Ministrler Kabineti tárepinen kepillengen paket sheńberindegi biypul medicinalıq xızmetlerdiń kólemi belgilep berilgen. Endi baslanǵısh medicinalıq-sanitariyalıq járdem mákemelerinde kórsetiletuǵın medicinalıq járdemniń usı kepillengen kóleminen artıqsha medicinalıq xızmetler hám basqa da xızmetler tólemli tiykarda ámelge asırılıwı kútilmekte.
Sonday-aq, shańaraqlıq shıpaker yamasa medicina brigadasınıń jollanbasısız baslanǵısh medicinalıq-sanitariyalıq járdem mákemelerine múrájat etkende de puqaralarǵa tólemli tiykarda medicinalıq xızmet kórsetiledi. Sebebi bul medicinalıq járdem de qosımsha xızmet esaplanadı. Buǵan qıstawlı hám tez medicinalıq járdem kórsetiw kirmeydi.
Oliy Majlis Nızamshılıq palatasınıń májilisinde xalıqqa medicinalıq járdemniń kepillengen kólemine kiretuǵın xızmetlerdi kórsetiw, medicina hám farmacevtika xızmetkerleriniń kásiplik jumısın ámelge asırıw sistemasın jetilistiriwge qaratılǵan nızam joybarı kórip shıǵıldı.
Atap ótilgenindey, nızam joybarında joqarıdaǵı tártipler hám densawlıqtı saqlawdı basqarıwdıń innovaciyalıq modelin engiziw, medicina hám farmacevtika xızmetkerlerin mámleketlik dizimge alıwdıń huqıqıy tiykarları bekkemlenbekte.
Atap aytqanda, medicina hám farmacevtika jumısı menen shuǵıllanıw huqıqına ózine medicina tarawında, joqarı yamasa professional bilim alǵanlıǵı haqqındaǵı diplom berilgen hám mámleketlik dizimnen ótkerilgen shaxslar iye bolıwı belgilenbekte. Onda medicina tarawında joqarı yamasa kásiplik bilimlendiriw haqqındaǵı diplom berilgende juwmaqlawshı mámleketlik attestaciyanıń nátiyjesine muwapıq mámleketlik dizimnen ótkeriledi.
Májiliste atap ótilgenindey, nızam joybarınıń qabıl etiliwi xalıqtıń joqarı sapalı medicinalıq xızmet alıw huqıqların nátiyjeli támiyinlewge, densawlıqtı saqlawdı basqarıwdıń innovaciyalıq modelin engiziwge, nızamshılıq hám mamanlıq talaplarına sáykes kelmeytuǵın shaxslardıń medicinalıq hám farmacevtikalıq jumıs penen shuǵıllanıwınıń aldın alıwǵa xızmet etedi.

Muhtarama Komilova,
ÓzA