Taw-kán sanaatı hám geologiya ministrligi málimleme xızmetiniń maǵlıwmatına bola, Qıtaydıń Xalıqaralıq biznes hám ekonomika universitetinde (UIBE) Tashkenttegi Piza universiteti filialı hám “Ózbekstan texnologiyalıq metallar kombinatı” AJ wákilleri arasında ushırasıw bolıp ótti.
Ushırasıw dawamında tárepler arasında keleshektegi birge islesiw perspektivaları, aldınǵı bilimlendiriw texnologiyaların engiziw hám studentler ushın qospa akademiyalıq baǵdarlamalardı shólkemlestiriw máseleleri hár tárepleme dodalandı. Sonday-aq, joqarı bilimlendiriw tarawında tájiriybe almasıw hám professor-oqıtıwshılar ushın qánigelik arttırıw baǵdarlamaları boyınsha da pikir alısıldı.
Sóylesiwler nátiyjesinde “Xalıqaralıq sawda” hám “Biznesti basqarıw” baǵdarlarında “1+3” qospa bilimlendiriw baǵdarlamasın ashıw boyınsha kelisimlerge erisildi. Bul baǵdarlama studentlerge birinshi jıldı Tashkenttegi Piza universiteti filialında oqıw imkaniyatın beredi, keyingi úsh jılda bolsa olar UIBE universitetinde ilimiy hám ámeliy bilim aladı. Bul birge islesiw tek ǵana studentler ushın emes, al eki mámlekettiń joqarı bilimlendiriw sistemaları ushın da áhmiyetli qádem bolıp esaplanadı.
Ózbekstan delegaciyasınıń Qıtayǵa etken bul ámeliy saparı eki mámleket arasındaǵı akademiyalıq baylanıslardı bekkemlew hám zamanagóy xalıqaralıq bilimlendiriw baǵdarlamaları ushın jańa imkaniyatlar jaratıwda ayrıqsha áhmiyetke iye ekenin atap ótiw kerek.

N.Ziyodullaeva, ÓzA