“Notarial háreketlerdi videokonferencbaylanıs rejimi arqalı ámelge asırıw tártibi haqqında”ǵı reje Ádillik ministrliginde mámleketlik dizimnen ótkerildi (dizim nomeri: 3742, 05.01.2026 j.).
Reje notariuslar tárepinen fizikalıq yamasa yuridikalıq shaxstıń wákili notarial uyımǵa kelmegende aralıqtan videokonferencbaylanıs rejimi arqalı notarial háreketlerdi ámelge asırıw tártibin belgileydi.
Rejege bola, notarial háreketler videokonferencbaylanıs rejiminde E-notarius.uz málimleme portalı hám Notarius avtomatlastırılǵan málimleme sisteması arqalı tastıyıqlanadı.
Múrájat etiwshi notarial háreketti videokonferencbaylanıs rejiminde ámelge asırıw ushın elektron tarmaqtan paydalanıw shártleri menen tanısadı hám razılıǵın tastıyıqlaydı.
Múrájat etiwshi elektron tarmaqta tastıyıqlawdı sorap atırǵan notarial hárekettiń atın anıq kórsetedi hám zárúr maǵlıwmatlardı toltıradı.
Notarius múrájat kelip túsken waqıttan baslap 1 jumıs kúni ishinde onı úyrenip shıǵadı hám onda kemshilikler bar yamasa joq ekenligi haqqında xabarnama jiberedi.
Notarius penen jeke sóylesiw dawamında notarial háreket tárepleri jaylasqan orında olardan basqa shaxslar bolmawı, olar jaylasqan orın shawqımsız, jaqtı bolıwı hám videokórinis anıq kóriniwi shárt.
Notarial háreket joybarı qol qoyıw ushın tayar bolǵannan soń notarius tárepinen táreplerge olardıń huqıq hám minnetlemeleri, ámelge asırılıp atırǵan notarial hárekettiń mazmunı hám aqıbetleri túsindiriledi, -dep málimleme beredi xabar.uz saytı.

Qaraqalpaqstan xabar agentligi