Qırǵızstan Prezidenti haqqındaǵı hújjetli filmde Sadir Japarov qırǵız-tájik shegarasındaǵı keskin jaǵdayǵa toqtap, óz-ara kelisimge keliwde Ózbekstan Prezidenti Shavkat Mirziyoevtiń másláháti hám salmaqlı diplomatiyalıq kózqarası áhmiyetli bolǵanın atap ótti.

“Sammitlerde hám ushırasıwlarda birinshi bolıp Tájikstan basshısına “Keliń, otırıp shegara máselesin sóylesip alayıq,” dep ayttım. Dáslep ol buǵan kelisim bermedi. Ekinshi márte ushırasqanımızda bolsa Tájikstan tárepi shegara máselesin dodalawǵa kelisim bildirdi.
Usı jerde ayrıqsha atap ótiwim kerek, bunda Ózbekstan prezidenti Shavkat Mirziyoevtiń roli júdá úlken boldı. Ol adam “mashqalalardı házir, usı jerdiń ózinde sheshiw kerek, keyin imkaniyat bolmawı múmkin. Kelisimge keliw zárúr,” dep másláhát berdi. Sonnan keyin eki basshı bir stol átirapında otırıp, shegara mashqalasın sheshtik,” – deydi Qırǵızstan prezidenti.
Filmde, sonday-aq, Qırǵızstan sırtqı isler ministri Jeenbek Kulubaev ta áhmiyetli faktlerdi ashıp berdi.
Onıń sózlerine bola, Prezident Mirziyoev eger kelispewshilik saplastırılmasa, regionǵa sırt el investiciyalarınıń kelmewi, turistler aǵımı toqtawı hám ekonomikalıq rawajlanıw izden shıǵıwı haqqında qatań eskertken. Bolmasa, Oraylıq Aziya elege shekem “artta qalǵan region” sıpatında qabıl etiletuǵının atap ótken.
“Sırttan qaraǵanda barlıq mámleketlerdiń atı “-stan” menen tamam bolǵanı ushın olardı birdey, bárqulla tartıslı aymaq sıpatında qabıl etedi,” degen edi Ózbekstan basshısı,” – dep esleydi Kulubaev, – dep málimleme beredi xabar.uz saytı.

Qaraqalpaqstan xabar agentligi