Qaraqalpaqstan Respublikası sudınıń gezektegi Prezidium májilisinde birinshi márte sudyalıq lawazımına tayınlanǵan sudyalardıń ant qabıl etiw máresimi ótkerildi.

Májiliste Qaraqalpaqstan Respublikası Joqarǵı Keńesiniń 2026-jıl 1-yanvar kúngi Prezidium qararı menen sudyalıq lawazımında bolıwdıń birinshi bes jıllıq múddetine tayınlanǵan Qaraqalpaqstan Respublikası puqaralıq isleri boyınsha Qońırat rayonlar aralıq sudınıń sudyası G.Abıniyazova hám puqaralıq isleri boyınsha Shımbay rayonlar aralıq sudınıń sudyası S.Opaevalar ant qabıl etti.
Máresimde Qaraqalpaqstan Respublikası sudınıń baslıǵı K.Tarixov shıǵıp sóylep, sudyalar korpusına jańadan qosılıp atırǵan wákillerge hám Qaraqalpaqstan Respublikası Joqarǵı Keńesiniń Prezidiumı qararı menen sudyalıq wákilligi múddeti dáwirine Qaraqalpaqstan Respublikası sudınıń ekonomikalıq isler boyınsha sudyası lawazımına tayınlanǵan D.Davletovqa da isenim bildirip, olarǵa ádil sudlawdı ámelge asırıwday mashaqatlı, sonıń menen birge, juwapkershilikli jumısında tabıslar tiledi. Sudlarda uzaq jıllardan berli dawam etip kiyatırǵan «Ustaz-shákirt» dástúri tiykarında jańa wákillerge tájiriybeli sudyalar ustaz etip biriktirildi.
Ilajda qatnasqan sudyalar hám basqalar jańa sudyalarǵa eń jaqsı tileklerin bildirdi. Óz gezeginde, jańadan sudyalar korpusına wákil bolǵanlar bildirip atırǵan isenimdi aqlawǵa, tek ǵana nızam tiykarında ádil qarar shıǵarıwǵa, bunıń ushın ózleriniń bar bilim hám tájiriybesin ayanbay jumsawǵa wáde etti. Ant qabıllaǵan sudyalarǵa Ózbekstan Respublikası Konstituciyası hám “Sudyalar ádebi” kitabı sawǵa etildi.

Qaraqalpaqstan xabar agentligi