Múnásibet

Keyingi jılları Ózbekstanda mámleketlik basqarıwda ashıq-aydınlıq hám jámiyetshilik penen nátiyjeli baylanıslar jańa basqıshqa kóterilmekte.

Usı processte Prezident Administraciyası basshısı Saida Mirziyoevanıń “Alter Ego YouTube ” kanalına bergen keń kólemli intervyu tek ǵana sociallıq tarmaqlarda emes, al mámlekettiń siyasiy hám jámiyetlik turmısında jáne xalıqaralıq maydanda da ayrıqsha waqıya sıpatında tán alınbaqta.
Bul intervyu Ózbekstan siyasiy ámeliyatında siyrek ushırasatuǵın hádiyse sıpatında joqarı lawazımlı mámleketlik ǵayratkerdiń ashıq, jeke hám analitikalıq múnásibetke tayar ekenligin kórsetedi. Sonıń menen birge, ol jámiyetshilik penen konstruktivlik dialog ornatıw, mámleketlik siyasattı túsindiriw hám puqaralardıń áhmiyetli máselelerge baylanıslı pikirlerin tıńlawǵa bolǵan tereń itibardı sáwlelendiredi. Sonıń menen birge, ol jámiyetshilik penen konstruktivlik dialog ornatıw, mámleketlik siyasattı túsindiriw hám puqaralardıń áhmiyetli máselelerge baylanıslı pikirlerin tıńlawǵa bolǵan tereń itibardı sáwlelendiredi. Bul sáwbet tek ǵana professional siyasiy tájiriybe emes, al milliy mápler hám zamanagóy demokratiyalıq qádiriyatlardı muwapıqlastırıwǵa qaratılǵan qızǵın baslama sıpatında tán alınadı.
Intervyudiń oraylıq ideyalarınan biri Prezident Administraciyası basshısı Saida Mirziyoevanıń “Men, bárinen burın, xızmetkermen”, degen sózlerinde sáwlelendi. Bul gáp ápiwayı ańlatpa emes, al búgingi Ózbekstan mámleketlik basqarıw filosofiyasınıń tiykarǵı mánisin ashıp beretuǵın princip sıpatında qabıl etiledi. Bul kózqaras lawazımdı jeńillik yamasa jeke abıray sıpatında emes, al xalıq aldındaǵı xızmet hám joqarı dárejedegi juwapkershilik sıpatında talqılawǵa shaqıradı.
Ásirese, jámiyette mámleketlik sistemaǵa bolǵan talap hám sorawlar barǵan sayın artıp atırǵan búgingi dáwirde bunday poziciya jámiyetshiliktiń isenimin bekkemleytuǵın áhmiyetli signal sıpatında tán alındı. Bul tek ǵana siyasiy jetekshiliktiń juwapkershiligin emes, al mámleketlik xızmetkerlerdiń puqaralar menen ashıq hám qızǵın sóylesiwge tayar ekenligin de ayqın kórsetedi.
Intervyude Saida Mirziyoeva jumıs tájiriybesi, basshılıq mektebi hám qarar qabıl etiw mádeniyatına ayrıqsha itibar qaratadı. Bul jerde itibarlı tárepi sonda, sáwbet dawamında jeke múnásibetlerga qaraǵanda institucionallıq pikirlew, yaǵnıy sistema, strategiya hám teń salmaqlı qararlar ústinligi atap ótiledi.
Bul kózqaras mámleketlik basqarıwda “bir shaxsqa baylanıslı model”den áste-aqırın institucionallıq turaqlılıqqa qaray ilgerilew procesin ayqın kórsetedi. Bul bolsa tek ǵana sistemalı basshılıqtıń áhmiyetin emes, al mámleketlik siyasattıń úzliksizligi hám strategiyalıq rejelestiriwdiń áhmiyetin sáwlelendiredi.
Sonıń menen birge, Prezident Administraciyası basshısınıń bul pikirleri jámiyette isenim hám turaqlılıqtı bekkemlewshi áhmiyetli signal sıpatında qabıl etiledi.
Saida Mirziyoevanıń “Reformalar endi baslandı”, degen ashıq-aydın tán alıwı áhmiyetli siyasiy realizm hám juwapkershiliktiń úlgisi bolıp esaplanadı. Bul pikir jámiyetke hádden tısqarı optimistlik yamasa júzeki bahalardan waz keship, bar mashqalalarǵa ashıq hám tereń qaraw zárúrligin esletedi.
Onıń atap ótiwinshe, reformalar quramalı, kóp basqıshlı process bolıp, ásirese, suw resursları, bilimlendiriw, densawlıqtı saqlaw, isbilermenlik hám sud-huqıq sistemasında nátiyjege erisiw tez emes, al puqta, sistemalı hám basqıshpa-basqısh qatnas jasawdı talap etedi. Bul qatnas mámleketlik siyasatta juwapkershilikli hám turaqlı strategiyanı ámelge asırıwǵa xızmet etedi, jámiyetshilikti bolsa reformalardıń mánisi hám dawamlılıǵı menen tanıstıradı.
Intervyudegi eń áhmiyetli pikirlerden biri sud sistemasına berilgen baha boldı. Saida Mirziyoevanıń sud-huqıq sistemasısız basqa tarawlardaǵı reformalar nátiyje bermeytuǵını haqqındaǵı kózqarası búgingi Ózbekstan ushın principial siyasiy áhmiyetke iye.
Bul qatnas ádillikti tek ǵana súren sıpatında emes, al bekkem institut sıpatında qurıwǵa bolǵan qatań siyasiy erk-ıqrar hám juwapkershilikti kórsetedi. Sonıń menen birge, sud sistemasınıń turaqlılıǵı hám nátiyjeliligi mámleketlik basqarıwdaǵı reformalardıń tiykarǵı tayanıshı ekenin jámiyetshilikke jetkeredi.
Intervyu dawamında hayal basshı sıpatında dus kelip atırǵan qıyınshılıqlar máselesi de ashıq dodalandı. Saida Mirziyoeva bul temada orın alǵan mashqalalardı biykarlamaydı, biraq olardı sheklew sıpatında emes, al jeke hám kásiplik rawajlanıw imkaniyatı sıpatında qabıl etedi.
Bul poziciya Ózbekstan jámiyetinde hayal-qızlardıń mámleketlik basqarıwdaǵı rolin jáne de kúsheytiwge xızmet etetuǵın áhmiyetli sociallıq signal sıpatında tán alınadı. Sonıń menen birge, ol jámiyette hayal jetekshilerdiń mamanlıǵı, pidayılıǵı hám strategiyalıq qarar qabıl etiw qábileti mámlekettiń rawajlanıwına sheksiz úles qosatuǵının kórsetedi.
Saida Mirziyoeva bergen bul intervyu ápiwayı mediada shıǵıp sóylew sıpatında emes, al mámleket hám jámiyet arasındaǵı qarım-qatnas mádeniyatın jańa basqıshqa alıp shıǵıwǵa qaratılǵan áhmiyetli siyasiy waqıya sıpatında qabıl etiledi.
Onda ashıq-aydınlıq, juwapkershilik hám insan mápin ústin qoyıw principleri ayqın kórindi.
Bul intervyu Ózbekstan siyasiy procesinde joqarı lawazımlı basshılar menen ashıq sóylesiwler ámeliyatın keńeytiw zárúr ekenligin kórsetti hám jámiyette pikir almasıw ushın áhmiyetli maydan jarattı. Sonıń menen birge, ol mámleketlik basqarıwda ashıq-aydınlıq, strategiyalıq rejelestiriw hám puqaralar menen nátiyjeli qarım-qatnastıń ústinligin ámelde dálilleydi.

ÓzA