Qaraózek rayonı orayındaǵı Mádeniyat sarayında «14-yanvar – Watan qorǵawshıları kúni» hám Ózbekstan Respublikası Qurallı Kúshleri dúzilgeniniń 34 jıllıǵı múnásibeti menen saltanatlı bayram ilajı ótkerildi.
Ilajda rayon hákimi, huqıq qorǵaw uyımlarınıń basshıları, áskeriy taraw xızmetkerleri hám keń jámiyetshilik wákilleri qatnastı.
Onda rayon hákimi A.Baymuratov, qatnasıwshılardı bayram menen qızǵın qutlıqlap, mámleketimizde milliy Armiyamızdıń kúsh-qúdiretin nıǵaytıw, onı bilimli hám jetik kadrlar, jańa zamanagóy texnologiyalar menen támiyinlew baǵdarında alıp barılıp atırǵan keń kólemli reformalar, áskeriy xızmetkerler hám jaslarımızǵa jaratılıp atırǵan imkaniyat hám jeńillikler haqqında keń túrde aytıp berdi.
Sonday-aq, ilajda áskeriy taraw xızmetkerleri de shıǵıp sóylep, Watanımız shegaralarınıń qol qatılmaslıǵın támiyinlew, xalqımızdıń tınısh hám paraxat turmısın qorǵawda jolında mámleketimizde Prezidentimiz basshılıǵında kóplegen unamlı islerdiń alıp barılıp atırǵanın maqtanısh penen atap ótti.
Ótkerilgen saltanatlı ilaj dawamında rayonlıq qorǵanıw isleri bólimi xızmetkerleri hám mekteplerdegi shaqırıqqa shekemgi baslanǵısh tayarlıq páni muǵallimlerine rayon hákimliginiń Húrmet jarlıqları hám estelik sawǵaları saltanatlı túrde tapsırıldı.
Bayram ilajı rayonlıq mádeniyat bólimi xızmetkerleri, Balalar muzıka hám kórkem óner mektebi tárbiyalanıwshıları atqarıwındaǵı ana-Watan hám mártlikti jırlawshı yoshlı koncert baǵdarlaması menen dawam etti.

Qaraqalpaqstan xabar agentligi