8-yanvar – Ózbekstan Respublikası prokuratura uyımları xızmetkerleri kúni múnásibeti menen saltanatlı ilaj shólkemlestirildi.
Ilajda Prezidenttiń baspasóz xatkeri Sherzod Asadov mámleketimiz basshısı Shavkat Mirziyoevtiń prokuratura uyımlarınıń xızmetkerleri hám veteranlarına bayram qutlıqlawın oqıp esittirdi.
Qutlıqlawda sońǵı jılları prokuratura uyımlarınıń jumısında ámelge asırılǵan reformalar nátiyjesinde olar xalıqqa jaqın bolıp, insan qádiri, huqıqları menen erkinlikleri, nızamlı máplerin tikkeley orınlarda támiyinlep atırǵan sistemaǵa aylanǵanı ayrıqsha atap ótildi.
Atap aytqanda, ótken jılı derlik 512 mıń puqaranıń buzılǵan huqıqlarınıń tiklengeni, 54 mıńǵa shamalas múrájat, sonıń ishinde, 29 mıńǵa shamalas isbilermenniń máseleleri unamlı sheshilgeni prokuratura uyımları jumısınıń nátiyjeliligin anıq kórsetip tur.
Máhállelerde jınayatshılıqtıń aldın alıwǵa qaratılǵan sistemalı profilaktikalıq jumıslar tiykarında awır kategoriyadaǵı máhállelerdiń sanı derlik 1,5 esege azaydı. Ekonomikalıq jınayatlarǵa qarsı gúresiw baǵdarında mıńlaǵan huqıqbuzarlıqlardıń aldı alınıp, mámleket hám jámiyet máplerine jetkerilgen úlken muǵdardaǵı zıyanlar óndirildi.
Prezidentimizdiń qutlıqlawında sanlastırıw, kiberjınayatlarǵa qarsı gúresiw, tergew processlerine zamanagóy texnologiyalardı engiziw, ashıq-aydınlıqtı jáne de kúsheytiw áhmiyetli wazıypa ekeni ayrıqsha atap ótildi. Prokuratura xızmetkerleri nızam ústinligi hám ádillik tımsalı bolıwı, xalıqtıń isenimin aqlawı zárúr ekenligi atap ótilgen.
Ilajda Prezident pármanı menen orden hám medallar menen sıylıqlanǵan prokuratura xızmetkerlerine Prezident Administraciyası basshısınıń orınbasarı Nodira Hakimova usı joqarı sıylıqlardı tapsırdı.

N.Abduraimova,
ÓzA