Qaraqalpaqstan medicina institutında «14-yanvar — Watan qorǵawshıları kúni» hám Ózbekstan Respublikası Qurallı Kúshleri dúzilgeniniń 34 jıllıǵı múnásibeti menen áskeriy tarawda xızmet etip atırǵan qánigelerdiń qatnasıwında “Milliy armiya – ana Watan qorǵanı, tınıshlıǵımızdıń saqshısı” atamasında ruwxıy-aǵartıwshılıq ushırasıw bolıp ótti.
Ilajdı instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı Zayır Alewov ashtı hám basqarıp bardı.
Ol óziniń shıǵıp sóylegen sózinde ilaj qatnasıwshıların bayram menen qutlıqlap, mámleketimizdiń tınıshlıǵı hám turaqlı rawajlanıwın támiyinlewde Qurallı Kúshlerimizdiń tutqan ornı hám xızmetin ayrıqsha atap ótti.
Ushırasıwda Qaraqalpaqstan Respublikası Milliy gvardiyası basqarması medicinalıq xızmet baslıǵı Azim Abdullaev, Arqa-batıs áskeriy okrugi medicinalıq támiynat xızmetiniń baslıǵı Anvar Egamberdiev ózleriniń xızmet jolı, Watan tınıshlıǵın saqlaw jolında talap etiletuǵın pidayılıq, áskeriy minnet hám juwapkershilik haqqında keń túrde aytıp berdi.
– Ásirese, áskeriy medicina tarawınıń jumısına ayrıqsha toqtap ótildi. Atap ótilgenindey, áskeriy medicina xızmetkeri eki ese juwapkershilikti moynına aladı, – deydi Anvar Egamberdiev. – Birinshiden, áskeriy forma húrmeti bolsa, ekinshiden aq xalatlı – shıpakerlerdiń minneti bolıp tabıladı.
Bul álbette, bizlerden qatań juwapkershilik, pidayılıq hám haqıyqıy mártlikti talap etedi.
Ótkerilgen ilajda bayram múnásibeti menen áskeriy taraw pidayılarına hámde institut penen nátiyjeli birge islesip kiyatırǵan qánigelerge Qaraqalpaqstan medicina institutınıń «Alǵısnama»ları hám estelik sawǵaları saltanatlı túrde tapsırıldı.

Adilbay Orazov,
Qaraqalpaqstan xabar agentligi sholıwshısı