Prezident Shavkat Mirziyoev 30-dekabr kúni Jańa Tashkentte ámelge asırılıp atırǵan dóretiwshilik jumısları, sonıń ishinde, jol-transport infrastrukturası, energetika, turaq-jay, bilimlendiriw hám basqa da obektler qurılısınıń barısı menen tanıstı.

Mámleketimiz basshısı dáslep jer astı avtomobil turıw ornı hám piyadalar ótiw jolın qurıw jumısların kózden ótkerdi.
Qurılıs maydanı 40 mıń kvadrat metrden ibarat, bahası 100 million dollar bolǵan bul avtomobil turatuǵın orında birinshi basqıshta 200 jeńil avtomobil jáne 30 motocikl hám skuterlerdi jaylastırıw imkaniyatı boladı. Tórt tárepleme qolaylı hám qáwipsiz háreketleniw ushın piyadalar jolı qurıladı.
Bul jerde avtomatlastırılǵan parkovka sistemaları, velosipedlerdi ijaraǵa beriw punktleri shólkemlestirilip, elektromobillerdi zaryadlaw ushın stanciyalar da qurıladı. Bul avtomobil turıw ornın 2026-jılı paydalanıwǵa tapsırıw rejelestirilgen.
Prezidentimiz bunday zamanagóy avtomobil turıw orınların kóbeytiw, olar xalıq ushın maksimal dárejede qolaylı bolıwın támiyinlew, keleshekte elektromobillerdiń úlesi artıwın esapqa alıp, olardı quwatlaw infrastrukturasın bunnan bılay da rawajlandırıw boyınsha kórsetpeler berdi.
Jańa Tashkentte ministrlikler hám uyımlardıń jumısın shólkemlestiriw ushın hákimshilik imaratlar qurılmaqta.
Sonıń ishinde, Qurılıs hám turaq jay kommunallıq xojalıǵı ministrliginiń modul túrindegi jańa imaratı qurılǵan.
1,4 gektar jer maydanında ulıwma maydanı 5751 kvadrat metrdi quraytuǵın 5 bir qabatlı jeńil metall konstrukciyalı, bazalt qaplamalı sendvich panellerden ibarat imaratlar qurıldı.
Bul imarat ministrliktiń oraylıq apparatı hám sistemadaǵı shólkemlerdi bir orında jaylastırıw imkaniyatın berip, mákemeler arasındaǵı birge islesiw hám jumıs processleriniń nátiyjeliligin arttıradı.
Jeńil konstrukciyalar hám energiya únemlewshi sendvich paneller, erkin aqaba sisteması, nátiyjeli oraylasqan ısıtıw, suwıtıw hám ventilyaciya sisteması usı imarattıń ekspluataciya qárejetlerin azaytıw, keleshekte onı keńeytiw yamasa demontajlaw imkaniyatın beredi hám tez beyimlesiwsheńligin támiyinleydi.
Búgingi kúnde jańa imaratta ministrliktiń oraylıq apparatı hám sistemadaǵı shólkemlerde jumıs alıp barıp atırǵan jámi 550 xızmetker jumıs islemekte.
Qurılıs hám turaq jay kommunallıq xojalıǵı ministrligi janındaǵı Málimleme-kommunikaciya texnologiyaların rawajlandırıw respublikalıq orayı da usı imaratta jaylasqan.
Házirgi waqıtta oray tárepinen “Ashıq qurılıs” milliy málimleme sisteması tiykarında bir qatar platformalar iske qosılǵan.
Mámleketimiz basshısına platformalardıń jumısı haqqında maǵlıwmat berildi.
Atap aytqanda, “Ózbekstan Respublikası mámleketlik qala qurılısı kadastrı” geografiyalıq málimleme sistemasında qala hám rayonlardıń aymaqlarına baylanıslı barlıq sociallıq-ekonomikalıq maǵlıwmatlar birden-bir sanlı bazaǵa jámlendi. Geoportal arqalı elatlı punktlerdiń 3D formattaǵı “sanlı egizekleri” jaratıldı, rekonstrukciya hám renovaciya zonaları belgilenip, aymaqlardı kompleksli tallaw imkaniyatı jaratıldı.
Bas rejelerdi islep shıǵıw hám jámiyetlik dodalawdan ótkeriw, sonday-aq, olar tiykarında qurılısqa ruqsat beriwshi hújjetlerdi rásmiylestiriw processleri tolıq sanlastırıldı.
Búgingi kúnge shekem 20 qala, 22 posyolka, 843 rayon elatlı punktleriniń sanlı bas rejeleri islep shıǵılıp, geoportalǵa jaylastırıldı.
“Reyting” elektron platformasında qurılıs-jumıstı bólip alıp islewshi shólkemlerdiń jumısın bahalaw avtomatlastırıldı. “Tender” elektron platforması ministrlikler hám uyımlardıń elektron sistemaları menen integraciya etildi. “Qurılıs tarawında mámleketlik xızmetlerdi kórsetiw” elektron platformasınıń jańa versiyası islep shıǵılıp, qurılıs tarawındaǵı barlıq 9 xızmet qamtıp alındı.
“Joybarlaw-smeta hújjetlerin ekspertizadan ótkeriw”, “Qurılısta mámleketlik qadaǵalaw”, “Meniń úyim”, “Meniń aymaǵım”, “Jıllılıq támiynatı billing sisteması” sıyaqlı bir qatar platformalar da jumıs alıp barmaqta.
Sistemanı bunnan bılay da jetilistiriw, obektiv etiw boyınsha juwapkerlerge tapsırmalar berildi.
Mámleketimiz basshısı bul jerde jas qánigeler menen sáwbetlesti.
– Keshegi bilim menen búgin úlken nátiyjelerge erisiw qıyın. Onıń ushın hár kúni izleniw, anıq pánler, atap aytqanda, málimleme texnologiyaların jaqsı úyreniw kerek, bul qurılıs tarawında da júdá áhmiyetli, – dedi Prezidentimiz.
Bunnan soń mámleketimiz basshısı Jańa Tashkenttegi “Sharq bahori” turaq jay kompleksiniń qurılıs maydanına bardı.
Prezidentiimiz Oliy Majlis hám xalqımızǵa Múrájatında atap ótkenindey, bıyılǵı jılı 8 million 100 mıń kvadrat metr kóp qabatlı turaq jaylar qurılıp, xalıqqa tapsırılmaqta. Ulıwma, sońǵı toǵız jılda 210 million kvadrat metr turaq jay hám turaq jay emes obektler paydalanıwǵa tapsırıldı.
Jańa Tashkentte de keń kólemli turaq jay qurılısı baslap jiberilgen. Birinshi basqıshta 600 mıń xalıq ushın zamanagóy infrastruktura qurılıwı belgilengen. Joybar tolıq juwmaqlanǵanda bolsa Jańa Tashkent 2 million xalıq jasaytuǵın úlken megapoliske aylanadı.
Olardıń turaq jayǵa bolǵan talabın támiyinlew baǵdarındaǵı birinshi qádem “Sharq bahori” turaq jay kompleksi bolıp esaplanadı. Kompleks regionımızdaǵı eń iri turaq jay joybarlarınan biri bolıp esaplanadı. 95 gektar aymaqta 15 mıńǵa shamalas kvartiradan ibarat kóp qabatlı turaq jaylar qurıladı.
Búgingi kúnge shekem bul jerde 18 million kvadrat metrden aslam qurılıs jumısları orınlandı. Onda “A+” energiyanı únemlew kategoriyasındaǵı zamanagóy materiallar qollanılmaqta.
Komplekste 15 mıńnan aslam terek hám nállerden ibarat jasıl aymaq shólkemlestiriw de rejelestirilgen. Sonday-aq, avtonom ısıtıw hám suwıtıw sistemaları boladı, tóbe bólimleri tolıq quyash panelleri menen qaplanadı.
Xalıqtıń jeke transport quralların saqlawı ushın turaq jaylardıń jer astı bólimlerinde avtomobiller turatuǵın orınlar shólkemlestiriledi. Kompleksten 5-10 minutlıq aralıqta baǵ, metro bándirgisi, hákimshilik imaratlar hám sociallıq mákemeler boy tikleydi.
Prezidentimiz tayar shańaraqlardıń birine kirip, sharayatlar menen tanıstı, Jańa Tashkent xalıq ushın hár tárepleme qolaylı turaq jay qurıwda pútkil mámleketimizge úlgi hám tájiriybe mektebi bolıwı kerek ekenligin atap ótti.
Bunnan soń Prezident Shavkat Mirziyoev Jańa Tashkent aymaǵında qurılıp atırǵan energetika obektleri menen tanıstı.
Trigeneraciya texnologiyası qalanı oraylasqan suwıtıw hám ısıtıw menen támiyinlew ushın zamanagóy sheshim bolıp, dástúriy quwatlıqlarǵa salıstırǵanda 2 esege shekem az energiya jumsaydı. Ápiwayı ıssılıq oraylarında yamasa suwıtıw sistemalarında óndiris processleri óz aldına ámelge asırıladı. Trigeneraciyada bolsa bulardıń barlıǵı birden-bir texnologiyalıq shınjır tiykarında birlestiriledi.
Házirgi waqıtta Jańa Tashkentte áne usı texnologiyaǵa tiykarlanǵan stanciyanıń tiykarǵı imarat hám obektleriniń qurılısı jedel barmaqta. Joybar sheńberinde talap etiletuǵın tiykarǵı úskeneler xalıqaralıq energiya nátiyjeliligi talaplarına tolıq sáykes keledi.
Birinshi basqıshta ıssılıq ushın 75 megavatt, suwıtıw sisteması ushın bolsa 100 megavatt quwatlıq jaratıladı. Sonıń menen birge, 17 megavatt muǵdarında qosımsha elektr energiyası da islep shıǵarıladı.
Prezidentimiz Jańa Tashkenttiń birinshi podstanciyasında alıp barılıp atırǵan jumıslar menen de tanıstı.
Podstanciyanıń quwatlılıǵı 100 megavattqa teń bolıp, Jańa Tashkenttiń dáslepki basqıshtaǵı talapların támiyinleydi. Joybar Qıtaydıń “Haocheng Industry Group Limited” kompaniyasınıń qatnasıwında mámleketlik-jeke menshik sheriklik tiykarında ámelge asırılmaqta.
Itibarlı tárepi, bul obekt Ózbekstandaǵı birinshi jabıq túrdegi podstanciya esaplanadı.
Bunday tiptegi qurılmalar dástúriy ashıq podstanciyalarǵa salıstırǵanda bir qatar artıqmashlıqlarǵa iye. Bárinen burın, olar qala ishindegi ortalıqqa say joybarlanadı hám aymaqtıń arxitekturalıq kórinisin buzbastan jaylastırıladı. Sonday-aq, bunday podstanciyalardıń shawqım dárejesi dástúriylerge qaraǵanda eki esege tómen boladı. Bunnan tısqarı, ashıq túrdegi imaratlarǵa qaraǵanda úsh ese az maydan talap etedi. Bul jańadan qurılıp atırǵan Jańa Tashkent sıyaqlı quramalı injenerlik koncepciyasına iye qalada oǵada úlken abzallıq bolıp esaplanadı.
Prezidentimiz bul obektler menen tanısıp, olardıń texnikalıq imkaniyatların, ekonomikalıq nátiyjeliligin hám Jańa Tashkent ushın strategiyalıq áhmiyetin ayrıqsha atap ótti. Joybardıń jáne de nátiyjeli islewi hám kelesi basqıshların tez hám sapalı ámelge asırıw boyınsha óz usınısların berdi.
Prezident Shavkat Mirziyoev Jańa Tashkentte qurılıp atırǵan “Jańa Ózbekstan” universiteti hám Ózbekstan Milliy kitapxanası imaratlarınıń qurılısın da kózden ótkerdi.
Mámleketimizde ekonomikanıń strategiyalıq tarmaqların ilimiy tiykarda rawajlandırıw, innovaciya hám joqarı qosımsha qunlı ónimler islep shıǵarıwdı keńeytiw tiykarǵı wazıypalardan biri bolıp esaplanadı. Bul process, bárinen burın, zamanagóy bilim hám ámeliy kónlikpelerge ie bolǵan maman kadrlar tayarlaw menen tıǵız baylanıslı.
Usı maqsette Ózbekstan Respublikası Prezidentiniń 2021-jıl 23-iyundegi qararına muwapıq “Jańa Ózbekstan” universiteti shólkemlestirilgen.
Universitettiń Jańa Tashkentte qurılıp atırǵan imaratlar kompleksiniń dáslepki bahası 200 million dollar bolıp, 50 gektar maydandı qamtıp aladı.
Joybar Jańa Tashkent qalasın qurıw direkciyasınıń buyırtpası tiykarında túrkiyalı qánigeler menen birgelikte islep shıǵılǵan. Qurılıs jumısları “Özgüven” kompaniyası tárepinen ámelge asırılmaqta. Universitet imaratların 2027-jılı paydalanıwǵa tapsırıw rejelestirilgen.
Kompleks quramında 10 mıń studentke mólsherlengen 5 fakultet, rektorat, mıń orınnan aslam orınǵa iye kitapxana, muzey, kórgizbeler zalı, multimedia xanaları qurıladı. Sonday-aq, studentler ushın mıń orınlıq sport kompleksi hám júziw basseyni, professor-oqıtıwshılar hám studentlerge mólsherlengen 2 mıń orınlıq jataqxanalar jáne asxanalar qurıladı.
Házirgi waqıtta qurılıs jumısları úsh basqıshta alıp barılmaqta. Mámleketimiz basshısı joybardıń tiykarǵı parametrleri, bilimlendiriw procesi ushın jaratılatuǵın infrastruktura hám sharayatlarǵa ayrıqsha itibar qarattı. Jaslardıń ilimiy hám intellektuallıq potencialın júzege shıǵarıwda bunday zamanagóy bilimlendiriw dárgaylarınıń áhmiyeti ayrıqsha atap ótildi.
– Bul universitette ámelge asırılıp atırǵan dóretiwshilik jumıslar, bilimlendiriw baǵdarlamaları basqa da joqarı oqıw orınları ushın úlgi bolıwı kerek, – dedi mámleketimiz basshısı.
Basqa da joqarı oqıw orınların da usı tárizde ońlaw, úskenelew, bilimlendiriwge aldınǵı texnologiyalardı tartıw boyınsha juwapkerlerge kórsetpeler berildi.
Sonday-aq, derlik 4 gektar maydanda Ózbekstan Milliy kitapxanasınıń jańa imaratın qurıw jumısları ámelge asırılmaqta. Imarat milliy arxitekturalıq dástúrler hám zamanagóy arxitekturalıq sheshimlerdi úylestirgen halda joybarlastırılǵan.
Tórt qabatlı imaratlardıń ulıwma maydanı 30 mıń kvadrat metrden aslam bolıp, bir waqıttıń ózinde 1 mıń 420 kitapqumarǵa xızmet kórsetiw imkaniyatın beredi. Kitapxana fondların saqlaw, esapqa alıw, qáwipsizligin támiyinlew hám sterilizaciyalaw ushın arnawlı joqarı texnologiyalı xanalar shólkemlestiriledi.
Kompleks kóp funkciyalı bolıp, xalıqaralıq hám milliy iri kitapxanalardıń elektron bazalarına onlayn jalǵanıw imkaniyatı jaratıladı. Kózi ázzi puqaralar ushın arnawlı oqıw hám izertlew ortalıǵı jolǵa qoyıladı. Sonday-aq, keliwshiler ushın 300 orınlıq kafe, galereya, jeńil sport oyınları maydanshaları hám dem alıw orınları qurıladı.
Prezidentimiz bul kitapxana Jańa Tashkentte qurılıp atırǵan bilimlendiriw hám aǵartıwshılıq dárgaylarınıń sistemasında áhmiyetli orın iyelep, jas áwladtıń intellektuallıq rawajlanıwı ushın bekkem tiykar bolatuǵının atap ótti. Ilim hám mánawiyatqa investiciya kirgizgen mámlekettiń ekonomikalıq potencialı da turaqlı hám joqarı bolatuǵını atap ótildi.
Zamanagóy kitapxana imkaniyatlarınan tolıq paydalanıw ushın xızmetkerler málimleme texnologiyaları hám xalıqaralıq standartlardı tereń ózlestiriwi zárúr ekenligine itibar qaratıldı.
Jańa Tashkentte alıp barılıp atırǵan dóretiwshilik jumısları menen tanısıw dawamında Prezident Shavkat Mirziyoev Shırshıq dáryası ústinde jańa kópir hám metro bándirgisi menen birlestirilgen avtomobil turıw ornın qurıw jumısların kózden ótkerdi.
Paytaxt hám Jańa Tashkent arasında transport baylanısların bekkemlew, transport aǵımın nátiyjeli basqarıw jáne xalıq ushın qolaylı háreket ortalıǵın jaratıwǵa qaratılǵan bul joybarlar qala infrastrukturasın rawajlandırıwda úlken áhmiyetke iye.
Jańa kópir Tashkent hám Jańa Tashkentti baylanıstıradı. Bir sutkada 40-50 mıń avtotransport quralın ótkeriw quwatlılıǵına iye boladı. Qurılıs jumısları usı jıldıń aqırında baslanǵan bolıp, házirgi waqıtqa kelip joybardıń dáslepki bólegi ámelge asırılmaqta.
Joybar sheńberinde qorshaǵan ortalıqqa abaylı qatnasta bolıwǵa ayrıqsha itibar qaratılmaqta. Jaǵalıq aymaqları kóklemzarlastırıladı, energiya únemleytuǵın jaqtılandırıw sistemaları ornatıladı, piyadalar hám velosiped jolları qurıladı. Sonday-aq, kópir arqalı eki liniyalı tramvay jolın qurıw rejelestirilgen.
Jańa Tashkentti Tashkent qalası menen baylanıstıratuǵın bolajaq metro liniyasınıń uzınlıǵı 21 kilometrdi qurap, 9 zamanagóy bándirgini óz ishine aladı. Ol kúnine 230 mıń jolawshıǵa xızmet kórsetiw imkaniyatına iye boladı. Liniya paytaxt metrosınıń bar tarmaqları menen tolıq integraciyalanadı, bul bolsa jolawshılar ushın birden-bir hám úzliksiz transport sistemasın qáliplestiredi.
Mámleketimiz basshısı bolajaq liniyanıń avtomobil turatuǵın orın menen integraciyalanǵan bándirgilerinen biriniń qurılıs procesi menen tanıstı.
Metro bándirgisi menen integraciyalasqan avtomobil turatuǵın orın 20 mıń kvadrat metr maydanda qurıladı, onda avtomobiller, piyadalar hám jámiyetlik transport háreketi anıq ajıratılıp, qáwipsizlik hám funkcionallıqqa tiykarǵı itibar beriledi.
Házirgi waqıtta aymaqta jer jumısları hám beton quyıw jumısları alıp barılmaqta. Kompleks 2027-jılı paydalanıwǵa tapsırılıwı rejelestirilgen.
Prezidentimiz joybarlardıń Jańa Tashkent ushın strategiyalıq áhmiyetin atap ótip, qurılıs jumısların belgilengen múddetlerde, joqarı sapada ámelge asırıw boyınsha óz usınısların berdi.
Mámleketimiz basshısı Jańa Tashkent qalasın qurıw direkciyasına da barıp, aymaqta ámelge asırılıp atırǵan hám keleshektegi iri qurılıs joybarlarınıń prezentaciyası menen tanıstı.
Bul qala qurılısına 2023-jılı tırnaq tası qoyılǵan edi. Joybar ushın Joqarı hám Orta Shırshıq rayonlarınan jámi 19 mıń 700 gektar jer maydanı ajıratılǵan. Koncepciya Britaniyanıń “Cross Works” kompaniyası tárepinen islep shıǵılǵan. Házirgi waqıtta bul jerde 100 den aslam úlken-kishi joybarlar jedel alıp barılmaqta. Hár bir baslama xalıqaralıq normalar hám zamanagóy qala qurılısı tendenciyalarına tiykarlanadı.
Házirge kelip, dáslepki imaratlardıń sawlatı kózge taslana basladı. Juwmaqlanıp atırǵan 2025-jılı jańa qalada alıp barılıp atırǵan qurılıs maydanları 3 million kvadrat metrge jetti.
Bir qatar turaq jay massivleriniń qurılısı juwmaqlawshı basqıshqa kirdi. Infrastruktura obektlerinde jumıslar jedel barmaqta.
Birinshi basqıshta 6 mıń gektar aymaqta qurılıs jumısları orınlanadı. Nátiyjede 600 mıń xalıq ushın zamanagóy infrastruktura qurılıwı belgilengen. Joybar tolıq juwmaqlanǵanda bolsa Jańa Tashkent 2 million xalıq jasaytuǵın úlken megapoliske aylanadı.
Bunday kólemdegi qurılıs uzaq múddetli hám turaqlı infrastrukturanı talap etedi. Házirgi waqıtta aymaqta iri jer astı injenerlik tarmaqları qurılmaqta. Bir hám eki sekciyalı kollektorlar jatqarılıp, ıssılıq, suw, elektr energiyası hám telekommunikaciya sıyaqlı barlıq tarmaqlardıń jer astınan ótkeriliwi támiyinlenbekte.
Transport qatnawın jeńilletiw maqsetinde alıp barılıp atırǵan jumıslarǵa ayrıqsha toqtap ótildi. Tunnel hám jer astı avtomobil turıw orınlarınıń qurılısı qalanıń keleshektegi háreketleniw sisteması ushın áhmietli ekeni atap ótildi.
Aymaqta on kilometrlik jaǵalıq baǵı shólkemlestirildi. Bir million túp puta hám náller egildi.
Mámleketimiz basshısı tárepinen qala qurılısında “jasıl” principler áhmiyetli orın iyelewi kerek ekenligi atap ótildi. Onda metro hám elektrobuslardıń háreketin muwapıqlastırıw, piyada hám velosipedshiler ushın qáwipsiz, tosqınlıqsız jollardı qurıw boyınsha juwapkerlerge qosımsha tapsırmalar berildi.
Aymaqta 60 tan aslam mámleketlik uyımlar ushın zamanagóy hákimshilik imaratlar qurıladı. Házirgi waqıtta bir qatar ministrlikler hám uyımlar waqtınsha komplekslerde jumıs baslaǵan.
Investorlardıń belsendiligi de joqarı. Aukcion arqalı satılǵan 24 kommerciyalıq lot boyınsha 2 milliard dollarlıq investiciya shártnamalarına qol qoyılǵan. Bul qarjılar esabınan miymanxanalar, restoranlar, servis orayları hám ózine tán arxitekturaǵa iye zamanagóy imaratlar qurıladı.
Házirgi waqıttaǵı qurılıs procesiniń ózinde 10 mıń adamnıń bántligi támiyinlengen. Joybar tolıq ámelge asırılǵannan soń bolsa innovaciyalıq texnologiyalarǵa tiykarlanǵan, joqarı dáramatlı júz mıńlaǵan turaqlı jumıs orınları jaratılıwı kútilmekte.
Prezidentimizge Jańa Tashkentte qurılıp atırǵan turizm obektleri, xızmet kórsetiw hám dem alıw kompleksleri, sonday-aq, mámleketimizdiń basqa da aymaqlarında ámelge asırılıwı rejelestirilip atırǵan iri investiciyalıq hám infrastrukturalıq joybarlar haqqında maǵlıwmat berildi.
Mámleketimiz basshısı hár bir baslamada ilim jetiskenliklerine súyeniw, joybarlarda jergilikli ruwxtı sáwlelendiriw, eń tiykarǵısı, olar xalıq mápine xızmet etiwi kerek ekenligin atap ótti.

Ziyodulla JONIBEKOV,
Ikrom AVVALBOEV,
Abdulaziz RUSTAMOV,
Marhabo HOJIAKBAROVA,
ÓzAnıń arnawlı xabarshıları