Ózbekstan Respublikası Prezidenti Shavkat Mirziyoevtiń Oliy Majlis hám Ózbekstan xalqına jollaǵan Múrájatınıń mazmun-mánisin xalıq arasında keńnen úgit-násiyatlaw maqsetinde aymaqlarda ushırasıwlar shólkemlestirilmekte.
Usınday ushırasıwlardıń biri búgin Kegeyli rayonı Jaslar orayında bolıp ótti. Onda Ózbekstan Liberal-demokratiyalıq partiyasınan saylanǵan deputatlar, partiya belsendileri, jaslar hám keń jámietshilik wákilleri qatnastı.
Ilaj dawamında Xalıq deputatları Kegeyli rayonlıq Keńesiniń baslıǵı Berdaq Matekov, Keńes Sekretariatınıń baslıǵı B.Iskenderov hám ÓzLiDeP Kegeyli rayonlıq Keńesi apparatınıń baslıǵı P.Bayjanov tárepinen Prezident Múrájatında belgilengen tiykarǵı ideyalar, baǵdarlar hám olardıń áhmiyeti boyınsha keń túrde túsinik berildi.
Atap ótilgenindey, mámleketimiz basshısı Múrájatta sońǵı jıllarda ámelge asırılǵan keń kólemli reformalar nátiyjesinde mámleket ekonomikası turaqlı ósiw jolına shıqqanın, xalıqtıń dáramatları hám turmıs dárejesi sezilerli artqanın ayrıqsha atap ótti. Kámbaǵallıq dárejesiniń qısqarıwı, millionlaǵan puqaralardıń dáramatlı miynet penen támiyinleniwi, sociallıq qorǵaw sistemasınıń pútkilley jańa basqıshqa kóteriliwi bul reformalardıń áhmiyetli nátiyjelerinen bolıp esaplanadı.
Múrájatta 2026-jılı mámlekettiń rawajlanıwın támiyinlewge qaratılǵan altı tiykarǵı baǵdar belgilep berildi. Sonıń ishinde, máhálleniń jámiyettegi ornın bunnan bılay da bekkemlew, onı xalıqtı birlestiretuǵın, sociallıq máselelerdi ornında sheshetuǵın áhmiyetli institutqa aylandırıw arqalı puqaralardıń turmıs sapası bunnan bılay da jaqsılanatuǵını atap ótildi. Sonıń menen birge, ekonomikanı texnologiyalıq hám innovaciyalıq rawajlandırıw, jańa sanaat quwatlıqların iske qosıw, jasalma intellekt hám sanlı texnologiyalardı engiziw arqalı joqarı qosımsha qunlı ónimler islep shıǵarıw hám jańa jumıs orınların jaratıw názerde tutılmaqta.
Ishki bazarda talaptı xoshametlew, ipoteka hám xızmetler tarawın rawajlandırıw, transport hám turizm infrastrukturasın jaqsılaw arqalı xalıqtıń satıp alıw qábiletin arttırıw da tiykarǵı wazıypalar qatarında belgilendi. Sonday-aq, zamanagóy kásipler hám jańa miynet bazarı arxitekturasın qáliplestiriw arqalı jaslardıń bilim hám kónlikpelerin zaman talaplarına múnásip túrde rawajlandırıwǵa ayrıqsha itibar qaratıldı.
Ekologiyalıq turaqlılıqtı támiyinlew, “jasıl” energetika, suw hám tábiyǵıy resurslardan aqılǵa uǵras paydalanıw, hawa pataslanıwın azaytıwǵa qaratılǵan ilajlar xalıqtıń salamatlıǵın hám qorshaǵan ortalıqtı qorǵawdı támiyinlewge xızmet etetuǵını atap ótildi. Sonıń menen birge, zamanagóy mámleketlik basqarıw hám ádil sud-huqıq sistemasın qáliplestiriw, elektron húkimetti rawajlandırıw, korrupciyaǵa qarsı keskin gúresiw arqalı jámiyette ádillik hám isenim ortalıǵın bekkemlew maqset etilgenligi atap ótildi.
Ilaj qatnasıwshıları Múrájatta belgilengen wazıypalar hár bir puqaranıń kúndelikli turmısı menen tikkeley baylanıslı ekenin, bul reformalar xalıqtıń abadanlıǵı, jaslardıń keleshegi hám mámlekettiń rawajlanıwı ushın bekkem tiykar jaratatuǵının ayrıqsha atap ótti. Puqaralar bilimlendiriw, kásipke baǵdarlaw, isbilermenlik hám máhálle sistemasına baylanıslı baslamalardı unamlı bahalap, olardı turmısqa engiziwde belsene qatnasıwǵa tayar ekenligin bildirdi.
Ushırasıw juwmaǵında Prezident Múrájatı Jańa Ózbekstandı qurıwda áhmiyetli qollanba ekeni, onda belgilengen tiykarǵı wazıypalardıń orınlanıwında deputatlar, partiya aǵzaları hám keń jámiyetshiliktiń awızbirshiliktegi háreketleri sheshiwshi áhmiyetke iye ekeni atap ótildi. Múrájat ideyaların xalıq arasında keńnen úgit-násiyatlaw hám ámeliy turmısqa engiziw bárshemizdiń ulıwma wazıypamız ekeni atap ótildi.

Qaraqalpaqstan xabar agentligi