Búgin Saudiya Arabstanında futbol boyınsha U-23 Aziya kuboginde kelesi basqıshqa shıǵıw ushın sheshiwshi 3-tur oyınları bolıp ótedi.
«S» toparında Qubla Koreyadan soń dárwazalarǵa urılǵan gollar esabınan 4 upay menen ekinshi orında kiyatırǵan Ózbekstan jaslar saylandı komandası topar jetekshisi menen oyınǵa túsedi.
Bunnan aldın Iran jaslar saylandı komandası menen 0:0 oynaǵan Ravshan Xaydarov shákirtlerin bul turda tek ǵana jeńis yamasa Livannıń Irannan upay alıwı ǵana qanaatlandıradı.
Sonlıqtan bul oyınǵa komandamız aǵzaları puqta tayarlıq kórmekte. Sonı aytıp ótiwimiz kerek, Ózbekstan jaslar saylandı komandası quramında «Aral» futbol klubınıń eki tárbiyalanıwshısı dárwazaman Samandar Muratbaev hám yarım qorǵawshı Muhammedaliy Reymovlar háreket etpekte.
Ózbekstan hám Qubla Koreya jaslar saylandı komandaları arasındaǵı oyın búgin saat 16:30 da baslanadı.

Adilbay Orazov,
Qaraqalpaqstan xabar agentligi sholıwshısı