“Google” kompaniyası “Gmail” elektron pochta xızmetine jasalma intellekt tiykarındaǵı jańa funkciyalardı qosıp, dúnyadaǵı eń ǵalabalıq platformaǵa aylandırmaqshı. Bul haqqında “Euronews” basılımı jazıp shıqtı.
Jańa imkaniyatlar arasında — “Help Me Write” (jazıwda maǵan járdem ber) funkciyası bolıp, bul qural paydalanıwshınıń jazıw usılın úyrenip, xatlardı jáne de anıq táriyiplew ushın real waqıt rejiminde usınıslar beredi. Bunnan tısqarı, “Gmail” uzın jazıwlardı qısqa mazmunǵa keltirip beriwi hám kirip kelgen xatlar tiykarında orınlanıwı kerek bolǵan jumıslar dizimin dúziwi múmkin boladı. Bul imkaniyatlardıń barlıǵı “Google”diń eń sońǵı jasalma intellekt modeli – “Gemini 3” tiykarında isleydi.
Bizge belgili, jasalma intellekt – kompyuter sistemasınıń insan pikirlewine uqsas tárizde talqılaw hám juwmaq shıǵarıw qábileti bolıp tabıladı. “Gemini 3” bolsa úlken kólemdegi maǵlıwmatlardı tez hám logikalıq qayta islewge mólsherlengen aldınǵı model esaplanadı. Dáslep bul jańalıqlar tek AQShta inglis tilinde usınıladı. “Google” olardı keyin ala basqa mámleketler hám tillerge de keńeytiwdi rejelestirmekte.
Ekspertlerdiń pikirinshe, “Gmail”ge jasalma intellekttiń tereń kirip barıwı ayırım qáweterlerdi de keltirip shıǵaradı. Nadurıs jazılǵan xatlar, shalǵıtıwshı maǵlıwmatlar yamasa paydalanıwshı sırların tallawǵa baylanıslı jekelik máseleleri usılar qatarına kiredi. “Google” barlıq maǵlıwmatlar qorǵalǵanın hám xatlar jasalma intellektti oqıtıw ushın paydalanılmaytuǵının atap ótpekte.

Musulmon Ziyo, ÓzA