Keshe Saudiya Arabstanında futbol boyınsha U-23 Aziya kuboginde 1-tur oyınları óz juwmaǵına jetti.

«S» toparında Qubla Koreya, Iran hám Livan saylandı komandaları menen kelesi basqısh jollamasın qolǵa kirgiziw ushın gúreske kirisken Ózbekstan Olimpiya saylandı komandası, óziniń turnirdegi dáslepki ushırasıwın Livan saylandı komandasına qarsı ótkerdi.
Qızıqlı ótken oyınnıń birinshi taymınıń dáslepki minutlarında Livan saylandı komandası ústemlik etken bolsa, 20-minutlarında Ravshan Haydarov shákirtleri kóbirek qáwipli hújimler shólkemlestirdi hám usınday hújimlerdiń birin Amirbek Saidov nátiyjeli juwmaqladı.
Al, ekinshi taymnıń bası futbolshılarımız ushın oǵada áwmetli kelip, 50-minutta Ravshan Xayrullaev, 58-minutta Sardor Bahromov Livan dárwazasın eki márte anıq nıshanǵa alıwǵa eristi. Esap 3:0.
Bunnan soń Livan saylandı komandası quramına jańadan 3 futbolshı maydanǵa túsirildi hám bul ózgerisler óziniń unamlı nátiyjesin kórsetti. Atap aytqanda, ushırasıwdıń 65 hám 90+5 minutlarında Leonardo Shahin jerlesimiz Samandar Muratbaev qorǵap atırǵan dárwazaǵa eki márte gol urıwǵa eristi.
Solay etip oǵada qıyın ótken oyın Ózbekstan saylandı komandası paydasına sheshildi hám komandamız óziniń dáslepki 3 upayına iye boldı.
Al, usı topardaǵı Iran hám Qubla Koreya saylandı komandaları arasındaǵı ekinshi oyında bolsa, esap 0:0 esabı menen juwmaqlandı.
Endi komandamız aǵzaları 2-turda Iran saylandı komandasına qarsı oyınǵa túsedi.

Adilbay Orazov,
Qaraqalpaqstan xabar agentligi sholıwshısı