Qaraqalpaqstan Respublikasında ulıwma bahası 3,5 milliard AQSh dolları muǵdarında “Modulli intellektuallıq esaplaw orayın qurıw boyınsha Háreketler rejesi”ne qol qoyılǵan bolıp, bul joybar eki basqıshta ámelge asırılıwı belgilengen. Usı hújjette názerde tutılǵan wazıypalardıń orınlanıwın támiyinlew maqsetinde, joybar sheńberinde gezektegi ushırasıw bolıp ótti.

Qaraqalpaqstan Respublikası Ministrler Keńesiniń Baslıǵı Farxod Ermanov Qıtay Xalıq Respublikasınıń jasalma intellekt, úlken maǵlıwmatlar hám superkompyuter sistemaları sheshimlerine qánigelesken “Shanghai LinkWise Data Intelligence Co., Ltd.” kompaniyasınıń baslıǵı Vang Suyxu basshılıǵındaǵı delegaciya menen ushırastı.
Ushırasıw dawamında modulli intellektuallıq esaplaw orayın qurıw joybarınıń texnikalıq-ekonomikalıq tárepleri, zamanagóy joqarı nátiyjeli esaplaw infrastrukturasın jaratıw, sonday-aq, jasalma intellekt hám sanlı texnologiyalardı rawajlandırıwdıń tiykarǵı baǵdarları dodalandı. Tárepler joybar sheńberinde ámelge asırılatuǵın jumıslar hám investiciya kólemi boyınsha pikirlesti.
Ótkerilgen ilaj dawamında joybar sheńberinde belgilengen aymaqlarǵa shıǵıp, qurılıs ushın rejelestirilgen maydanlardıń jaǵdayı úyrenilip, bul jerlerdiń infrastrukturalıq támiynatı, logistika imkaniyatları hám texnikalıq talaplar bar ekenligi kózden ótkerildi.
Sonı aytıp ótiwimiz kerek, bul áhmiyetli joybardıń ámelge asırılıwı menen oraydı qurıw, iske túsiriw hám ekspluataciyalaw basqıshlarında qosımsha jumıs orınları jaratıladı. Sonıń menen birge, joqarı tájiriybeli IT-qánigeler, injenerler hám izertlewshilerdi tayarlaw jáne tartıw, regionallıq bilimlendiriw infrastrukturasın rawajlandırıw ushın zárúr sharayatlar jaratıladı.
Bul joybar Qaraqalpaqstan Respublikası hám ulıwma Ózbekstan Respublikası ushın Oraylıq Aziyada sanlı ekonomikanı rawajlandırıw, texnologiyalıq erkinlikti arttırıw hám xalıqaralıq birge islesiwdi bekkemlew jolındaǵı áhmiyetli baslamalardan biri bolıp esaplanadı.

Qaraqalpaqstan xabar agentligi