Qaraqalpaqstan Respublikası Ministrler Keńesiniń Baslıǵı Farxod Ermanov basshılıǵında 2025-jıl dawamında respublikamızdıń sport tarawında ámelge asırılǵan jumıslar, erisilgen jetiskenlikler hám “Prezident Olimpiadası” sport jarıslarınıń juwmaqları boyınsha taraw basshılarınıń qatnasıwında keńeytilgen májilis bolıp ótti.

Atap ótiw kerek, Ózbekstan Respublikası Prezidentiniń basshılıǵında 2025-jıl 13-fevral kúni ótkerilgen videoselektor májilisinde belgilengen tapsırmalarǵa muwapıq olimpiada sport túrleri boyınsha úsh basqıshlı “Jańa Ózbekstan Olimpiada shıńları” sport jarısların joqarı dárejede shólkemlestiriw hám usı jarıslar jeńimpazlarınıń “Prezident Olimpiadası” final basqıshında qatnasıwın támiyinlew wazıypaları belgilengen edi.

Ótkerilgen ilajda bul jarıslardı ótkeriwden tiykarǵı maqset, 2028-jılı Los-Anjeles qalasında bolıp ótetuǵın Olimpiada oyınlarına sportshılardı sistemalı hám maqsetli tayarlawdan ibarat ekeni atap ótildi.

Májilis dawamında sport federaciyalarınıń jumısları keń túrde dodalanıp, respublikamızda sporttı rawajlandırıw ushın keń imkaniyatlar hám zárúr infrastruktura jaratılǵanına qaramastan, ayırım federaciyalardıń jumısında úlken kemshilikler bar ekenligi sın kózqarastan atap ótildi.

Sonıń ishinde, 2025-jıl dawamında sportshılardıń erisken kórsetkishleri tallanǵanda, qılıshpazlıq, eskek esiw, voleybol, sport gúresleri hám hayal-qızlar gúresi, basketbol, gandbol, regbi, taekvando (WT), velosport, gimnastika, futbol, boks hám awır atletika federaciyaları tárepinen jáhán, Aziya hám xalıqaralıq jarıslarda múnásip qatnasıw, joqarı orınlardı qolǵa kirgiziw hám licenziyalar alıw boyınsha aytarlıqtay unamlı jumıslar ámelge asırılǵan.

Sonıń menen birge, ayırım sport federaciyalarınıń jumısında rejeli jumıs alıp barılmay atırǵanı, selekciya, rezerv sportshılar tayarlaw, trenerler menen islesiw hám xalıqaralıq jarıslarǵa puqta tayarlıq kóriw máseleleri jetkilikli dárejede shólkemlestirilmegeni anıqlandı.

Ilajda juwapker basshılar hám federaciya basshılarınıń esabatları tıńlanıp, tarawda ushırasıp kemshiliklerdi saplastırıw, jumıs nátiyjeliligin arttırıw hám anıq bir nátiyjege baǵdarlanǵan sistemalı jumıstı jolǵa qoyıw boyınsha anıq wazıypalar belgilendi. Sonday-aq, sport tarawında jeke juwapkershilikti kúsheytiw, hár bir federaciyadan anıq nátiyje talap etiw zárúr ekenligi qatań atap ótildi.

Májilis juwmaǵında belgilengen wazıypalardıń orınlanıwın támiyinlew boyınsha tiyisli qarar qabıl etildi.

Májiliske Qaraqalpaqstan Respublikası Joqarǵı Keńesiniń komitet baslıǵı M.Atamuratov qatnastı.

Qaraqalpaqstan xabar agentligi