Ózbekstan Qurallı Kúshleri dúzilgeniniń 34 jıllıǵı hám Watan qorǵawshıları kúni aldınan Nókis qalasındaǵı áskeriy bólimlerdiń birinde “Ásker anaların qádirleymiz!” súreni astında ruwxıy-aǵartıwshılıq ilaj ótkerildi.

Ushırasıwda Ózbekstan Respublikası MQX Shegara áskerleri quramındaǵı áskeriy bólimlerde xızmet etip atırǵan múddetli áskeriy xızmetkerler hám barlıq wálayatlardan videokonferencbaylanıs túrinde onlayn qatnasıp atırǵan ata-analar qatnastı.
Ushırasıwda jigitlik minnetin ótep atırǵan áskerler óz ata-anaları hám jaqınları menen real waqıtta ekran arqalı diydarlasıw baxtına miyasar boldı.
Ilaj tolqınlandırıwshı hám quwanıshlı waqıtlarǵa bay boldı. Toǵız aydan berli júzlep shaqırım alısta el qorǵawshısı degen maqtanıshlı ataqqa múnásip ullar qatarında áskeriy xızmetti ótep atırǵan perzentin onlayn bolsa da, kórip quwanǵan analardıń kózlerinde quwanısh.
Qaraqalpaqstandaǵı, Ferǵana hám Qashqadárya wálayatındaǵı áskerler ata-anaları hám jaqınlarına áskeriy xızmettegi sharayatlar haqqında aytıp, erisip atırǵan jetiskenliklerin maqtanısh etti.

Qaraqalpaqstan xabar agentligi