29-dekabr kúni Ózbekstan Respublikası Prezidenti Shavkat Mirziyoev hám Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedovtıń telefon arqalı sóylesiwi bolıp ótti.

Sóylesiw aldınan jetekshiler bir-birin jaqınlasıp kiyatırǵan Jańa jıl bayramı menen qızǵın qutlıqlap, eki mámlekettiń tuwısqan xalıqlarına tınıshlıq, abadanlıq hám rawajlanıw tiledi. Mámleketimiz basshısı Túrkmenstan Prezidenti Serdar Berdimuhamedovqa da qızǵın sálemin jolladı.
Ózbekstan – Túrkmenstan doslıq, jaqsı qońsıshılıq hám strategiyalıq sheriklik qatnasıqların joqarı dárejede erisilgen kelisimler sheńberinde bunnan bılay da rawajlandırıwdıń áhmiyetli máseleleri dodalandı.
Barlıq dárejelerdegi sóylesiwler jedel dawam etip atırǵanı qanaatlanıwshılıq penen atap ótildi. Óz-ara tovar almasıw hám júk tasıw kólemi jedel ósip barmaqta. Energetika, sanaat, awıl hám suw xojalıǵı, transport tarawlarında birge islesiw keńeymekte. “Shavat-Tashawız” shegaraaldı sawda zonası iske qosıldı. Aymaqlararalıq, isbilermenlik, mádeniy-gumanitarlıq almasıwlar jedellesti.
Regionallıq birge islesiwdiń tiykarǵı máseleleri boyınsha da pikir alısıldı.
Mámleketimiz basshısı Avazada iri sammitler, Ashxabadta Túrkmenstan biytárepliginiń 30 jıllıǵı hám “Xalıqaralıq tınıshlıq hám isenim jılı” múnásibeti menen shólkemlestirilgen forum tabıslı ótkerilgenin ayrıqsha atap ótti.
Kelesi jılı bolajaq ushırasıwlar rejesi kórip shıǵıldı, xalıqaralıq hám regionallıq ilajlardı birgelikte ótkeriwdi dawam ettiriwge kelisip alındı.

ÓzA