14-yanvar – Watan qorǵawshıları kúni múnásibeti menen Nókis qalasında Qorǵanıw ministrligi sistemasında pidayı xızmet etip kiyatırǵan bir topar áskeriy xızmetkerlerge jańa, zamanagóy hám barlıq qolaylıqlarǵa iye turaq jaylar saltanatlı túrde tapsırıldı.

Saltanatlı máresimde Qaraqalpaqstan Respublikası Joqarǵı Keńesiniń wákilleri, okrug sárkardalıǵı juwapkerleri, keń jámiyetshilik wákilleri, sonday-aq, áskeriy xızmetkerlerdiń shańaraq aǵzaları qatnastı.
Ilajda shıǵıp sóylegenler mámleketimizde áskeriy xızmetkerlerdi hár tárepleme qollap-quwatlaw, olardıń xızmet hám turmıs sharayatların jaqsılaw mámleketlik siyasattıń tiykarǵı baǵdarlarınan biri ekenin atap ótti. Watan tınıshlıǵı hám tatıwlıǵın támiyinlew jolında kúni-túni pidákerlik penen xızmet etip atırǵan áskeriy xızmetkerlerdiń miyneti joqarı húrmetke ılayıq ekeni atap ótildi.
Tapsırılǵan turaq jaylar keń hám jaqtı xanalar, zamanagóy kommunikaciya sistemaları menen úskenelengen bolıp, ıssı hám suwıq suw, tábiyǵıy gaz, elektr energiyası menen tolıq támiyinlengen. Sonday-aq, turaq jay kompleksi aymaǵında balalar oyın maydanshaları, jasıl aymaqlar, avtomobil turıw orınları qurılǵan bolıp, xalıq ushın qolaylı, qáwipsiz hám zamanagóy ortalıq jaratılǵan.
Kvartira giltlerin saltanatlı túrde qabıl etip alǵan áskeriy xızmetkerler hám olardıń shańaraq aǵzaları mámleketimiz basshısına hám Qorǵanıw ministrligine tereń minnetdarshılıq bildirip, jaratılıp atırǵan sharayatlar xızmetke bolǵan juwapkershilik hám sadıqlıqtı jáne de arttıratuǵının atap ótti.
Ilaj bayram keypiyatında dawam etip, mádeniy baǵdarlama, watansúyiwshilik ruwxındaǵı qosıqlar hám kórkem shıǵıwlar menen jáne de kóterińki ruwxta ótti.

Qaraqalpaqstan xabar agentligi