Nókis Olimpiya hám paralimpiya sport túrlerine tayarlaw orayında sporttıń Gandbol túrinen 2012-2013-jılları tuwılǵan jas óspirimler arasında Qaraqalpaqstan chempionatı bolıp ótti.
Bul jarısta respublikamızdıń barlıq aymaqlarınan komandalar qatnasıp, jeńimpazlıq ushın óz-ara keskin gúres alıp bardı.
Qızǵın bellesiwler tolı bolǵan jarıs juwmaǵında, er balalar arasında birinshi orındı, Nókis qalasınıń jas gandbolshıları jeńip alıwǵa miyasar boldı.
Sıylı ekinshi hám úshinshi orınlar bolsa, Shımbay hám Taqıyatas rayonları sport mektepleriniń tárbiyalanıwshılarına nesip etti.
Al, qızlar arasında ótkerilgen jarıs juwmaǵında bolsa, birinshi hám ekinshi orınlardı Respublikalıq sporttıń oyın túrleri hám jeńil atletika sport túrlerine qánigelestirilgen sport mektebiniń komandaları jeńip alıwǵa eristi.
Jarısqa puqta tayarlıqlar kórgen Shımbay rayonı sport mektebi komandası úshinshi orınǵa múnásip dep tabıldı.
– Bul jarıstı ótkeriwdnen tiykarǵı maqset, 2026-jılı ótkeriletuǵın “Jańa Ózbekstan Olimpiada shoqqıları” sport jarıslarına qábiletli sportshılardı anıqlap, respublikamızdıń saylandı komandasın dúziw bolıp esaplanadı, – deydi Qaraqalpaqstan Respublikası Sport ministrliginiń Málimleme xızmeti bas qánigesi Dúrdana Orazbaeva.
Ótkerilgen jarıs sońında jeńimpazlar shólkemlestiriwshiler tárepinen tayarlanǵan arnawlı diplom hám medallar menen sıylıqlandı.

Adilbay Orazov,
Qaraqalpaqstan xabar agentligi sholıwshı