Ózbekstan Respublikasında mayıplıǵı bolǵan turistler ushın qolaylı infrastruktura jaratıw “tosqınlıqsız turizm”di rawajlandırıwdıń tiykarǵı baǵdarlarınan biri bolıp esaplanadı. Bul koncepciya tek ǵana turizm tarawındaǵı imkaniyatlardı keńeytedi, al sociallıq ádillik hám teńlikti támiyinlewge de xızmet etedi. Keyingi jılları mámleketimiz turizm infrastrukturasın modernizaciyalawǵa úlken itibar qaratpaqta, atap aytqanda, tariyxıy estelikler, muzeyler, miymanxanalar hám transport sistemalarında mayıplıǵı bolǵan shaxslar ushın qolaylıqlar engizilmekte.
“Tosqınlıqsız turizm”di ámelge asırıwda eń áhmiyetli táreplerden biri – transport sistemasın beyimlestiriw bolıp esaplanadı. Máselen, qalalarda jámiyetlik transportta arnawlı panduslar, keńeytilgen esikler hám belgiler arqalı mayıplar ushın qáwipsiz hám qolaylı háreketleniw imkaniyatı jaratılmaqta. Sonday-aq, aeroportlar hám temir jol stanciyalarında liftler, arnawlı járdemshi qurılmalar hám xızmet kórsetiw xızmetkerleriniń mamanlıǵın arttırıw arqalı turistler ushın xızmet sapasın jaqsılawǵa itibar qaratılmaqta.
Turizm obektlerinde de kiriw imkaniyatı standartların engiziw úlken áhmiyetke iye. Muzeyler, tariyxıy estelikler hám dem alıw orınlarında arnawlı jollar, beyimlesiwsheń inventar hám audio-gidler arqalı mayıplıǵı bolǵan turistler de mádeniy hám tariyxıy tájiriybege tolıq iye bolıwı múmkin. Bul tek ǵana turistler ushın qolaylılıq jaratıp qoymastan, al mámlekettiń turizm potencialın arttırıwǵa xızmet etedi.
Sonday-aq, málimleme texnologiyaları járdeminde “tosqınlıqsız turizm”di rawajlandırıw múmkin. Mobil qosımshalar hám veb-saytlar arqalı mayıplıǵı bolǵan turistler ushın sáykes obektler, transport jónelisleri hám xızmetler haqqında aldınnan maǵlıwmat alıw imkaniyatı jaratılmaqta. Bul bolsa olardıń sayaxatların rejelestiriwdi ańsatlastıradı hám Ózbekstandı qolaylı, qáwipsiz hám inklyuzivlik turizm mákanına aylandıradı,-dep málimleme beredi xabar.uz saytı.

Qaraqalpaqstan xabar agentligi