Qádirli watanlaslarım!

Siz, ázizlerdi, kóp milletli pútkil xalqımızdı kirip kiyatırǵan jańa 2026-jıl menen shın júrekten qutlıqlayman.

Ótip baratırǵan jıl xalqımız turmısında úlken ózgerisler, erteńgi kúnge bekkem isenim hám úlken nátiyjeler jılı boldı.

Dúnyadaǵı qıyın jaǵdayǵa qaramastan, biz óz aldımızǵa qoyǵan barlıq maqset hám sheklerge eristik. Ózbekstannıń jalpı ishki óniminiń kólemi birinshi márte 145 milliard dollardan astı hám mámleketimiz orta dáramatlı mámleketler qatarındaǵı ornın bekkemledi.

Ekonomikalıq ósiw nátiyjesi adamlarımızdıń turmısında, shańaraqlardıń dáramatında, máhállelerdiń kelbetinde, jaslarımızdıń keleshekke bolǵan iseniminde ayqın kórinbekte.

Ótip baratırǵan jılda hár bir shańaraq, hár bir shańaraqta quwanıshlar, baxıtlı demler kóp boldı.

Jańa úyge kóship kirgen, óz biznesin jolǵa qoyǵan yamasa keńeyttirgen, dáramatı artqan, ilim, sport, mádeniyat hám basqa da tarawlarda ózi yamasa perzentleriniń jetiskenliklerinen quwanǵan millionlaǵan shańaraqlardıń quwanıshı 2026-jıldaǵı maqsetlerimizge erisiw jolında bizge, álbette, úlken kúsh beredi.

Áziz watanlaslarım!

Biz kelesi jılı da hár bir shańaraqtıń baxıtlı, abadan hám salamat turmıs keshiriwi, jaslarımızdıń sapalı bilim alıwı, keleshek kásiplerin iyelewi hám sport penen turaqlı shuǵıllanıwı ushın jańadan-jańa imkaniyatlardı iske qosamız!

Biz 2026-jıldı «Máhálleni rawajlandırıw hám jámiyetti ilgeriletiw jılı» dep járiyaladıq.

Jańa jılda mıńlaǵan máhállelerdiń infrastrukturasın jaqsılap, olarǵa Jańa Ózbekstan kórinisin alıp kelemiz.

Barlıq ekonomika tarmaqların texnologiyalıq hám innovaciyalıq ósiw modeline ótkeremiz. Xalqımızdıń dáramatın hám satıp alıw qábiletin arttırıw jumısların jáne de jedellestiremiz.

Xalıqtıń járdemge mútáj qatlamları, húrmetli kekselerimiz, qádirli hayal-qızlarımız hám náwqıran jaslarımızdı qollap-quwatlawdı keńeytemiz.

Ekologiyanı jaqsılaw, «jasıl» energetikanı rawajlandırıw hám suw resurslarınan aqılǵa uǵras paydalanıw boyınsha tásirsheń ilajlardı dawam ettiremiz.

Bir sóz benen aytqanda, jańa 2026-jılda da barlıq reformalarımız, háreketlerimiz adamlarımızdıń jaqsı jasawı hám biznes ushın eń qolaylı sharayatlardı jaratıwǵa qaratıladı.

Tájiriybeli máhálle baslıqları hám belsendileri, zıyalılar, isbilermenlerimiz, kúsh-ǵayratlı jaslarımız, keń jámiyetshiligimiz, hár bir watanlasımız bul ullı islerge múnásip úles qosadı, dep isenemen!

Áziz watanlaslarım!

Jańa jıl aldınan hár bir shańaraq jaqsı niyetler etedi, hár bir insannıń kewlinde jarqın arzıw-niyetler payda boladı.

Hár birimizdiń pák niyetlerimiz, iygilikli maqsetlerimiz 2026-jılı álbette ámelge assın!

Jańa jıl hár bir shańaraqqa saw-salamatlıq, baxıt-ıǵbal, qut-bereket, elimizge joqarı rawajlanıw, tınıshlıq-tatıwlıq alıp kelsin!

Jaratqan Iyemiz Watanımızdı saqlasın, xalqımızdıń turmısın bunnan bılay da jaqsılaw jolındaǵı jumıslarımızda mádetkar bolsın!

Jańa jıl bárshemizge múbárek bolsın, ázizlerim!

 

Shavkat MIRZIYOEV,

Ózbekstan Respublikası Prezidenti