Keshe Astana qalasında Túrkiy Sawda-sanaat palataları awqamınıń 3-Bas Assambleyası bolıp ótti, dep xabar bermekte Ózbekstan Sawda-sanaat palatasınıń baspasóz xızmeti.
Atap ótiliwinshe, bul májiliste Awqamǵa basshılıq birinshi márte Qazaqstanǵa tapsırılǵan. Sonday-aq, konferenciyada elimiz wákillerinen Ózbekstan Sawda-sanaat palatası baslıǵınıń keńesgóyleri Alisher Shayxov hám Jamil Maqsudi qatnastı.
Assambleya qatnasıwshıları kelesi dáwirdegi birge islesiwdiń tiykarǵı baǵdarların belgilep aldı. Atap aytqanda, sanaat kooperaciyasın kúsheytiw hám birgeliktegi joybarlardı ámelge asırıw, sonday-aq, Túrkiy investiciya qorınıń imkaniyatlarınan belsene paydalanıw tiykarǵı wazıypalar sıpatında atap ótildi. Sonıń menen birge, sawda hám texnikalıq tosqınlıqlardı qısqartıw, xalıqaralıq marshrutlar hám logistika koridorların rawajlandırıw arqalı transport-logistika baylanıslılıǵın bekkemlew de áhmiyetli tiykarǵı baǵdarlar sıpatında belgilendi.
Ózbekstan Sawda-sanaat palatası túrkiy mámleketler arasında birden-bir ekonomikalıq mákandı qáliplestiriw hám ámeliy ekonomikalıq nátiyjelerge erisiwge qaratılǵan baslamalarda belsene qatnasıwǵa tayar ekenin tastıyıqladı.
Maǵlıwmat ornında: Túrkiy sawda-sanaat palataları awqamı 2019-jılı shólkemlestirilgen bolıp, ol TMShǵa aǵza hám baqlawshı mámleketler arasında sawda, sanaat, investiciya, texnologiya hám basqa da ekonomikalıq baylanıslardı rawajlandırıwǵa qaratılǵan xalıqaralıq platforma bolıp esaplanadı. Házirgi kúnde Awqam quramına Ázerbayjan, Qazaqstan, Qırǵızstan, Túrkiya, Ózbekstan, Túrkmenstan hám Vengriya kiredi.

W.Alimov, ÓzA