Prezidentimizdiń 2021-jıl 9-avgust sánesindegi PQ-5216-sanlı qararınıń orınlanıwı sheńberinde respublikamızda jaslardı qollap-quwatlaw baǵdarında bir qatar iygilikli jumıslar ámelge asırıldı.

Atap aytqanda, juwmaqlanıp atırǵan 2025-jıl dawamında Qaraqalpaqstan Respublikası boyınsha jámi 86 jas zamanagóy, barlıq qolaylıqlarǵa iye turaq jaylar menen támiyinlendi. Bul bolsa jaslardıń sociallıq qorǵalıwın kúsheytiw, olardıń erkin turmısqa qádem qoyıwı hám keleshek rejelerin ámelge asırıwında bekkem tiykar bolıp xızmet etpekte. Jańa jıl bayramı aldınan bul ilaj orınlarda dawam etip, jaslar jańa úyler menen támiyinlenip, quwanıshqa bólendi.
Bunday ilajlardıń biri Xojeli rayonında da dawam etip, jańa jıl aldınan rayonda jasawshı úsh jasqa jańa úylerdiń gitleri saltanatlı túrde tapsırıldı.
Ilajǵa rayon hákimi J.Ermashev, “Insan” sociallıq xızmetler orayı rayonlıq bólimi baslıǵı Z.Xojamuratova hám keń jámiyetshilik penen ǵalaba xabar qurallarınıń wákilleri qatnastı. Onda insan qádir qımbatı barlıq nárseden ústin turatuǵın elimizde húrmetli Prezidentimiz tárepinen ata-anası qaramaǵınan ayrılǵan jaslar ushın úlken imkaniyatlar jaratılıp atırǵanlıǵı ayrıqsha atap ótildi.
-Bıyıl joqarı oqıw orınına mámleketlik grant tiykarında oqıwǵa qabıllandım. Ata-anam bolmaǵanlıqtan kempir apamnıń qáwenderligindemen. Jańa úy menen támiynlengenim ushın Prezidentimizge, el basshılarına minnetdarshılıǵım sheksiz. Bul itibardı keleshekte elimizge múnásip xızmetlerim menen qaytarıwǵa háreket etemen, – deydi Xojeli rayonında jasawshı Dilshoda Xojanazarova.

Qaraqalpaqstan xabar agentligi