Baslamalı byudjet processiniń 2025-jıl ekinshi máwsiminde Bozataw posyolkalıq puqaralar jıyını aymaǵındaǵı “Qaraqalpaqstannıń 60-jıllıǵı”, “Talwas”, “Almazar”, “Q.Awezov”, “Erkin jaǵısı”, “I.Yusupov” hám “Shámenzar kósheleriniń turǵınları ózleriniń kóshelerin asfaltlaw joybarın jeńip alǵan edi.

Ótken dáwir ishinde, usı atı kórsetilgen kóshelerdegi gedir-budır, oylı-bálent jollar tegislenip, “Qaraqalpaqstannıń 60-jıllıǵı”, “Talwas”, “Almazar» kósheleri tolıq asfaltlandı.
Al, “Q.Awezov”, “Erkin jaǵası”, “I.Yusupov” hám “Shámenzar kóshelerinde bolsa, bul jumıslar ele dawam etpekte. Qıstıń kúni bolıwına qaramastan házirgi kúnleri pidayı jolshılar tárepinen arnawlı texnikalar járdeminde bul kóshelerge щeben jayıw hám olardı tegislew jumısları alıp barılmaqta.
Álbette, xalıq iygiligi ushın islenip atırǵan bul jumıslar aymaq turǵınlarınıń múshkilin jeńilletip, olardıń erteńgi kúnge degen isenimin bekkemlemekte.

Adilbay Orazov,
Qaraqalpaqstan xabar agentligi sholıwshısı