Oliy Majlis Nızamshılıq palatasındaǵı siyasiy partiyalar frakciyalarınıń 2026-jıldaǵı birinshi májilisleri bolıp ótti.

Májilislerde frakciyalardıń Prezident Múrájatınan kelip shıǵatuǵın wazıypaları belgilenip, bir qatar áhmiyetli nızam joybarları qızǵın dodalandı.

Atap aytqanda, Ózbekstan Ekologiyalıq partiyası frakciyasınıń májilisinde qorǵaw xızmetleriniń jumısına baylanıslı nızam joybarı kórip shıǵıldı.
Atap ótilgenindey, Milliy gvardiya Qorǵaw bas basqarması hám onıń aymaqlıq bólimleri ishki isler uyımlarınıń qaramaǵına ótkerilgeni hám Ishki isler ministrligi janındaǵı Qorǵaw departamenti etip qayta shólkemlestirilgeni múnásibeti menen bir qatar nızamlarǵa ózgerisler hám qosımshalar kirgizilmekte.
Bul nızam joybarı menen Ózbekstan Respublikasınıń Hákimshilik juwapkershilik haqqındaǵı kodeksine kirgizilip atırǵan ózgerislerge bola Qorǵaw bas basqarması tárepinen kórip shıǵıw wákilligine tiyisli bolǵan hákimshilik huqıqbuzarlıqlar endi Ishki isler ministrligi Qorǵaw departamentiniń juwapker xızmetkerleri tárepinen kórip shıǵılatuǵını belgilenbekte.
Nızam joybarınıń qabıl etiliwi ámeldegi nızamshılıq hújjetleriniń sistemalastırılıwına alıp keledi. Sonday-aq, huqıqtı qollanıw ámeliyatında júzege keliwi múmkin bolǵan mashqalalardıń aldın alıw hám qorǵaw xızmetleriniń sapasın jańa basqıshqa kóteriwge jáne obektlerdiń qamtıp alıwın keńeytiwge xızmet etedi.
Dodalawlarda frakciya aǵzaları óz pikir-usınısların bildirdi hám juwmaǵında tiyisli qararlar qabıl etildi.

Muhtarama Komilova, ÓzA