Hawa sapasınıń tómenlewi boyınsha Ekologiya hám klimat ózgeriwi milliy komitetiniń rásmiy bildiriwi járiyalandı.
Atap ótiliwinshe, sońǵı kúnlerde mámleketimizde temperatura inverciyası menen baylanıslı qolaysız meteorologiyalıq sharayatlar aqıbetinde hawa sapasınıń tómenlewi baqlanbaqta. Jaǵday boyınsha Ekologiya hám klimat ózgeriwi milliy komiteti baslıǵınıń orınbasarı Iskandar Qutbiddinov maǵlıwmat berdi.
Bul hádiyse kúndizgi hám keshki hawa temperaturasınıń ayırım jaǵdaylarda 14 gradusqa shekem keskin parıqlanıwı, duman túsiwi, samal tezliginiń tómenlewi nátiyjesinde pataslandırıwshı elementlerdiń atmosfera hawasında tarqalıwın qıyınlastırmaqta.
Atap ótiliwinshe, Arnawlı komissiya óz jumısın toqtatqan joq. Ekologiyalıq jaǵday boyınsha xalıqqa turaqlı málimleme beriw menen birge tiyisli shólkemlerdiń jumısın muwapıqlastırmaqta.
Búgingi kúnde Arnawlı komissiyanıń itibarı sanaat hám xojalıq obektlerinde ekologiyalıq reydler hám qadaǵalaw ilajlarına qaratılǵan.
Qolaysız hawa-rayı sharayatında atmosfera hawasına antropogen (yaǵnıy, insan jumısı) júgin azaytıw ushın kárxanalardıń quwatlılıqları sheklenbekte hám ayırımlarınıń jumısı toqtatılmaqta.
1-7-yanvar kúnleri Tashkent qalasındaǵı 12 hám Tashkent wálayatındaǵı 22 óndirislik kárxanada tekseriwler ótkerildi hám tásirsheń ilajlar kórildi. Atmosfera hawasın pataslandırǵan onlaǵan avtotransport qurallarına hákimshilik sharalar qollanıldı.
Sonıń menen birge, profilaktikalıq ilajlar da ámelge asırılmaqta: shıǵındı derekleri ústinen monitoring kúsheytildi, atmosfera hawasınıń sapası jedel bahalanıp barılmaqta.
Qánigelerdiń tallawlarına bola, qolaysız meteorologiyalıq sharayatlar 16-17-yanvar sánesine shekem saqlanıwı kútilmekte. Antciklonlar keliwi nátiyjesinde jawın-shashın jawıwı hám samal tezliginiń artıwı menen atmosfera hawasınıń sapası normallasıwı kútilmekte.
Temperatura inverciyası qısqa múddetli hám aldınnan boljanatuǵın meteorologiyalıq hádiyse bolıp, bul dáwirde mámleketlik shólkemler kúsheytilgen rejimde jumıs alıp baradı hám pataslanıwdı jumsartıw ushın sınaqtan ótken ilajlar ámelge asırıladı.
Arnawlı komissiya tárepinen ekologiyalıq reydler hám monitoring ilajları inversiya juwmaqlanǵannan keyin de dawam ettiriledi. Kórilip atırǵan barlıq ilajlar júzege kelgen qáwip-qáterlerdi minimallastırıw hám xalıqtıń ekologiyalıq qáwipsizligin támiyinlewge qaratılǵan.
Barlıq ilajlar ilimiy tiykarlanǵan usınıslarǵa qatań ámel etken halda ámelge asırılıp kelinbekte,-dep málimleme beredi xabar.uz saytı.

Qaraqalpaqstan xabar agentligi