Usı kúnlerde elimizdiń barlıq orınlarında bolǵanı sıyaqlı Nókis qalasında da jańa jıl bayramı kóterińki ruwxta ótpekte. Orınlarda bayramdı kóterińki ruwxta ótkeriw ushın zárúr jumıslar alıp barılmaqta. Paytaxtımızdaǵı ǵalabalıq bayram ilajları ótkeriletuǵın aymaqlarda jańa jıl bayramı shırshaları ornatılıp, túrli kewilashar ilajlar ótkerilmekte. Bunnan tısqarı, nókislilerdiń bayram dasturxanı mol bolıwın támiyinlew, bahanıń keskin artıp ketiwiniń aldın alıw maqsetinde shólkemlestirilgen sawda yarmarkalarında azıq-awqat hám awıl xojalıǵı ónimleriniń arzan bahalarda satılıwı jolǵa qoyıldı.

Atap aytqanda, usı jıldıń 10-dekabrinen baslap “Nókis diyqan bazarı”nda arzanlastırılǵan sawda yarmarkaları shólkemlestirilgen.
Yarmarkalarda gósh hám gósh ónimleri, qusshılıq ónimleri, máyek, sút hám sút ónimleri, un, gúrish, konditer ónimleri, miywe-ovoщ hám basqa da tiykarǵı tutınıw tovarları bazar bahalarına salıstırǵanda biraz arzan bahalarda usınıs etilmekte. Sonıń menen birge, ónimlerdiń sapası hám sanitariyalıq-gigienalıq qaǵıydalarǵa qatań ámel etiliwi tiyisli shólkemler tárepinen turaqlı qadaǵalawǵa alınǵan.
– Búgingi kúnde qalada arzanlastırılǵan yarmarkanıń jumısı tolıq jolǵa qoyılǵan, – deydi qala hákiminiń finans-ekonomika hám kámbaǵallıqtı qısqartıw máseleleri boyınsha birinshi orınbasarı Muslim Kannazarov. – Yarmarkalarda sawda islep atırǵan 45 ten aslam isbilermenlik subektleri biriktirilgen bolıp, olarǵa barlıq sharayatlar jaratılǵan. Satılıp atırǵan ónimler boyınsha sanitariyalıq-gigienalıq qaǵıydalarǵa ámel etiliwi ústinen tiyisli shólkemler qadaǵalawı jolǵa qoyılǵan. Xalqımızǵa qolaylı bolıwı ushın arzanlastırılǵan yarmarkalarda satıwshılar 110 qadaǵalaw kassa mashinası hám tólem terminalları menen támiyinlengen sawda orınları shólkemlestirilip, olarda turaqlı qadaǵalawdı jáne bahanıń turaqlılıǵın támiyinlew hám monitoringin alıp barıw maqsetinde 22 juwapker xızmetker biriktirilgen.
Sonday-aq, qaladaǵı bárshe máhállelerde kóshpeli sawda dúkanları shólkemlestirilgen.
Búgin Nókis qalası hákimliginde de arzanlastırılǵan sawda yarmarkası shólkemlestirilip, xalıqqa bayram dasturxanı ushın zárúr bolǵan barlıq ónimlerdi bir jerden, arzan hám sapalı túrde satıp alıw imkaniyatı jaratıldı. Yarmarkada 15 isbilermenlik subekti óz ónimleri menen qatnastı.
– Nókis qalası hákimligi hám “Nókis diyqan bazarı” tárepinen Jańa jıl bayramı aldınan hár jılı arzanlastırılǵan yarmarka ótkeriliwi dástúrge aylanǵan, – deydi “Nókis diyqan bazarı” qadaǵalawshısı Gúlparshın Tóremuratova. – Eń áhmiyetlisi, tiykarǵı azıq-awqat ónimleri gósh, máyek, qus ónimleri, miywe-ovoщ, gúrish hám hár qıylı konditer ónimleri arzan bahalarda usınıs etilmekte.
Arzanlastırılǵan sawda yarmarkaları 2026-jıldıń 15-yanvarına shekem óz jumısın dawam ettiredi.

M.Pirnazarova,
Qaraqalpaqstan xabar agentliginiń sholıwshısı