Ózbekstan Respublikası Prezidenti, Qurallı Kúshler Joqarı Bas Sárkardası Shavkat Mirziyoev 13-yanvar kúni Qorǵanıw ministrligi sistemasındaǵı obektler menen tanıstı.
Mámleketimiz basshısı dáslep Shırshıq aviaciya ońlaw zavodına bardı.
Prezidentke kárxanada ámelge asırılǵan keń kólemli modernizaciya nátiyjeleri hám onıń jańa joqarı texnologiyalıq bólimleriniń jumısı haqqında maǵlıwmat berildi.
Zavod negizinde ǴMDA hám regionımızda birden-bir bolǵan “Airbus” vertolyotlarına texnikalıq xızmet kórsetiw orayı iske qosılǵan.
Oray Franciyanıń “Airbus” kompaniyası tárepinen rásmiy sertifikatlastırılǵan bolıp, óndiris joqarı dárejede shólkemlestirilgeni, xalıqaralıq standartlar hám islep shıǵarıwshı tárepinen belgilengen talaplarǵa muwapıq ekenligi tastıyıqlanǵan. Bul jerde Batıs aviatexnikasınıń zamanagóy modelleri, sonıń ishinde, H-125, H-215 hám H-130 markalı vertolyotlar ushın servis hám ońlaw jumıslarınıń tolıq shınjırı jolǵa qoyılǵan.
Oray Ózbekstandı “Airbus” vertolyotlarına texnikalıq xızmet kórsetiw hám olardı ekspluataciyalaw boyınsha áhmiyetli regionallıq xabqa aylandırıw imkaniyatın beredi.
Mámleketimiz jetekshisi oraydıń imkaniyatları menen tanıstı hám qánigeler menen sóylesti.
Usı jerdiń ózinde Prezidentimizge zavodtıń Su-25 áskeriy samolyotların kapital ońlaw hám tereń modernizaciyalaw boyınsha jańalanǵan cexları tanıstırıldı. Aldınǵı texnologiyalardı engiziw esabınan endi kárxanada texnikanı zamanagóy navigaciya sistemaları, túngi kóriw qurılmaları hám borttaǵı ózin-ózi qorǵaw kompleksleri menen úskenelew jumısları ámelge asırılmaqta.
Mámleketimiz basshısı sapar etiw juwmaǵında elimizdiń qorǵanıw sanaatı potencialın bunnan bılay da bekkemlew boyınsha tapsırmalar berdi.
Ózbekstan Respublikası Prezidenti, Qurallı Kúshler Joqarı Bas Sárkardası Shavkat Mirziyoev Tashkent wálayatındaǵı Arnawlı operaciyalar kúshleri poligonı menen tanıstı.
Prezidentimizdiń baslaması menen sońǵı jılları Qorǵanıw ministrligi áskerlerindegi barlıq dala oqıw maydanları, áskeriy bólim hám mákemelerde modernizaciya jumısları alıp barılıp, olar xalıqaralıq standartlarǵa beyimlestirildi.
Arnawlı bólimshelerdi nátiyjeli tayarlaw maqsetinde xalıqaralıq tájiriybe hám áskerlerdi tayarlawdıń zamanagóy tendenciyaların esapqa alıp shólkemlestirilgen Arnawlı operaciyalar kúshleriniń jańa poligonı bul jumıslardıń logikalıq dawamı boldı.
Poligon obektlerinde jeke quramnıń jawıngerlik kónlikpelerin jetilistiriw, tayarlıq shınıǵıwların nátiyjeli jolǵa qoyıw hám ruwxıy-aǵartıwshılıq turaqlılıǵın arttırıw ushın zárúr sharayatlar jaratılǵan.
Mámleketimiz basshısı bul jerde jawıngerlik hám arnawlı tayarlıq shınıǵıwların shólkemlestiriwdiń jańa usılları menen tanıstı. Qurallı Kúshler bólimleri menen ótkerilip atırǵan shınıǵıwlardıń jedel basqıshın baqladı.
Oqıw dawamında hár qıylı áskerlerge tiyisli bólimshelerdiń jawıngerlik imkaniyatları hám olardıń birgeliktegi háreketleriniń muwapıqlasqanlıq dárejesi, sonday-aq, áskerler hám qural-jaraqlardı basqarıwdıń jańa sanlı sistemaları kórsetildi.
Hár qıylı jawıngerlik operaciyalardı ótkeriwde ushıwshısız ushıw apparatlarınan nátiyjeli paydalanıw usılları, sonday-aq, hár qıylı oqıw-jawıngerlik wazıypalardı orınlaw procesinde artilleriya, aviaciya, hawa hújiminen qorǵanıw hám qurǵaqlıqtaǵı áskerlerdiń birgeliktegi háreketleri kórsetildi.
Onda kishi komandirlerdiń zamanagóy sanlı texnologiyalardı paydalanǵan halda erkin qarar qabıl etiw kónlikpeleri hám basqarıw sheberligi dárejesi, sonday-aq, áskeriy xızmetkerlerdiń tez ózgerip atırǵan jawıngerlik jaǵday sharayatında sawash maydanında zamanagóy qural-jaraq hám texnikanı nátiyjeli qollanıw boyınsha kásiplik sheberligin bahalawǵa ayrıqsha itibar qaratıldı.
Oqıw juwmaǵında Qurallı Kúshler Joqarǵı Bas Sárkardası bólimlerdiń tayarlıǵı hám olardıń birgeliktegi háreketlerinde erisilgen úylesimlilik dárejesin joqarı bahaladı.
Mámleketimiz basshısı Qurallı Kúshlerdiń sárkardalıq quramı menen bolǵan sáwbette dúnyada qáwipsizlikke qáwip-qáterler háwij alıp atırǵan búgingi qáweterli kúnlerde Qurallı Kúshlerimizdiń potencialın bunnan bılay da bekkemlew, xalıq hám armiyanıń awızbirshiligin támiyinlew, jaslardı watansúyiwshilik ruwxında tárbiyalaw áskeriy tarawdaǵı reformalardıń tiykarın qurawı kerek ekenligin atap ótti.
Bunnan soń Ózbekstan Respublikası Prezidenti, Qurallı Kúshler Joqarı Bas Sárkardası Shavkat Mirziyoev Shırshıq qalasındaǵı texnoparkke barıp, qorǵanıw sanaatı kárxanalarınıń jumısı menen tanıstı.
Bul jerde bronlanǵan hám arnawlı texnikalar jáne aldınǵı funkcional imkaniyatları hám texnikalıq ózgeshelikleri menen ajıralıp turatuǵın bir neshe túrdegi aralıqtan basqarılatuǵın jawıngerlik modullerdi islep shıǵarıw jolǵa qoyılǵan.
Bul sheshimler háreketleniwshi hám turaqlı nıshanlarǵa, sonıń ishinde, kóriw sheklengen sharayatlarda oq atıwdı támiyinleydi. Avtomatlastırılǵan basqarıw, turaqlastırıw, optikalıq hám akustikalıq baqlaw sistemaları, sonday-aq, zamanagóy nıshanaǵa alıw quralları menen támiyinlengen.
Mámleketimiz basshısına tiykarǵı komplektlewshi bóleklerdi jıynaw, optikalıq-elektron hám turaqlastırıw sistemaların ornatıw, programmalıq sazlaw hám germetiklikti qadaǵalaw, qural-jaraqlardı integraciyalaw hám kompleksli sınaqlardan ótkeriwdi óz ishine alǵan óndiris basqıshları haqqında maǵlıwmat berildi. Juwmaqlawshı basqıshta tayar moduller jeńil bronlanǵan texnika úlgilerine ornatıladı hám dala sharayatında tekseriledi.
Jawıngerlik moduller hár qıylı platformalar, sonıń ishinde, jeńil bronlanǵan texnika, arnawlı avtomobiller, katerler hám bronlanǵan transportyorlardı úskenelew ushın mólsherlengen.
Joybar bir qatar sırt elli birge islesiwshiler menen birgelikte elimizdiń tiyisli uyımları hám sanaat kárxanalarınıń qatnasıwında ámelge asırılmaqta.
Bulardıń barlıǵı elimizdiń qorǵanıw sanaatı kárxanalarında joqarı texnologiyalı ónimler islep shıǵarıwdı kóbeytiw, jumıs orınların jaratıw, óziniń sanaat hám texnologiyalıq bazasın qáliplestiriwge xızmet etpekte.
Mámleketimiz basshısı ónimlerdiń sapası hám isenimliligine baylanıslı talaplarǵa qatań ámel etiw, lokalizaciyalawdı izbe-iz keńeytiw, injenerlik kompetenciyalardı rawajlandırıw hám sanaat kooperaciyasın tereńlestiriw áhmiyetli ekenligin atap ótip, juwapkerlerge tiyisli tapsırmalar berdi.

ÓzA