Húrmetli taraw xızmetkerleri, húrmetli veteranlar!

Sizlerdi 8-yanvar – Ózbekstan Respublikası prokuratura uyımları xızmetkerleri kúni menen qızǵın qutlıqlayman.
Sońǵı jılları mámleketimizde barlıq taraw hám tarmaqlar qatarında prokuratura uyımlarınıń jumısında da úlken ózgerisler ámelge asırıldı. Sistema xızmetkerleri xalıqqa jaqın bolıp, insan qádirin, onıń huqıqları menen erkinliklerin, nızamlı máplerin, nızam ústinligin hám ádillikti tikkeley orınlarda támiyinley basladı.
Ásirese, olar turaqlı qabıllawlar shólkemlestirip, puqaralardıń mashqalaların sheshiwde belsene qatnaspaqta. Tek ǵana ótken jılı derlik 512 mıń puqaranıń buzılǵan huqıqları tiklengeni, 54 mıńǵa shamalas múrájat, sonıń ishinde, derlik 29 mıń isbilermenniń máselesi sheship berilgeni jumısıńızdıń nátiyjesin anıq kórsetip tur.
Qurılıs, jer resurslarınan aqılǵa uǵras paydalanıw, hayal-qızlar hám jaslardı kúsh kórsetiw hám zorlıqtan qorǵaw, janılǵı-energetika hám ekologiya baǵdarlarında, sonday-aq, kámbaǵallıqtı qısqartıw boyınsha jańa mexanizmler engizilgeni de unamlı nátiyje bermekte.
Bul haqqında sóz bolǵanda, jasırın ekonomikanı saplastırıw boyınsha kórilgen ilajlar sebepli mámleketlik byudjetke 22 trillion 300 milliard sum qosımsha túsim óndirilgeni, qurılıs tarawında byudjetten 3 trillion 900 milliard sum artıqsha qárejet jumsalıwınıń aldı alınıp, bul qarjılar qosımsha sociallıq infrastruktura obektlerin qurıwǵa baǵdarlanǵanın atap ótiw kerek.
Kriminogen jaǵdaydı tereń tallaw hám sistemalı profilaktika jumısları tiykarında máhállelerde jınayatshılıqtı saplastırıw, awır kategoriyadaǵı máhállelerdiń sanın derlik 1,5 esege azaytıwǵa erisildi.
Bas prokuratura janındaǵı Ekonomikalıq jınayatlarǵa qarsı gúresiw departamenti tárepinen ótken dáwirde 10 mıńnan aslam huqıqbuzarlıq hám jınayatqa shek qoyıldı, mámleket hám jámiyet máplerine jetkerilgen 1 trillion 800 milliard sum zıyan óndirildi, 13 mıńnan aslam shaxstıń jumısı legallastırılıp, olar isbilermen sıpatında dizimnen ótkerildi.
Huqıqtı qorǵaw akademiyasında Sanlı kriminalistika ilimiy-izertlew institutı, sonday-aq, kiberjınayatlarǵa qarsı gúresiw boyınsha arnawlı strukturanıń shólkemlestirilgeni málimleme-kommunikaciya texnologiyaları járdeminde ámelge asırılıp atırǵan hújimlerdi anıqlaw, bul tarawda maman kadrlardı tayarlawǵa xızmet etpekte.
Húrmetli taraw xızmetkerleri!
Prokuratura uyımları jumısınıń nátiyjeliligin bunnan bılay da arttırıw, sistemaǵa ilimiy qatnastı hám jumıs usılların izbe-iz engiziw, bilimli, intaker hám jankúyer maman kadrlar tayarlaw boyınsha búgin aldımızda áhmiyetli wazıypalar turǵanın sizler álbette, jaqsı túsinesiz.
Sonıń ishinde, tergew processlerin sanlastırıw arqalı insan huqıqların qorǵawdı kúsheytiwde prokuratura uyımların hám qadaǵalaw uyımı, hám tergewshilerdi tayarlaytuǵın sistema sıpatında bunnan bılay da rawajlandırıw – bul zaman talabı.
Elimizde korrupciyaǵa qarsı gúresiw jańa basqıshqa kóterilip atırǵan házirgi dáwirde prokuratura jumısında ashıq-aydınlıqtı jáne de kúsheytiw, sizler xızmet etip atırǵan sistemada hám basqa da tarawlarda bul illetke shek qoyıwda hár bir xızmetker úlgi bolıwı kerek. Sebebi elimiz prokuratura uyımlarınıń xızmetkerleri tımsalında nızam saqshıları hám ádillik qorǵawshıların kóredi.
Sizler bunday múnásibetti qádirlep, xalqımızdıń isenimin aqlaw ushın bunnan bılay da shın kewilden miynet etesiz, dep isenemen.
Bársheńizdi kásiplik bayramıńız benen jáne bir márte qutlıqlap, sizlerge bekkem densawlıq, oǵada juwapkershilikli jumısıńızda tabıs hám áwmetler, shańaraqlarıńızǵa tınıshlıq hám qut-bereket tileymen.

Shavkat Mirziyoev,
Ózbekstan Respublikası Prezidenti