıq tártibi haqqında”ǵı Gaaga konvenciyasına qosılıw máselelerine ayrıqsha itibar qaratıw zárúr ekenligi atap ótildi.
2030-jılǵa shekem Ózbekstan Respublikasında gender teńlikke erisiw strategiyasınıń orınlanıwı sheńberinde ámelge asırılıp atırǵan jumıslar da tallandı. Málim etilgenindey, hayal-qızlar hám er adamlar ushın teń huqıq hám imkaniyatlardı támiyinlew, hayal-qızlardıń ekonomikalıq jáne sociallıq sharayatların jaqsılawǵa qaratılǵan 15 normativlik-huqıqıy hújjet qabıl etilgen. Milliy kadrlar rezervinde hayal-qızlardıń úlesi aldınǵı jıllarǵa salıstırǵanda 2 esege arttırılıp, 27 procentke jetken.
Ashıq gender maǵlıwmatları indeksinde Ózbekstan eń jaqsı 20 mámleket qatarına kirgen. Gender teńlik hám basqarıw indeksinde bolsa mámleketimiz óz ornın 103-orınnan 52-orınǵa kóterip, 51 tekshege jaqsılanǵan.
Májiliste mámleketlik xızmette hayal-qızlardı qollap-quwatlaw, MKShlardıń potencialın arttırıw, gender siyasattı ámelge asırıwda olardıń qatnasın keńeytiw, sonday-aq, kúsh kórsetiw hám zorlıqtan jábirleniwshilerdi qorǵaw máselelerine ayrıqsha itibar qaratıw zárúr ekenligi atap ótildi.
Májilis sheńberinde hayal-qızlardıń huqıqları menen máplerin qorǵawǵa qaratılǵan húkimetke kirgizilgen usınıslardıń keleshektegi orınlanıwın támiyinlew boyınsha hár tárepleme hám sın kózqarastan dodalaw ótkerilip, anıq wazıypalar belgilendi.

N.Abduraimova,
ÓzA