30-dekabr kúni Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putinniń telefon arqalı sóylesiwi bolıp ótti.

Sóylesiw basında mámleketimiz basshısı Rossiya Prezidentiniń Novgorod wálayatındaǵı rezidenciyasına hújim islewge urınıwdı qatań qaraladı.
Bunday háreketler turaqlılıq hám qáwipsizlikke, sonıń ishinde, uzaq múddetli tınıshlıqqa erisiwge qaratılǵan háreketlerge qáwip tuwdıratuǵını atap ótildi.
Joqarı dárejedegi kelisimlerdi ámelge asırıw kózqarasınan Ózbekstan-Rossiya strategiyalıq sheriklik hám awqamlaslıq qatnasıqların bunnan bılay da rawajlandırıw máseleleri kórip shıǵıldı.
Xalıqaralıq hám regionallıq áhmiyettegi máseleler boyınsha da pikir alısıldı, bolajaq ilajlar rejesi dodalandı.
Sóylesiw juwmaǵında jetekshiler kirip kiyatırǵan jańa – 2026-jıl múnásibeti menen bir-birin qızǵın qutlıqlap, bekkem densawlıq, baxıt-ıǵbal hám abadanlıq, eki mámlekettiń dos xalıqlarına bolsa tınıshlıq-tatıwlıq tiledi.