Húkimet qararı menen “Joqarı bilimlendiriw shólkemleri studentleriniń buyırtpashılar menen birge islesiwin shólkemlestiriw tártibi haqqında”ǵı reje tastıyıqlandı.
Reje bakalavriat baǵdarında ekinshi hám onnan joqarı kursta oqıp atırǵan studentlerdiń oqıwı ushın shártnama tólemlerin jumıs beriwshiler tárepinen qaplap beriw hám olardıń oqıwı juwmaqlanǵannan keyin jumısqa qabıl etiw tártibin belgileydi.
Rejege bola, joqarı bilimlendiriw shólkemleri hám studentler arasında 3 tárepleme shártnamalar dúziwde jumısshılar sanı 50 den artıq yamasa bahası keminde 1 million AQSh dolları bolǵan investiciyalıq joybarlarǵa iye ministrlik, uyım hám shólkemler buyırtpashı sıpatında qatnasıwı múmkin.
Studentler hár jılı 20-sentyabrge shekem tańlawda qatnasıw ushın joqarı bilimlendiriw shólkemine elektron arza tapsıradı. Onda ózlestiriw kórsetkishleri haqqındaǵı maǵlıwmatnama qosımsha etiledi.
Studentler oqıwdı tamamlaǵannan soń buyırtpashı kárxana yamasa shólkemde jumıs islew shárti menen arza tapsıradı.
Arza tapsırıw hám tańlap alıwda qatnasıwshı talabanlardıń usı oqıw jılında ózlestiriw GPA kórsetkishi 3 hám onnan joqarı bolıwı talap etiledi.
Tańlaw komissiyası hár jılı 15-oktyabrge shekem joqarı bilimlendiriw shólkeminde talabanlardı sáwbet tiykarında tańlap alıwdan ótkeredi.
Talapkerlerdi tańlap alıwda buyırtpashı wákiliniń juwmaǵı tiykarǵı ólshem esaplanadı.
Úsh tárepleme shártnama dúzgen hám bilimlendiriwdi tabıslı tamamlaǵan studentler oqıwdı tamamlaǵannan keyin buyırtpashı tárepinen belgilengen tártipte jumısqa qabıl etiledi,- dep málimleme beredi xabar.uz saytı.

Qaraqalpaqstan xabar agentligi