Ózbekstan Respublikası Prezidenti Shavkat Mirziyoev 29-dekabr kúni mámleketimizdegi diplomatiyalıq missiyasın juwmaqlap atırǵan Saudiya Arabstanı Patshalıǵınıń Ayrıqsha hám tolıq huqıqlı elshisi Yusuf al-Utaybiydi qabılladı.

Mámleketimiz basshısı elshiniń nátiyjeli jumısın jáne Ózbekstan menen Saudiya Arabstanı arasındaǵı hár tárepleme sheriklik qatnasıqların rawajlandırıw hám bekkemlewge qosqan jeke úlesin ayrıqsha atap ótti.

Hár qıylı dárejelerde sistemalı sóylesiw hám jedel baylanıslar jolǵa qoyılǵanı qanaatlanıwshılıq penen atap ótildi. Tovar almasıw, tikkeley investiciyalar kólemi hám birgeliktegi kárxanalardıń sanı jedel ósip barmaqta. Saudiya Arabstanınıń jetekshi kompaniyaları menen joybarlar portfeli 27 milliard dollardan arttı.

“Jasıl” energetika, awıl xojalıǵı, densawlıqtı saqlaw, infrastrukturanı rawajlandırıw hám basqa da tiykarǵı tarawlarda joybar hám baslamalar ámelge asırılmaqta.

Mádeniy-gumanitarlıq almasıwlar jedellesti. Usı jıldıń oktyabr ayında Saudiya Arabstanında Ózbekstan mádeniyatı kúnleri joqarı dárejede ótkerildi. Mámleketimiz Ar-Riyadta bolıp ótken Xalıqaralıq kitap kórgizbesinde qatnastı.

Ózbekstan jetekshisi Saudiya Arabstanı Húkimetine puqaralarımızdıń Haj hám Umra ámellerin orınlawı ushın jaratılǵan qolaylı sharayatlar ushın minnetdarshılıq bildirdi.

Ushırasıw juwmaǵında Ózbekstan Prezidenti Yusuf al-Utaybiyge Ózbekstan – Saudiya doslıq hám kóp tárepleme sheriklik qatnasıqların bekkemlewge qosqan úlken úlesi ushın “Dwstlik” ordenin tapsırdı.

Elshi onıń diplomatiyalıq missiyasına berilgen joqarı baha jáne Ózbekstan hám Saudiya Arabstanı arasındaǵı keń kólemli birge islesiwdiń rawajlanıwın hár tárepleme qollap-quwatlap atırǵanı ushın mámleketimiz jetekshisine tereń minnetdarshılıq bildirdi.

ÓzA