“Ózbekstan – 2030” strategiyası mámleketimizdiń orta hám uzaq múddetli rawajlanıwın belgilep beretuǵın tiykarǵı baǵdarlamalıq hújjet bolıp esaplanadı. Ol Jańa Ózbekstandı qurıwǵa qaratılǵan reformalardıń ulıwma baǵdarı, tiykarǵı maqsetlerin hám ámeliy mexanizmlerin ózinde jámleydi.
Keyingi jılları mámleketimizde sociallıq-ekonomikalıq rawajlanıw, mámleketlik basqarıw, insan huqıqların támiyinlew, puqaralıq jámiyetin rawajlandırıw baǵdarında salmaqlı nátiyjelerge erisildi. Bul processte álbette, “Ózbekstan – 2030” strategiyası áhmiyetli derek bolıp xızmet etti. Biraq jámiyetlik turmıs hám globallıq processler turaqlı túrde jańalanıp barmaqta. Jańa ekonomikalıq sharayatlar, texnologiyalıq ózgerisler hám xalıqaralıq maydandaǵı dinamika mámleketlik siyasat aldına jańa wazıypalardı qoymaqta.
Sonlıqtan “Ózbekstan – 2030” strategiyasın házirgi real sharayat, xalıqtıń hám zamannıń talaplarınan kelip shıqqan halda jetilistiriw zárúrligi júzege kelmekte.
Jetilisip atırǵan strategiyanıń orayında mámleket basshısı tárepinen alǵa qoyılǵan tiykarǵı ideya – “Xalıq mámleketlik uyımlarǵa emes, mámleketlik uyımlar xalqımızǵa xızmet etiwi kerek” degen princip turadı. Jańa redakciyada strategiya bul ideyanı ámeliy mazmun menen bayıtıp, mámlekettiń rawajlanıwın jáne de nátiyjeli, nátiyjege baǵdarlanǵan hám esap beriwshi sistema tiykarında dawam ettiriwdi názerde tutadı.
Strategiyanı jetilistiriw procesinde onıń sheńberinde erisilgen nátiyjeler tereń tallanıp, bar mashqalalar inabatqa alınbaqta. Sonıń menen birge, maqsetlerge erisiwdi anıq ólshew imkaniyatın beretuǵın nátiyjelilik kórsetkishleri qayta kórip shıǵılmaqta. Hár bir anıq maqset ushın juwapker mámleketlik uyım belgilenip, zárúr finanslıq derekler ashıq kórsetiliwi strategiyanıń orınlanıwında juwapkershilik hám esap beriwdi kúsheytedi.
Jáne bir áhmiyetli tárepi – strategiyanıń hár bir puqara ushın túsinikli hám turmısqa say bolıwına ayrıqsha itibar qaratılmaqta. Jetilisip atırǵan “Ózbekstan – 2030” strategiyası sonday etip qáliplestirilmekte, hár bir insan onnan óziniń turmısı, shańaraǵı hám perzentleriniń keleshegi ushın qanday ámeliy payda bar ekenin kóre alıwı múmkin. Yaǵnıy, strategiya ulıwma súrenler emes, al kúndelikli turmısta sezilip atırǵan anıq ózgerisler deregi bolıwı kerek.
Strategiyada belgilengen orta múddetli maqsetlerdiń nátiyjelilik kórsetkishleri jańa ekonomikalıq, sociallıq hám texnologiyalıq shaqırıqlarǵa sáykes túrde jańalanbaqta. Sonday-aq, orınlawdı monitoring etiw sistemasın tolıq sanlastırıw arqalı ashıq-aydınlıqtı támiyinlew, qarar qabıl etiwde anıq maǵlıwmatlarǵa súyeniw hám jámiyetlik qadaǵalawdı kúsheytiw názerde tutılmaqta.
Bunnan tısqarı, taraw, tarmaq hám aymaqlardı rawajlandırıw boyınsha qabıl etilip atırǵan barlıq strategiyalıq hújjetlerdi “Ózbekstan – 2030” strategiyası menen úylestiriwge ayrıqsha itibar berilmekte. Bul mámleketlik siyasattıń bir pútinligin hám nátiyjeliligin támiyinleydi.
Eń áhmiyetli principiallıq táreplerden biri – strategiyanıń xalıq penen másláhátlesiw tiykarında jetilistiriliwi bolıp esaplanadı. Joybar jámiyetshiliktiń dodalawına qoyılıp, xalıq, ekspertler hám puqaralıq jámiyeti institutlarınıń usınısları inabatqa alınadı. Sebebi, tek jámiyetlik pikirdi ózinde sáwlelendirgen hújjet ǵana turmıslıq hám nátiyjeli bolıwı múmkin.
Juwmaqlap aytqanda, “Ózbekstan – 2030” strategiyasınıń jetilistiriliwi, bul – bar reformalardı tereńlestiriw, zaman talaplarına beyimlestiriw hám olardıń xalıq turmısındaǵı ámeliy nátiyjesin arttırıwǵa qaratılǵan izbe-iz process bolıp esaplanadı. Eń áhmiyetlisi, bul strategiya bárinen burın xalqımızdıń abadanlıǵına xızmet etetuǵın ulıwma milliy rawajlanıw baǵdarlaması sıpatında qáliplestirilmekte.

Eldor Tulyakov,
“Taraqqiyot strategiyasi” orayınıń
orınlawshı direktorı