Assalawma áleykum, áziz watanlaslar!

Húrmetli deputat hám senatorlar!

Húrmetli miymanlar!

Búgin Oliy Majliske hám kóp milletli xalqımızǵa kelesi jıl ushın Múrájattı usınar ekenmen, bárinen burın, bársheńizdi saw-salamat, kóterińki keypiyatta kórip turǵanımnan quwanıshlıman.
Sońǵı toǵız jılda biz sizler menen, el-xalqımız benen birgelikte úlken rawajlanıw jolın basıp óttik. Ekonomikamız jańadan qáliplesti, bazar qatnasıqların, sociallıq qorǵawdı keńeyttik, nızam ústinligin bekkemledik. Eń áhmiyetlisi, reformalarımızdıń nátiyjesin hár bir máhálle, hár bir shańaraq hám hár bir insan kúndelikli turmısında sezbekte.
Bir sóz benen aytqanda, biz reformalardı anıq ámeliy nátiyjege aylandırıwdı úyrendik. Bunıń tastıyıǵın barǵan sayın jańasha kóriniske iye bolıp atırǵan qala hám awıllarımızda, zamanagóy kárxanalar, sawda-servis orınları, mektep, baqsha hám emlewxanalar, abat kóshe hám máhálleler, transport-logistika sisteması, sanlı xızmetler mısalında ayqın kóriw múmkin.
Qádirli watanlaslar!
Búgingi kúnde dúnyada júz berip atırǵan hám jaqın-jaqınǵa shekem hesh kim kóz aldına keltire almaytuǵın ózgerisler, mámleketler arasında ekonomikalıq qarama-qarsılıq, qáwipsizlikke qáwip-qáterler artıp baratırǵan qáweterli bir jaǵdayda sizler menen oǵada quramalı jıldı juwmaqlamaqtamız.
Qanshelli awır bolmasın, baslaǵan demokratiyalıq reformalarımızdı isenimli dawam ettirgenimiz; xalqımızdıń qollap-quwatlawı hám jaslarımızdıń kúsh-ǵayratı; awızbirshiliktiń tiykarı bolǵan máhálleniń turmısımızdaǵı ornın hám tásirin kúsheytkenimiz; adamlarımızdıń sana-sezimin hám kózqarasın ózgertip, el-jurtımızdı jáne de birlestirgenimiz; isbilermen, diyqan hám fermerlerimizdiń intakerligi hám mártlik miyneti; óz-ara paydalı birge islesiwge tiykarlanǵan doslıq sırtqı siyasatımız esabınan 2025-jılı barlıq tarawlarda úlken jetiskenliklerge eristik.
Bárinen burın, dúnya kóleminde óndiris hám transport-logistika shınjırları úzilgen, shiyki zat hám qarjı resurslarınıń bahası artqan sharayatta da mámleketimiz ekonomikası isenimli hám turaqlı ósiwdi dawam ettirip atırǵanın atap ótiw zárúr.
Bul nátiyjeler dúnya jámiyetshiligi hám abıraylı xalıqaralıq shólkemler tárepinen tán alınbaqta.
Itibar beriń, bunnan toǵız jıl aldın ekonomikamızdıń kólemin 100 milliard dollarǵa jetkeriw biz ushın oǵada úlken shek bolıp kórinetuǵın edi. Bıyıl tariyxımızda birinshi márte jalpı ishki ónimimiz 145 milliard dollardan astı. Bunday joqarı nátiyjeler xalqımızdıń, bárshemizdiń qanday úlken islerge uqıplı ekenimizdi ayqın kórsetpekte.
Globallıq sawda sistemasında “oyın qaǵıydaları” ózgerip atırǵan bir waqıtta biz bıyıl eksportımızdı 23 procentke arttırıp, 33,4 milliard dollarǵa jetkeremiz. Eń áhmiyetlisi, reformalarımız ushın bekkem finanslıq baza bolatuǵın altın-valyuta rezervlerimiz birinshi márte 60 milliard dollardan astı.
Bıyıl ekonomikamızǵa tartılǵan sırt el investiciyalarınıń kólemi 43,1 milliard dollarǵa jetti. Jámi investiciyalardıń jalpı ishki ónimdegi úlesi 31,9 procentti quramaqta. Bul bolsa ekonomikamız kelesi jıllarda da joqarı pátler menen turaqlı ósip barıwı ushın tiykar boladı.
Ózbekstannıń xalıqaralıq maydandaǵı abırayı hám statusı, xalıqaralıq reytinglerdegi ornı barǵan sayın bekkemlenip barmaqta. Atap aytqanda, jetekshi xalıqaralıq reyting agentlikleri mámleketimizdiń suveren reytingin “VV-“dan “VV” dárejesine kóterdi.
Bul gápler kópshilikke ápiwayı bir fakt bolıp seziliwi múmkin. Biraq ekonomistler, investor hám bankirler gáp qanday úlken nátiyjeler haqqında barıp atırǵanın júdá jaqsı túsinip turıptı. Áne, usı ózgeris sebepli sırttan tartılatuǵın resurslardıń procent stavkası 1-1,5 punktke tómenlep, sırtqı qarız qárejeti jılına keminde 300 million dollarǵa azayadı.
Sonday-aq, Jáhán banki járiyalap baratuǵın Mámleketlerdiń texnologiyalıq jetiklik indeksinde Ózbekstan 71 tekshe joqarı kóterilip, dúnyanıń top-10 mámleketiniń qatarınan orın aldı.
Xalıqtıń abadanlıǵına hám biznestiń ósiwine xızmet etetuǵın infrastrukturanı bunnan bılay da jaqsılaw boyınsha da 2025-jıl úlken ózgerisler jılı boldı. Atap aytqanda, energetika tarawında túpkilikli burılıs jasaǵanımız esabınan elektr islep shıǵarıw kólemin 85 milliard kilovatt-saatqa jetkerdik.
Kóz aldıńızǵa keltiriń, 2017-jıldaǵı 60 milliard kilovatt-saat generaciya dárejesinde qalıp qoyǵanımızda, házir ekonomikamızdıń kólemin 2 esege arttıra alar ma edik? Óndiristiń ósip baratırǵan talabın, 38 million xalıqtıń mútájligin qaplap bola ma?
Bıyıl 188 máhálledegi 715 mıń xalıq jasaytuǵın shańaraqlarǵa birinshi márte taza ishimlik suwı kirip bardı, jáne 2 million 300 mıńǵa shamalas xalıqtıń suw támiynatı jaqsılandı. Yamasa 867 “awır” máhálledegi 470 mıń shańaraqqa qıytaq jerlerdi suwǵarıw ushın birinshi márte suw jetip bardı.
Usı jılı xalıqqa 8 million 100 mıń kvadrat metrlik, 135 mıń kvartiradan ibarat kóp qabatlı turaq jaylar tapsırılmaqta, adamlardıń ózi de jasaw sharayatın jaqsılaw ushın 19 million kvadrat metr maydanda qurılıs isledi. Biznes wákilleri tárepinen 24 million kvadrat metr turaq jay emes obektler qurıldı.
Ulıwma, keyingi toǵız jılda 210 million kvadrat metr turaq jay hám turaq jay emes obektler paydalanıwǵa tapsırıldı.
Bul sanlarǵa itibar berip aytıp atırǵanım álbette biykarǵa emes. Eger jol, suw, elektr hám basqa da infrastrukturalar ushın zárúr qarjı tawıp bermesek, qurılısshılar hám qurılıs materialları kárxanaları ushın sharayat jaratıp bermesek, ipoteka sistemasın jolǵa qoymasaq, sonsha dóretiwshilik jumısları bola ma edi?
Usı jılı 5 million xalqımız dáramatlı bolıp, jumıssızlıq dárejesi 5,5 procentten 4,9 procentke tústi. Derlik 1,5 million járdemge mútáj xalıq kámbaǵallıqtan shıqtı, birinshi márte 1 mıń 435 máhálle “kámbaǵallıqtan jıraq” aymaqqa aylandı.
Kámbaǵal shańaraqlarǵa tiyisli 168 mıń bala mámleketlik baqshalarǵa jeńilletilgen tiykarda qabıl etildi. Usı jıldan baslap, 208 baqshaǵa birinshi márte inklyuziv bilimlendiriw sistemasın engizdik.
Elimizde kámbaǵallıq dárejesi jıl basındaǵı 8,9 procentten 5,8 procentke túskenin atap ótiw kerek.
Bir esleń, bul jumıslardı baslaǵanımızda xalqımızdıń úshten bir bólegi kámbaǵallıq shegarasında jasaytuǵın edi. Kredit, subsidiya, kompensaciya sıyaqlı 100 den aslam xızmetler arqalı sociallıq qorǵawdıń pútkilley jańa sistemasın jolǵa qoyǵanımız hám olardı máhálledegi “jetilik”tiń ózine bergenimiz nátiyjesinde 8,5 millionnan aslam adam kámbaǵallıqtan shıqtı, jumıssızlıq 2 esege qısqardı. Nátiyjede úsh jıl aldın kámbaǵallıqtı 2026-jıldıń juwmaǵı menen 2 esege qısqartıw boyınsha alǵan maqsetimizge usı jıldıń ózinde eristik.
Eń áhmiyetli jetiskenliklerimiz haqqında sóz etkende, kúsh-ǵayratlı sportshılarımızdıń abıraylı xalıqaralıq jarıslarda erisken jeńislerin qanaatlanıwshılıq penen atap ótiw orınlı.
Bárinen burın, Ózbekstan futbolı ushın 2025-jıl haqıyqıy tariyxıy jıl boldı. Milliy saylandı komandamız birinshi márte Jáhán chempionatına jollamanı qolǵa kirgizdi. Sheber shaxmatshılarımız Jáhán kubogi jarıslarında múnásip qatnastı. Ásirese, náwqıran grossmeysterimiz Javohir Sindorov eń jas jáhán kuboginiń iyesi bolǵanı bárshemizge joqarı maqtanısh baǵıshlaydı.
Eń áhmiyetlisi, shaxmat álemindegi jetiskenliklerimiz usınıń menen sheklenip qalmadı. Ótken háptede 9-17 jasar shaxmatshılar arasında “rapid” hám “blic” baǵdarları boyınsha jáhán chempionatında elimiz wákilleri 5 altın, 2 gúmis hám 5 bronza medalın qolǵa kirgizip, ulıwma komandalıq esapta birinshi orındı iyeledi.
Bıyılǵı Jaslar Paraaziya oyınlarında mártlik hám jigerlilik iyesi bolǵan sportshılarımız 125 altın, 77 gúmis hám 52 bronza medalın qolǵa kirgizip, qatnasıwshı mámleketler arasında eń joqarı nátiyjeni kórsetti.
Hesh gúmansız, talantlı ul-qızlarımız bilimlendiriw, ilim, mádeniyat, kórkem óner, sport hám basqa da tarawlarda erisip atırǵan úlken jetiskenlikleri menen de Jańa Ózbekstanımızdıń rawajlanıwına múnásip úles qospaqta.
Oqıwshı hám studentlerimiz bıyılǵı jılı xalıqaralıq pán olimpiadalarında 51 altın, 101 gúmis, 126 bronza medalın qolǵa kirgizip, óz bilim hám potencialın pútkil dúnyaǵa kórsetti.
Elimizdiń maqtanıshı bolǵan bunday perzentlerimizge, olardıń ata-anaları hám ustaz-tárbiyashılarına jáne bir márte shın júrekten alǵıs aytamız.
Bizge belgili, Ózbekstan kelesi jılı 46-Pútkiljáhán shaxmat olimpiadasına, 2027-jılı 20 jasqa shekemgi futbolshılar arasındaǵı jáhán chempionatına, 2029-jılı bolsa Jaslar Aziya oyınlarına basshılıq etedi.
Sonıń menen birge, 2026-jılı elimizde birinshi márte mektep oqıwshıları arasında abıraylı xalıqaralıq ximiya hám informatika olimpiadaları, Shanxay birge islesiw shólkemine aǵza mámleketlerdiń studentleri arasında injenerlik baǵdarlarında, Túrkiy mámleketler texnikumlarınıń oqıwshıları arasında kásiplik baǵdarlarda xalıqaralıq olimpiadalar ótkeriledi. Bul jarıslarda da perzentlerimiz múnásip qatnasadı, dep isenemen.
Bunday abıraylı ilajlar Watanımızdı rawajlanǵan sport hám ilim mámleketine aylandırıw, onıń abıray-mártebesin arttırıwǵa xızmet etedi.
Keyingi waqıtta elimiz globallıq máseleler dodalanatuǵın xalıqaralıq qarım-qatnas maydanına aylanıp barmaqta. Atap aytqanda, bıyıl Parlamentleraralıq awqamnıń 150-yubiley Assambleyası; YuNESKO Bas konferenciyasınıń sessiyası; “Oraylıq Aziya – Evropa Awqamı” sammiti hám xalıqaralıq Klimat forumı elimizde bolıp ótti.
Sonday-aq, Ózbekstan, Tájikstan hám Qırǵızstan jetekshileriniń mart ayında Xojendte bolıp ótken ushırasıwında birinshi márte úsh mámleket mámleketlik shegaralarınıń tutasqan noqatı haqqındaǵı tariyxıy shártnamaǵa qol qoyıldı hám “Máńgi doslıq haqqında”ǵı deklaraciya qabıl etildi.
Regionımız mámleket basshılarınıń jaqında Tashkenttegi Másláhát ushırasıwı waqtında biz integraciya processlerin jańa sapa basqıshına kóteriw ushın Oraylıq Aziya jámiyetshiliginiń strategiyalıq formatın shólkemlestiriw ideyasın alǵa qoydıq. Ázerbayjandı Oraylıq Aziya jámiyetshiligi formatına tolıq huqıqlı aǵza sıpatında qabıl etiw haqqındaǵı qarar tariyxıy áhmiyetke iye boldı. Bul qádem Oraylıq Aziya hám Qubla Kavkaz arasında strategiyalıq baylanıslılıq hám turaqlılıqtı kúsheytiwi sózsiz.
Sonıń menen birge, oktyabr ayında Bryusselde Ózbekstan hám Evropa Awqamı arasında Keńeytilgen sheriklik hám birge islesiw haqqındaǵı kelisimge qol qoyıldı. Noyabr ayında bolıp ótken Oraylıq Aziya hám AQSh sammiti kóp tárepleme hám uzaq múddetli sheriklikti sapa jaǵınan pútkilley jańa basqıshqa alıp shıǵıwǵa xızmet etti.
Ótken háptede Tokioda Oraylıq Aziya hám Yaponiya jetekshileriniń ushırasıwında bilimlendiriw, medicina, sanlı texnologiyalar, infrastruktura hám sanaat tarawları boyınsha áhmiyetli kelisimlerge eristik. Usı hápteniń basında bolsa Sankt-Peterburgte Ǵárezsiz Mámleketlerdiń Doslıq Awqamı basshıları menen bolıp ótken ushırasıw da birge islesiwimizdiń áhmiyetli baǵdarların belgilep berdi.
Bulardıń barlıǵı xalıqaralıq baylanıslarımızdı mazmunı jaǵınan jańa basqıshqa alıp shıqpaqta.
Biz dúnyadaǵı alıs-jaqın mámleketler menen – Shıǵıs hám Batıs, Arqa hám Qubla menen birge islesiw kópirlerin qurıwda dawam etemiz.
Húrmetli májilis qatnasıwshıları!
Bunnan eki jıl aldın “Ózbekstan – 2030” strategiyasın qabıl etkenimizde jalpı ishki ónim kólemin 2030-jılǵa shekem 160 milliard dollarǵa jetkeriwdi belgilep alǵan edik. Kórip tursızlar, bar potencialımız, búgingi reformalarımız, isbilermenlerimizdiń belsendiligi, sırt elli sheriklerimiz benen birge islesiwimizdiń ósip baratırǵanı esabınan bul shekke 2026-jıldıń ózinde arqayın erise alamız.
Házirgi globallıq ekonomikada básekige shıdamlı bolıw ushın maman kásip iyeleri hám qánigeler, zamanagóy texnologiyalar sheshiwshi áhmiyetke iye ekenin umıtpaw kerek. Eger biz sanaatta – elektronika hám elektrotexnika, bioximiya hám polimerler, farmacevtika, mashina qurılısı sıyaqlı joqarı qosımsha qun jaratatuǵın tarawlardı rawajlandırsaq; xızmetlerde – IT, jasalma intellekt, finanslıq texnologiyalar, konsalting, transport-logistika sıyaqlı úlken dáramat keltiretuǵın servislerdi kóbeytiw; awıl xojalıǵında – ónimdarlıqtı arttırıw ushın bioinjeneriyadan keńnen paydalanıw, aldınǵı agrotexnika hám suwdı únemleytuǵın usıllardı jedel qollanıw; ekonomikalıq ósiw hám ekologiyalıq turaqlılıq arasındaǵı teńlikti támiyinlew ushın “jasıl” energetika, shıǵındısız óndiriske ótiw; bilimlendiriw hám medicinada – sapanı jańa basqıshqa alıp shıǵatuǵın aldınǵı sırt el tájiriybelerin keńnen engiziw ushın jańa texnologiyalardı alıp kelsek, kadrlardı ilim hám innovaciyalarǵa tiykarlanǵan zamanagóy kásiplerge tayarlasaq, kelesi bes jılda ekonomikamızdıń kólemin 240 milliard dollardan arttırıwǵa barlıq imkaniyatlarımız bar.
Bul sanlar anıq hám puqta esap-sanaqlarǵa tiykarlanǵan prognoz. Xalıqaralıq valyuta qorı hám abıraylı ekspertlerdiń juwmaqları da bunı tastıyıqlamaqta.
Húrmetli watanlaslar!
Biz – búgin 38 millionnan aslam úlken xalıqpız. Mashaqatlı hám maqtanıshlı miynetimiz benen dúnyada húrmetke erisip atırǵan, erteńgi kúnge isenim menen isenimli baratırǵan, márt hám maqtanıshlı milletpiz.
Biz ózgerislerdi kútip jasamaymız, kerisinshe, olardı ózimiz, óz aqıl-parasatımız hám juwapkershilikli miynetimiz benen jaratamız.
Hár jılı xalqımız ortasha 2 procentke óspekte, 1 millionnan aslam ul-qızlarımız úlken ómirge kirip kelmekte. Jaslarımızǵa qarap, olar erisip atırǵan jetiskenliklerdi kórip, kókiregimiz tawday kóteriledi, qanday úlken dóretiwshi kúsh qatarımızǵa qosılıp atırǵanınan maqtanıp ketemiz.
Álbette, búgingi qıyın zamanda jaslarımızdı hár qıylı sınaqlarǵa shıdamlı, watansúygish insanlar etip tárbiyalaw, xalqımızdı jáne de birlestiriw hám jámlestiriwde, álbette, ózin-ózi basqarıwdıń biybaha sisteması bolǵan máhálleniń ornı hám áhmiyeti úlken.
Máhálle hám jaqsı qońsıshılıq óz-ara únles qádiriyatlar bolıp esaplanadı. Olar jámiyette insan hám sociallıq kapitaldı jáne de bayıtıwǵa sheksiz úles qosadı. Elimizde ótkerilgen sociallıq sorawlarda qatnasqanlardıń 90 procentten aslamı ózin máhálle jámiyetshiliginiń bir bólegi dep esaplawı da sonnan derek beredi.
Bárshemiz ushın hám ata, hám ana bolǵan máhállege, sol tiykarda Watan táǵdirine baylanıslılıq sezimi joqarı ekeni bul institut bárinen burın sociallıq tilekleslik deregi ekenin kórsetedi.
Álbette, biz ushın házirgi globallıq rawajlanıw dáwirinde, dúnyada oǵada keskin hám qáwipli processler júz berip atırǵan búgingi kúnde milliy birlik oǵada áhmiyetli hám zárúr.
Danıshpan ata-babalarımızdıń “Birlesken – ozadı, birlespegen – tozadı”, degen hikmetli sózi bar.
Haqıyqatında da, qarań, kim birlesken bolsa – ómirde ozıp, jeńiske eristi. Kim birlespedi – tozıp, joq bolıp ketti.
Tariyx dawamında qanday awır sınaqlarǵa dus kelsek te, biz bárinen burın awızbirshilikten kúsh aldıq. Mashaqatlı kúnlerde adamlarımız, máhálle xalqı iyinles bolıp qıyınshılıqlardı jeńgen. Shańaraq – shańaraqqa, qońsı – qońsıǵa járdem berip jasaǵan. Biz mine, usınday oǵada biybaha qádiriyatımızǵa bárqulla sadıq qalıwımız, jas áwladımızdı mine, usı ruwxta tárbiyalawımız kerek.
Búgingi kúnde jámiyetimizde hár qıylı pikir hám kózqaraslar bolıwı tábiyǵıy. Bul – demokratiyanıń birlemshi talabı. Biraq, milleti, tili hám dinine qaramastan, pútkil elimizdi birlestiretuǵın ullı bir ideya bar. Ol da bolsa, Watan mápi, xalqımızdıń mápi.
Mine, usınday ullı maqsetke erisiwde máhálle sistemasınıń ornı hám tásiri sheksiz. Sebebi máhálle tınısh hám tatıw bolsa, jámiyetimiz tınısh hám awızbirshilikli boladı. Máhálle rawajlansa, pútkil mámleketimiz rawajlanadı.
Usılardıń barlıǵın esapqa alıp, 2026-jıldı elimizde “Máhálleni rawajlandırıw hám jámiyetti ilgeriletiw jılı”, dep járiyalawdı usınıs etemen.
Qollap-quwatlaǵanıńız ushın raxmet.
Jańa jıldıń atamasında belgilengen tiykarǵı wazıypalardı ámelge asırıw ushın óz aldına mámleketlik baǵdarlamanı qabıl etemiz. Bul baǵdarlamada elimizdegi 9 mıńnan aslam máhálleni, bárinen burın, miyrim-shápáát, awızbirshilik, ádillik hám tárbiya orayına aylandırıw sıyaqlı áhmiyetli máseleler óz kórinisin tabadı. Bul haqqında men keyinirek tolıq toqtap ótemen.
Aldımızǵa qoyǵan maqsetlerdi tek ǵana ózimiz – úlken turmıslıq tájiriybege iye máhálle baslıqları hám belsendileri, húrmetli nuranıylarımız, apa-qarındaslarımız, kúsh-ǵayratlı jaslarımız, zıyalılarımız, istiń kózin biletuǵın isbilermenlerimiz, Watan qorǵawshıları, bir sóz benen aytqanda, pútkil xalqımız benen birgelikte ámelge asıramız.
Húrmetli deputat hám senatorlar!
Biz Jańa Ózbekstandı qurıwda sheshiwshi basqıshqa qádem qoymaqtamız. Bul joldaǵı jumıslarımız hár bir taraw hám tarmaqta tereń transformaciyanı talap etedi. Maqsetimiz anıq: jaqın jıllarda jan basına dáramatı ortashadan joqarı bolǵan mámleketler qatarına kiriw.
Ferǵana oypatlıǵınan Aralboyına shekem, Zarafshan oypatlıǵınan Qashqadárya hám Surxandáryaǵa shekem, Tashkentten Jizzaq hám Sırdáryaǵa shekem – elimizdiń qaysı aymaǵında jasamasın, hár bir puqaramız reformalardıń nátiyjesin kúndelikli turmısında jáne de kóbirek seziwi kerek. Sonıń ushın, kirip kiyatırǵan 2026-jıl mámleketlik basqarıw, sud-huqıq sisteması, ekonomika tarmaqları, bilimlendiriw, ilim, medicina, mádeniyat, sport, ekologiya sistemasın – barlıq-barlıq tarawlardı rawajlandırıwda túpkilikli burılıs jılı boladı.
Endi Múrájattıń tiykarǵı bólegi – 2026-jılı ámelge asırılatuǵın eń áhmiyetli 6 tiykarǵı baǵdardan ibarat baǵdarlama haqqında hár tárepleme toqtap ótemiz.
Birinshi tiykarǵı baǵdar – máhálle infrastrukturasın bunnan bılay da jaqsılaw, olarǵa Jańa Ózbekstan kórinisin alıp kiriwden ibarat.
Watan abadanlıǵı, bárinen burın, máhálleden baslanadı. Áyne, máhálledegi jol, suw, elektr hám transport támiynatı, baqsha, mektep hám shańaraqlıq poliklinikadaǵı sharayatlarǵa qarap, adamlar reformalarımızǵa baha beredi. Sonlıqtan máhálle sistemasın rawajlandırıw mámleketlik siyasattıń tiykarǵı baǵdarı bolıp kelgen hám sonday bolıp qaladı.
Máhálle infrastrukturasın pútkilley jaqsılaw arqalı biz mámleketimizdi hár tárepleme rawajlandırıw, onıń kelbetin jáne de gózzal hám abat etiw baǵdarındaǵı jumıslardı dawam ettiremiz.
Házirgi waqıtta qaysı máhállede jol, qaysısında suw yamasa elektr máselesi, basqasında baqsha, mektep, medicina, jáne birewinde turaq jay menen baylanıslı máselelerge ayrıqsha sheshim berilmekte. Ashıq aytıw kerek, bunıń ózi menen máhálledegi barlıq máseleler tolıq sheshilip qalmaydı. Sonıń ushın kelesi jıldan máhálleni rawajlandırıw boyınsha kompleksli qatnas engiziledi.
Hár bir wálayatta 2-3 rayondı tańlap, olardaǵı barlıq máhállede barlıq mashqalalardı bir waqıttıń ózinde sheshetuǵın sistema jaratamız. Bul jańa tájiriybeni Urgut rayonınan basladıq. Rayonda 100 mıń xalıqqa mólsherlengen zamanagóy ekoqala qurıladı. Kelesi jılı 544 milliard sum ajıratılıp, 72 baqsha, mektep, poliklinika, sonday-aq, ishki jollar qurıladı hám ońlanadı, kanallar beton menen qaplanadı, 2 sel-suw saqlaǵıshı qurıladı.
Tańlap alınǵan 33 rayon hám 330 awır sharayatlı máhálledegi jumıslar da usı tárizde shólkemlestiriledi. Olarda bir waqıttıń ózinde isbilermenlik infrastrukturası da rawajlandırıladı. Bul maqsetler ushın barlıq derekler esabınan 8,5 trillion sum qarjı ajıratıladı.
Deputatlarǵa óz okrugindegi mashqalalardı sheshiw ushın 500 milliard sum, hár bir deputatqa 3,3 milliard sumnan berip atırmız. Bul baǵdarda “jasıl aymaq,” “jasıl baǵ” jaratıw boyınsha hár bir deputattıń baslamasına qosımsha 330 million sumnan qaratamız. Bunday qatnas arqalı 2030-jılǵa shekem barlıq rayonlardaǵı máhállelerge Jańa Ózbekstan kórinisin alıp kelemiz.
Álbette, bul jumıslardı nátiyjeli shólkemlestiriw ushın rayon byudjetiniń dáramatların keminde 2 esege kóbeytiwge sharayat jaratıp beriw zárúr. Usı maqsette, 2026-jıl 1-yanvardan baslap, qosımsha qun salıǵınan túsimniń Tashkent qalasında 5 procenti, qalǵan aymaqlarda 20 procenti qaldırılıp, bul qarjınıń yarımı rayonlardıń byudjetine ótkeriledi.
Bunnan tısqarı, dáramatlardıń prognozǵa salıstırǵanda arttırıp orınlanǵan bóleginiń 50 procenti, egislik jerlerdi ijaraǵa beriw hám bazarlardan túsimler de tolıq rayon byudjetine beriledi.
Wálayat, rayon hákimlerine nátiyjesiz hám bir-birin qaytalaytuǵın shtat birliklerin qısqartıp, únemlengen qarjını xalıq ortalıǵında qoyǵan máselelerdi sheshiw ushın ajıratıwǵa ruqsat beriledi. Bul arqalı rayonlardıń byudjetinde jılına 5 trillion sumlıq qosımsha derek qáliplesedi hám ol máhállelerdiń infrastrukturasın jaqsılawǵa jumsaladı.
Kelesi jılı birinshi márte máhálle infrastrukturasın rawajlandırıw ushın 20 trillion sumdı wálayatlardıń ózine berip atırmız. Eń áhmiyetlisi, bul qarjılardıń hár bir sumı xalqımız ushın qosımsha qun jaratıwı zárúr. Sonıń ushın bul pullar ulıwma qaysıdur rayon ushın emes, al máhállede jumıs orınların jaratatuǵın, xalıqtı dáramatlı etetuǵın anıq joybarlarǵa baǵdarlanadı.
Márhamat, qaysı máhálleniń baslıǵı, hákim járdemshisi hám máhálle bankiri joybar islep, onı tiykarlap berse, zárúr qarjını alsın. Sonda ádalatlı boladı.
Bul – byudjet qarjıların nátiyjeli jumsawda joybarlıq qatnas boladı.
Urbanizaciya hám qalalardı turaqlı rawajlandırıw boyınsha jańa reformalardı baslaymız. Sonıń ishinde, qalalardıń tártipsiz keńeyiwiniń aldın alıw boyınsha anıq normalardı belgileymiz hám sol arqalı egislik maydanlarınıń tiykarsız qısqarıp ketiwine shek qoyıladı.
Máselen, xalqı 250 mıńnan aslam qalalar házirgidey tártipsiz keńeyip bara berse, 2050-jılǵa barıp 27 mıń gektar egislik maydanları joǵaladı. Álbette, buǵan jol qoyıw múmkin emes.
Sonday-aq, respublikamızda birinshi márte 45 aglomeraciya aymaǵın belgileymiz. Kelesi jılı “Turaqlı qala” platformasın iske qosıp, “jasaw ushın qolaylıq indeksi”n júrgiziw jolǵa qoyıladı. Bul indeks arqalı qalalardaǵı hár bir máhállege tán mashqalalar anıqlanıp, olarǵa sáykes sheshimler beriledi.
Biz kámbaǵallıqtı qısqartıw máselesin ulıwma milliy háreketke aylandırdıq. Tákirar aytaman, ótken dáwirde 8,5 millionnan aslam xalıqtı kámbaǵallıqtan shıǵarıwǵa eristik.
Tiykarǵı maqsetimiz – adamlarımızdı turaqlı dáramatlı etiwden ibarat. Pulı bar adam jaqsı kiyiniw hám awqatlanıwǵa, sapalı bilimlendiriw hám qánigeli medicinalıq xızmetten paydalanıwǵa, mazmunlı dem alıwǵa, bir sóz benen aytqanda, abadan jasawǵa umtıladı.
Áhmiyetlisi, bul processte isbilermenlerimiz sheshiwshi kúsh sıpatında eń aldınǵı qatarda turıp, sanaat hám servis obektlerin shólkemlestirip, turaqlı jumıs ornın jaratıwda, xalqımızdı, ásirese, jaslar hám hayal-qızlardı kásipke úyretip, máhállelerdiń ózinde jumıslı hám dáramatlı etiwde ayrıqsha jankúyerlik kórsetpekte. Sonıń ushın isbilermenlikti qollap-quwatlaw boyınsha siyasatımızdı dawam ettirip, 2026-jılı tiykarǵı salıq stavkaların ózgerissiz qaldıramız; isbilermenlik infrastrukturası joybarlarına 10 trillion sumnan aslam qarjı ajıratıladı; kishi hám orta biznesti rawajlandırıw ushın 140 trillion sum resurs beriledi.
Bunnan tısqarı, 2026-jılı “máhállede sanaat hám xızmet” joybarı arqalı 10 mıńnan aslam óndiris hám xızmet kórsetiw joybarların iske qosıw ushın 5 trillion sum kredit beriledi. Kredit procentiniń milliy valyutada 10 procentke shekemgi, sırt el valyutasında 4 procentke shekemgi bólegi Isbilermenlik kompaniyasınan qaplap beriledi. Bunıń ushın da byudjetten 400 milliard sum qaratıladı. Nátiyjede máhállelerde 100 mıń jańa jumıs ornı jaratıladı.
Hár bir máhállede 40 tan mikrojoybardı ámelge asırıp, 360 mıń xalıqtı jumıs penen támiyinlew ushın máhálle bankirleri hám hákim járdemshilerine 2026-jılı jáne 7,5 trillion sum resurs ajıratıladı.
Jańa jılda máhállelerdegi xalıqtı, atap aytqanda, hayal-qızlardı sportqa keńnen tartıw, onıń ushın zárúr infrastrukturanı jaratıw boyınsha úsh jıllıq baǵdarlama qabıl etip, oǵan 1 trillion sum qaratamız. Máhálle jaslarınıń kitapqumarlıqqa bolǵan qızıǵıwshılıǵın jáne de arttırıw maqsetinde mektep kitapxanaların hár jılı 10 million kórkem ádebiyatlar menen támiyinlep baramız.
Mine, usınday jumıslarımızdıń nátiyjesinde 2026-jılı 1 million adamdı turaqlı jumıs penen támiyinlep, 181 mıń shańaraqtı kámbaǵallıqtan shıǵaramız, kámbaǵallıq hám jumıssızlıq dárejesin 4,5 procentke túsiremiz, kámbaǵallıqtan jıraq máhállelerdiń sanın 3,5 mıńǵa jetkeremiz.
Qádirli watanlaslar!
Ekinshi tiykarǵı baǵdarımız – ekonomikanı texnologiyalıq hám innovaciyalıq ósiw modeline ótkeriwden ibarat.
Dúnya kóleminde báseki barǵan sayın kúsheyip atırǵan házirgi sharayatta ǵana joqarı qosımsha qunlı ónim islep shıǵaratuǵın mámleketler ǵana dúnya bazarında óz ornına iye bolmaqta. Sonıń ushın ekonomikanıń barlıq tarawlarında joqarı nátiyjelilikke erisiw – keleshekte reformalarımızdıń baslı ólshemi bolıwı shárt.
Máselen, sanaatta joqarı texnologiyalıq hám az energiya tutınıwshı tarmaqlardı rawajlandırıwımız esabınan usı jılı 1 dollar ónim ushın jumsalatuǵın janılǵı-energiya muǵdarın 13 procentke azaytıwǵa eristik. Sonıń ózi jáne 1 milliard dollar muǵdarında qosımsha qun jaratıw imkaniyatın berdi.
Bul mısal sonı kórsetedi, qay jerde jańa texnologiya hám joqarı mamanlıqtaǵı kásip iyeleri bolsa, sol tarmaqta ósiw, rawajlanıw bolıp atır.
Sonıń ushın 2030-jılǵa shekem jalpı ishki ónim kólemin 240 milliard dollardan arttırıw ushın eń durıs jol – barlıq tarawlardı texnologiyalıq hám innovaciyalıq ósiw modeline ótkeriw bolıp esaplanadı. Bul – kelesi jıllarda ekonomikalıq rawajlanıw strategiyamızdıń tiykarǵı baǵdarı boladı.
Elimizdegi qolaylı biznes ortalıǵı, demografiyalıq ósiw, insan kapitalına berilip atırǵan itibar – Ózbekstandı investorlar ushın eń tartımlı mámleketlerden birine aylandırmaqta. Máselen, biz toǵız jılda barlıq ekonomika tarmaqlarına 130 milliard dollar muǵdarında sırt el investiciyasın alıp keldik. Usı jıldıń ózinde sırt elli sheriklerimiz benen jáne 140 milliard dollarlıq jańa investiciyalıq kelisimlerge eristik.
Kelesi jılı 50 milliard dollar sırt el investiciyasın tartamız. Bunnan bılay hár bir dollar investiciya, bárinen burın, aldınǵı texnologiyalar hám olardıń transferi; sırtqı bazarı anıq, joqarı qosımsha qunlı ónimler islep shıǵarıwǵa; energiya, suw, jer hám basqa da tábiyǵıy resurslardan paydalanıwda nátiyjelilikti arttırıwǵa; jergilikli jumısshılardı jańa texnologiyalar menen islewge oqıtıw hám miynet ónimdarlıǵın arttırıwǵa xızmet etiwi kerek. Yaǵnıy joqarı texnologiya hám jańa kompetenciyalar alıp kirgen, eksport ushın islegen investor eń isenimli sherigimiz boladı.
Bunday strategiyalıq investorlarǵa joybar ushın jerler bazar bahasında tikkeley beriledi. Jerdiń kategoriyası ózgergende nabıt bolǵanlıq ushın tólemdi 10 jılǵa shekem bólip-bólip tólewge ruqsat beriledi. Jerdi rásmiylestiriw, kategoriyasın ózgertiw, qurılıs hám infrastrukturaǵa jalǵanıwǵa ruqsatnama alıw ushın investorlar úyme-úy júrmeydi. Olarǵa “bir ayna” principi tiykarında kompleksli xızmet kórsetetuǵın “invest.gov.uz” elektron platforması iske qosıladı hám barlıq ministrlikler oǵan jalǵanadı.
Sonıń menen birge, erkin ekonomikalıq zonalarǵa dúnyanıń belgili brendlerin tartamız. Bul zonalardaǵı kárxanalar xalıqaralıq texnikalıq reglamentler, ekologiyalıq hám miynet standartların qollanıwı múmkin boladı. Olar ushın arnawlı – jeńilletilgen investiciyalıq, salıq, bajıxana hám huqıqıy rejim engiziledi hám xalıqaralıq huqıq sheńberinde arbitraj kelispewshiliklerin kórip shıǵıw imkaniyatı jaratıladı.
Bulardıń barlıǵı – kelesi bes jılda 180 milliard dollarlıq sırt el investiciyası esabınan 1 million joqarı dáramatlı jumıs orınların jaratıwǵa xızmet etedi.
Elimizge investiciyalar aǵımın kóbeytiw boyınsha da oǵada úlken rejelerimiz bar. Sonıń ushın hár bir kelisimdi joybarǵa aylandırıw, investiciyalardı qısqa múddette tartıw hám olardıń nátiyjeliligine juwapker, tek ǵana investiciya menen isleytuǵın ayrıqsha jańa sistema shólkemlestiriledi.
Bunnan tısqarı, jergilikli sanaat hám kooperaciyanı rawajlandırıw boyınsha da tap usınday óz aldına sistemanı jolǵa qoyıw maqsetke muwapıq.
Ulıwma, ekonomikanı básekige shıdamlı etiw, investiciyalardıń nátiyjeliligin arttırıw, sanaat tarmaqların texnologiyalıq transformaciyalaw pútkilley jańa qatnaslardı talap etpekte. Bunıń ushın Ekonomika hám qarjı, Investiciyalar, sanaat hám sawda ministrlikleriniń jumısı túp-tiykarınan qayta kórip shıǵıladı.
Jańa texnologiyalıq basqıshqa ótiw hám qosımsha qun shınjırın keńeytiw boyınsha sanaattı rawajlandırıw baǵdarlamasın baslaymız. Onda kelesi bes jılda sanaatta qosımsha qundı házirgi 36,5 milliard dollardan keminde 60 milliard dollarǵa jetkeriwdi (ósiw 1,6 ese); joqarı hám ortasha joqarı texnologiyalı tarmaqlardaǵı ónimlerdiń kólemin 2,5 esege arttırıwdı maqset etip belgilep alamız. Oǵan puqta tayarlıq kóriw maqsetinde 2026-jılı 52 milliard dollarlıq 782 jańa sanaat hám infrastruktura joybarına start beriledi.
Kelesi jıldıń ózinde 14 milliard dollarlıq 228 jańa iri quwatlıq iske qosıladı. Máselen, Nawayıdaǵı altın kánlerinde ruda qazıp alıw boyınsha 320 million dollarlıq joybar (3-gezegi) iske qosılıp, qosımsha 2 million tonna ruda qayta islenedi. Sonday-aq, “Murıntaw” kánin ózlestiriwdiń gezektegi basqıshı hám gúmis kánleri boyınsha 2 milliard 300 million dollarlıq iri joybarlar ámelge asırıladı. Nátiyjede jılına 18 million tonna rudanı qayta islew quwatlılıǵı jaratılıp, 2030-jılǵa shekem altın islep shıǵarıw kólemi 175 tonnaǵa jetkeriledi.
Jáne bir iri joybar – Almalıq kombinatında bahası 2 milliard 700 million dollar, quwatlılıǵı 300 mıń tonna mıs katodınan ibarat bolǵan jańa metallurgiya kompleksin qurıw baslanadı.
“Samarqand ximiya” zavodında 381 million dollar investiciya esabınan jılına 370 mıń tonna fosforlı hám 540 mıń tonna quramalı tóginler islep shıǵarıw jolǵa qoyıladı.
Qashqadáryada 200 million dollarlıq jańa ximiya zavodınıń qurılısı baslanadı.
Ulıwma, 2026-jılı ximiya sanaatında – 4,5 milliard dollarlıq; taw-kán metallurgiya, neft-gaz, avtomobil qurılısı, toqımashılıq hám qurılıs materialları tarmaqlarınıń hár birinde – 3 milliard dollardan; elektrotexnikada – 2 milliard dollarlıq; farmacevtikada – 800 million dollarlıq jańa joybarlar baslanadı. Usı tárizde 2026-jılı jámi eksportımızdı 40 milliard dollarǵa jetkerip, tayar hám yarım tayar ónim úlesin 55 procentten arttıramız.
Kelesi jılı ekonomikada 6,6 procent ósiwdi támiyinlep, jalpı ishki ónimdi 167 milliard dollarǵa jetkeriw prognoz etilmekte. Eger miynet ónimdarlıǵı, energiya nátiyjeliligi hám ózine túser bahası boyınsha qattı islense, bul kórsetkishti jáne de arttırıw ushın barlıq imkaniyatlar bar.
Sonıń ushın sanaatta “Ónimdarlıq hám nátiyjelilikti eki ese arttırıw” baǵdarlamasın baslaymız. Ekonomika hám qarjı ministrligi tárepinen miynet ónimdarlıǵı hám energiya nátiyjeliligi boyınsha óz aldına joybar ámelge asırıladı. Bul joybarǵa xalıqaralıq finans institutlarınan 200 million dollar kredit hám grant tartılıp, sanaat kárxanaları ushın sırt elden joqarı mamanlıqtaǵı texnolog hám injenerler alıp kelinedi; biznes processleri sanlastırıladı; energiya hám basqa da qárejetlerdi qısqartıw boyınsha auditler ótkeriledi; aldınǵı texnologiyalar transfer etiledi.
Bul baǵdarda “Tórtinshi sanaat revolyuciyası orayı” shólkemlestiriledi. Oray tiykarında robototexnika, internet buyımları, “aqıllı” fabrika sıyaqlı “Industriya 4.0” sheshimlerin sanaat kárxanalarında engiziw ushın “tártipke salıw mexanizmi” jaratıladı. Onda kárxanalar jańa texnologiyalardı óndiriske engiziwden aldın olardı sınaqtan ótkeriw imkaniyatına iye boladı.
Akkreditaciya, metrologiya hám standartlastırıw tarawlarındaǵı reformalarımız nátiyjesinde Ózbekstan “Globallıq sapa infrastrukturası” indeksinde sońǵı eki jılda 15 tekshe joqarılap, 185 mámleket ishinde 52-orınǵa kóterildi.
Bul álbette jaqsı. Sonıń menen birge, ónimlerimizdiń básekige shıdamlılıǵın jáne de arttırıw ushın texnikalıq tártipke salıw tarawın jańa basqıshqa alıp shıǵamız. Bunıń ushın “Mámleketlik qadaǵalaw” sistemasınan xalıqaralıq tájiriybede joqarı nátiyje bergen “Bazar qadaǵalawı” sistemasına ótemiz. Sonday-aq, innovaciya tiykarında joqarı texnologiyalıq ónim islep shıǵarıp atırǵan kárxanalardı xoshametleymiz. Olar usınday ónimdi ótken jılǵa salıstırǵanda arttırsa, kóbeygen ónim kólemi bahasınıń 5 procenti muǵdarında subsidiya beriledi. Kárxana qánigeleriniń ilimiy-izertlew hám konstruktorlıq qollanbalardan alǵan dáramatı salıqtan azat etiledi.
Mine usınday reformalar arqalı kelesi bes jılda sanaatta miynet ónimdarlıǵı házirgi 16,5 mıń dollardan 30 mıń dollarǵa jetkeriledi; 1 mıń dollarlıq qosımsha qun jaratıwǵa ketetuǵın energiya jumsalıwı 1,5 esege azaytıladı.
Bıyıl IT, finanslıq texnologiyalar, jasalma intellekt sıyaqlı baǵdarlardaǵı jergilikli startaplarǵa sırt elden 270 million dollar investiciya tarttıq. Kelesi jıldan “Sanlı startaplar” baǵdarlamasın keńeytip, startap ideyasınan eksportqa shekem járdemlesetuǵın jańa sistemanı jolǵa qoyamız. Onda jeke menshik startap orayların shólkemlestiriw ushın Jaslar qorınan bes jıl múddetke 5 milliard sumǵa shekem procentsiz ssuda beriledi. Joqarı oqıw orınlarınıń ózinde qalatuǵın qarjılardıń 10 procenti de inkubaciya orayların rawajlandırıwǵa baǵdarlanadı.
Bunnan tısqarı, Oraylıq bankte Finanslıq texnologiyalar ofisi hám Innovaciyalıq xab shólkemlestirilip, oǵan Singapurdan qánigeler tartıladı. Bul arqalı jılına 20-30 finanslıq texnologiyalar startapın sırtqı bazarǵa alıp shıǵıw, olarǵa jámi 1 milliard dollar investiciya tartıw imkaniyatı jaratıladı.
Ulıwma, venchur fondlar, startaplar, finanslıq texnologiyalar sıyaqlı jańa finanslıq instrumentler bazarın rawajlandırıw, bul tarawdaǵı barlıq qatnasıwshılardıń huqıqların nızam menen kepillep qoyıw zárúr. Bunıń ushın parlamentimiz húkimet penen birgelikte “Alternativ investiciya qorları haqqında”ǵı nızam joybarın 1-martqa shekem islep shıqsa, áyne maqsetke muwapıq boladı.
Bıyıl mámleketimizde IT xızmetleriniń eksportı birinshi márte 1 milliard dollardı quradı. Biz 2030-jılǵa barıp, IT xızmetleriniń eksportın 5 milliard dollarǵa jetkeriw boyınsha úlken shek alǵanbız. Sonıń ushın jáhán bazarında básekige shıdamlılıqtı arttırıw ushın Sanlı texnologiyalar xalıqaralıq orayın shólkemlestirdik, IT infrastrukturasına investiciya kirgiziw ushın bir qatar jeńillikler berdik.
Kelesi jılı Tashkent qalası, Buxara, Ferǵana hám Tashkent wálayatlarında 4 data-oray, 2 super kompyuter hám 15 joqarı oqıw ornında jasalma intellekt laboratoriyasınıń jumısı jolǵa qoyıladı. Bul – medicina, transport, awıl xojalıǵı, geologiya, bank-qarjı, jámiyetlik qáwipsizlik sıyaqlı áhmiyetli tarawlarda 100 den aslam jasalma intellekt joybarların ámelge asırıwǵa xızmet etedi.
Búgingi kúnde mıńlaǵan qábiletli jaslarımız IT hám jasalma intellekt boyınsha izleniw alıp barmaqta. Olardıń kvant, dron, robototexnika sıyaqlı baǵdarlardaǵı konstruktorlıq joybarların ámeliyatqa engiziw ushın Sanlı texnologiyalar orayı shólkemlestiriledi. Aziya rawajlanıw banki bunı qollap-quwatlap, 200 million dollar ajıratıwǵa tayar ekenin bildirdi.
Jasalma intellekt penen birge júretuǵın kosmos tarawındaǵı izertlewlerdi rawajlandırıw, joldas baylanıs texnologiyaların engiziw baǵdarında da úlken qádemler tasladıq. Bul baǵdarda 2028-jılı Samarqandta Xalıqaralıq astronavtika kongressin ótkeriwge puqta tayarlıq kórmektemiz.
Búgin sizlerge jáne bir áhmiyetli jańalıqtı aytpaqshıman. Ǵárezsiz Ózbekstan tariyxında birinshi márte kosmos tarawında jasalma joldas hám mámleketimiz puqarası bolǵan birinshi ózbek kosmonavtın kosmosqa ushırıw boyınsha jumıslardı basladıq. Bul – Jańa Ózbekstannıń ilimiy hám texnologiyalıq rawajlanıwına, ulıwma, milliy rawajlanıwımızdı jańa basqıshqa alıp shıǵıwǵa úlken túrtki beredi, dep isenemen.
Húrmetli ánjuman qatnasıwshıları!
Bizge belgili, óndiris te, tutınıw da turaqlı ósiwi ushın uzaq múddetli qarjı zárúr. Sonıń ushın kapital bazarın ekonomikalıq ósiwdi xoshametlewshi áhmiyetli institucionallıq baǵana sıpatında belgilep, global depozitariylerdi milliy fond bazarımızǵa alıp kiriwimiz kerek. Bunıń ushın xalıqaralıq finans shólkemleri menen islep shıǵılǵan “Kapital bazarı haqqında”ǵı jańa nızam joybarın tez pursatta qabıl etiw zárúr.
Kurs ózgeriwi boyınsha qáwip-qáterlerdi azaytıw ushın jergilikli kompaniyalarǵa ishki bazarda da sırt el valyutasında obligaciya shıǵarıwǵa ruqsat beriledi.
Kelesi jılı kárxanalarımız birinshi márte xalıqaralıq bazarlarda da akciyaların jaylastırıwı múmkin boladı.
Ulıwma etip aytqanda, kapital bazarın rawajlandırıw arqalı isbilermenlerge qosımsha 1 milliard dollar tartıw imkaniyatı jaratıladı.
2026-jılı jasırın ekonomikanı qısqartıw boyınsha da túpkilikli burılıstı ámelge asıramız. Kórilgen ilajlarımız nátiyjesinde baqlanbaytuǵın ekonomika úlesin 45-50 procentten 28 procentke azaytıwǵa eristik. Biraq bul ele dáslepki qádemler ǵana.
Bul baǵdardaǵı jumıslardı kúsheytiw ushın ayrıqsha baǵdarlama qabıl ettik. 2026-jılı barlıq mámleketlik xızmetler hám kommunallıq tólemler, janılǵı, alkogol hám temeki ónimleri, avtomobil hám kóshpes múlk sawdaları naq pulsız tólew formasına ótkeriledi; salıq, bajıxana, sanitariyalıq-epidemiologiyalıq qadaǵalaw, standart, karantin, qurılıs qadaǵalaw inspekciyası, órt qáwipsizligi sıyaqlı 17 túrdegi tekseriwlerde “bodikamera”dan paydalanıw májbúriy boladı.
“Sayadaǵı” ekonomikadan ıqtıyarlı túrde ashıq-aydınlıqqa shıqpaqshı bolǵan isbilermenler buxgalteriya, statistika, salıq esabatların júrgiziw boyınsha biypul oqıtıladı.
Ulıwma, baǵdarlama sheńberinde kelesi bes jılda jasırın ekonomikanıń úlesi 2 esege qısqartıladı; sawda hám servis tarawlarında naq pulsız tólemlerdiń úlesi 75 procentten arttırıladı; rásmiy sektorda bánt bolǵan xalıqtıń sanı házirgi 8,5 millionnan 14 millionǵa jetkeriledi.
Bir sóz benen aytqanda, “Hadal miynet – tınısh turmıs hám abadan jámiyet girewi,” degen súren tiykarında bul baǵdardaǵı jumıslar ulıwma milliy háreketke aylandırıladı.
Ayırım watanlaslarımızda tapqan dáramatın ekonomikaǵa baǵdarlaw, bank depozitine jaylastırıw, aktivlerin óz atına rásmiylestiriw menen baylanıslı qáweterler bar. Sonıń ushın deputatlarımız hám Oraylıq bank xalıqaralıq shólkemler menen másláhátlesip, puqaralarımız elimizde yamasa sırt elde usı waqıtqa shekem alǵan dáramat hám aktivlerinen emin-erkin paydalanıwına sharayat jaratıw boyınsha usınıslar tayarlasa, durıs boladı, dep oylayman.
Húrmetli parlament aǵzaları!
Endi, ruqsatıńız benen, úshinshi tiykarǵı baǵdar – ishki bazarda talaptı xoshametlew máselesine toqtap ótpekshimen.
Bazarlarımızdaǵı molshılıq, bahalardıń turaqlılıǵı, xalıqtıń tutınıw talabınıń artıp baratırǵanı – turmıs sapasınıń jaqsılanıp atırǵanın kórsetetuǵın eń tiykarǵı faktor.
Ishki talaptı xoshametlewshi áhmiyetli faktorlardan biri, bul – inflyaciya dárejesi.
Biz toǵız jılda qolaylı biznes ortalıǵın jaratıp, tovar hám xızmetlerdiń kólemin hám túrin kóbeytkenimiz; xalıqtı dáramatlı etip, kámbaǵallıqtı keskin qısqartqanımız; kem dáramatlı shańaraqlar ushın da jılına keminde 1 milliard dollar arzan kredit berip atırǵanımız; bahanı jılawlap, inflyaciya dárejesin “bir tańbalı” sanǵa túsirgenimiz nátiyjesinde xalıqtıń satıp alıw qábileti 2 esege ósti.
Bir ǵana mısal, bes jıl aldın xalqımız jılına 210 mıń kvartira, 600 mıń avtomobil satıp alǵan bolsa, bıyıl 270 mıń turaq jay, 1 million mashina satıp aldı. Eger xalıqtıń dáramatı, satıp alıw qábileti artpaǵanda, kóshpes múlk hám avtomobil bazarınıń ózi 20 milliard dollarǵa jeter me edi?
Ótkerilgen sorawlar da, xalıqaralıq ekspertlerdiń tallawları da 75 procent xalıqtıń finanslıq jaǵdayı keskin jaqsılanǵanın tastıyıqlamaqta. Álbette, bul nátiyjeler menen sheklenip qalmastan, xalqımızdıń dáramatın hám satıp alıw qábiletin arttırıw boyınsha jumıslardı izbe-iz dawam ettiremiz.
Tallawlarǵa bola, xalıqtıń dáramatı 10 procentke kóbeyse, tutınıw 8 procentke artadı. Bul – jańa ónim hám xızmetlerge talap, bul – qosımsha quwatlıqlar, qosımsha jumıs ornı, degeni.
Xalıqtıń talabınan kelip shıǵıp, ekonomikada eń úlken talap jaratatuǵın turaq jay ipotekasına 2026-jılı 23 trillion sum resurs ajıratamız. Turaq jay satıp alıwda baslanǵısh tólem hám procent tólemleriniń bir bólegin qaplaw ushın 2 trillion 700 milliard sum subsidiya beriledi. Sonday-aq, bir kvartira ushın ajıratılatuǵın jeńilletilgen ipoteka kreditiniń muǵdarı 15 procentke arttırıladı.
Kelesi jılı 140 mıń kvartiralı kóp qabatlı turaq jaydıń qurılısı xojalıq ushın zárúr tutınıw tovarlarına talaptı arttıratuǵını tábiyǵıy, álbette. Bul talaptı finanslıq derekler menen támiyinlew maqsetinde 2026-jılı bıyılǵı 104 trillion sumnıń ornına 125 trillion sumlıq tutınıw krediti ajıratıladı.
Ulıwma, 2026-jılı qurılıs jumıslarınıń kólemin 11 procentke kóbeytip, 30 milliard dollarǵa jetkeriwdi rejelestirip atırmız.
Bunıń ekonomikaǵa qanday tásir kórsetiwin esaplap kóreyik. Qurılıs materialı, úy-ruwzıgershilik ushın toqımashılıq ónimleri, elektr texnikası, mebel qurılısı sıyaqlı tarmaqlar, bul obektlerge xızmet kórsetetuǵın servis tarawları ushın qosımsha 5 milliard dollarlıq bazar boladı. Bul – 300 mıń qosımsha jańa jumıs ornı degeni.
Xalıqtıń dáramatınıń kóbeygeni xızmetlerge talaptı arttırıp, servis tarawı ekonomikanıń “drayveri”ne aylanıwı ushın úlken túrtki bermekte. Usı jıldıń ózinde xızmetler kólemi derlik 15 procentke ósip, 82 milliard dollarǵa jetti.
Xızmetlerge bolǵan talaptı xoshametlew ushın 2026-jılı tarawǵa 85 trillion sum kredit, 9 trillion sum subsidiya ajıratamız. Atap aytqanda, bilimlendiriw xızmetleri ushın byudjetten 7 trillion sum beriledi.
Keyingi bes jılda sırt el turistleriniń sanın 2 esege – 11 millionnan 20 millionǵa, turizm xızmetleriniń kólemin bolsa 20 milliard dollarǵa jetkeriw boyınsha úlken shek alıp atırmız. Usı maqsette turizm infrastrukturasın rawajlandırıwǵa ayrıqsha itibar qaratıp atırmız. Samarqandta Bibixanım, Registan kompleksleri, Ámir Temur maqbarası, Ulıǵbek observatoriyası, Shohi Zinda hám Afrosiyob muzeyin bir-birine baylanıstıratuǵın zamanagóy jol hám kópirler qurıladı.
Shahrisabzda “Ǵelon” iri turistlik kompleksiniń birinshi basqıshı iske qosıladı. Pap rayonında “Arashan” taw-dem alıw turistlik zonası shólkemlestiriledi. Xiywadaǵı Ishanqaladı immersiv, yaǵnıy, “janlı” hám “aqıllı” muzey-qalaǵa aylandıramız. Xorezm hám Qaraqalpaqstandaǵı arxeologiyalıq estelikler boylap iri turizm aylanbası shólkemlestiriledi.
Sonday-aq, jańa jılda isbilermenler tárepinen 4 milliard dollarlıq 3,5 mıńnan aslam jańa servis obektleri iske qosıladı. Turizm orayların shólkemlestiriw ushın kelesi úsh jılda 5 mıń gektar jer aukcionǵa shıǵarıladı.
Bunnan tısqarı, 2026-jıldan “Ózbekstan miyrası miymanxanaları” baǵdarlamasın baslaymız. Mádeniy miyras obektlerinde jeke menshik sheriklik tiykarında “butik miymanxana” shólkemlestiriw ushın abıraylı miymanxana tarmaqları alıp kelinedi. Baǵdarlama qatnasıwshılarına jer, múlk, payda salıqları hám bajıxana tólemi boyınsha jeńillik beriledi.
Mine, usı jumıslardıń esabınan 2026-jılı xızmetler bazarın 100 milliard dollardan arttıramız.
Turistler aǵımınıń barǵan sayın artıp atırǵanı aviaciya hám temir jolda jolawshı tasıw quwatlılıǵın 2 esege kóbeytiwdi talap etpekte. Sonıń ushın 2026-jılı aviaparktegi hawa kemeleriniń sanın 105 ten 120 ǵa jetkeremiz. Jergilikli aviaqatnawlar sanın arttırıw ushın subsidiyalawdıń jańa sisteması engiziledi.
Endi, bahasına qaramastan, satılǵan hár bir bilet ushın anıq muǵdarda subsidiya ajıratıladı. Bul – bilet bahasın tómenletiw hám talaptı arttırıwǵa xızmet etedi.
Sonıń menen birge, jańa samolyotlarımız ushın ushıwshılar, olarǵa texnikalıq xızmet kórsetiwshiler, aeroportlar ushın servis hám basqarıw tarawında maman qánigelerdi tayarlaw maqsetinde Puqaralıq aviaciya universiteti shólkemlestiriledi.
Qubla Koreyanıń “Hyundai Rotem” kompaniyasınan 6 tezjúrer poezd alıp kelemiz. Onıń birinshi sostavı jaqın kúnlerde keledi.
Ulıwma, ishki temir jollardı rawajlandırıw boyınsha bes jıllıq baǵdarlama qabıl etiledi.
Qalalardı tezjúrer poezdlardıń qatnawı menen baylanıstırıw ushın 2026-jıldan jáne 500 kilometr temir jol qurıwǵa kirisemiz. Kelesi jılı 110 kilometr temir jol tarmaǵı qurılıp, Bwka, Piskent, Bekabad, Boyovut rayonları jáne Nurafshan qalası paytaxt penen baylanısadı. Tashkent – Samarqand jónelisinde joqarı tezlikte háreketlenetuǵın jolawshı poezdları ushın jańa temir jol liniyasın qurıwdı baslaymız. Tashkent, Samarqand, Buxara, Xiywa, Nawayıdaǵı vokzallar da jeke menshik sheriklik ushın beriledi.
Birlesken Milletler Shólkeminiń tallawına bola, sapalı jollar ekonomikamızdıń keminde 2 procent ósiwine túrtki beredi.
Avtomobil jollarınıń sapasın jaqsılaw, tranzit potencialın jáne de arttırıw maqsetinde bes jıllıq baǵdarlama ámelge asırıladı. Onda Ándijan menen Qońırattı, Tashkent penen Termizdi, Samarqand penen Shahrisabzdı, Alat penen Sariosiyanı baylanıstıratuǵın, uzınlıǵı 4 mıń kilometr magistral jollardı xalıqaralıq talaplarǵa say “avtoban”larǵa aylandıramız.
2026-jıldıń ózinde Qaraqalpaqstan, Buxara, Qashqadárya hám Surxandárya aymaǵınan ótken ulıwma paydalanıwdaǵı 300 kilometr jollarda rekonstrukciya jumısları juwmaqlanadı.
Tashkent – Samarqand, Tashkent – Ándijan, Tashkent – Bostanlıq, Pungon – Namangan hám Qarshı – Shahrisabz jónelisinde joqarı tezlikte háreketleniwge mólsherlengen 800 kilometr jollardıń qurılısına úlken tayarlıq kórip, birge islesiwshilerdi belgilep aldıq.
Tashkent – Samarqand jolınıń qurılısı mart ayınan, qalǵan jollar boyınsha ámeliy jumıslar bolsa 1-iyulden keshiktirmey baslanadı. Jáne 1 mıń 200 kilometr jollar 2030-jılǵa shekem xalıqaralıq finans institutları menen birgelikte qayta qurıladı.
Endi jollardı joybarlastırıwda xalıqtıń pikirin, transport qatnawınıń qorshaǵan ortalıqqa tásirin esapqa alıw, piyadalar ushın “tosqınlıqsız” ortalıq jaratıw boyınsha qatań talaplar nızam dárejesinde bekkemlenedi.
Jol qurılısına aldınǵı texnologiyalar hám standartlardı engiziw tiykarǵı princip sıpatında belgilenedi. Parlamentimiz “Avtomobil jolları haqqında”ǵı nızamdı jańa redakciyada qabıl etiwde jollardı rejelestiriw sistemasın názerde tutsa, maqsetke muwapıq boladı.
Xalıqtıń dáramatı, sırt el turistleriniń aǵımı barǵan sayın artıp atırǵanı kelesi bes jılda azıq-awqatqa bolǵan talaptı 1,5 esege arttıradı. Sonıń ushın awıl xojalıǵı ónimleriniń kólemin házirgi 40 milliardtan 60 milliard dollarǵa jetkeriw boyınsha úlken shek alamız.
Eki hápte aldın agrar taraw wákilleri menen ushırasıp, awıl xojalıǵında zúráátlilikti jańa texnologiyalar tiykarında arttırıw boyınsha barlıq máselelerdi sheshimi menen dodalap aldıq.
Ulıwma, jańa jılda awıl xojalıǵın qollap-quwatlaw ushın 52 trillion sum ajıratamız.
Azıq-awqat ónimlerin xalqımızǵa turaqlı bahada jetkerip beriw de tolıq reformalanadı. Bazarlarımızdı tiykarǵı azıq-awqat ónimleri menen jıl – on eki ay turaqlı bahada támiyinlew ushın 2026-jıldan turaqlı intervenciya sistemasına ótemiz. Aymaqlardaǵı “Azıq-awqat qorları”na ajıratılatuǵın resurstı 2,5 esege kóbeytip, 500 milliard sumǵa jetkeremiz. Sonday-aq, miywe-ovoщqa qánigelesken 1 mıń máhállede sıyımlılıǵı 100 tonnaǵa shekemgi kishi suwıtqıshlı qoymaxanalar qurıladı.
Bul jumıslarımız kelesi jılı inflyaciya dárejesin 6-6,5 procentke túsiriwge xızmet etedi.
Húrmetli watanlaslar!
Kásiplerdi rawajlandırıw hám jańa miynet bazarı arxitekturasın jaratıw – kelesi jıl ushın baǵdarlamamızdıń tórtinshi tiykarǵı baǵdarı bolıp esaplanadı.
Házirgi waqıtta jańa texnologiyalar, sanlastırıw hám jasalma intellekt tásirinde dúnyada jumıs orınlarınıń sanı, túri hám mazmunı keskin ózgermekte. Jaqın bes jılda bar kásiplerdiń 30 procenti tolıq avtomatlastırıladı, 50 procenti boyınsha bolsa jańa mamanlıqlar talap etiledi.
Bul processler bizdi de shetlep ótip atırǵan joq. Sanaatta – avtomatlastırılǵan liniyalar, agrar tarawda – aqıllı texnologiyalar, transportta – intellektuallıq basqarıw kúndelikli hádiysege aylanıp barmaqta.
Endi mámleketimizdiń miynet bazarı pútkilley jańa arxitektura tiykarında – kásip, mamanlıq, texnologiya hám bilimlendiriwdi birlestiretuǵın birden-bir mexanizm sıpatında islewi zárúr.
Qánigelerdiń pikirinshe, balada qanday da bir kásipke qızıǵıwshılıq 7-klastan baslanıp, qaysı kásipti tańlaytuǵını 9-klasta tolıq málim boladı. Sonıń ushın 9-klass pitkeriwshilerin pánlerdi ózlestiriwi hám kásiplik qızıǵıwshılıǵına qarap tańlap alıw sistemasın engizemiz. Onda joqarı oqıw orınlarına kiriw tileginde bolmaǵan jaslar texnikumlarǵa jiberiledi.
Jaqında texnikumlarǵa zamanagóy kórinis hám jańasha ortalıq alıp kiriw boyınsha bes jıllıq baǵdarlamanı tastıyıqladıq.
Meniń niyetim – jaslarımız talap joqarı bolǵan kásipler boyınsha dúnyada básekige shıdamlı bolsın, kerek bolsa, basqalardan bir tekshe ústin tursın. Bul maqsetke erisiw jolında kásiplik bilimlendiriwdiń eń áhmiyetli buwını bolǵan texnikumlardı jańa sapa basqıshına alıp shıǵamız. Bunıń ushın, 2026-jıldan baslap, hár jılı keminde 100 texnikumdı tolıq ońlap, texnologiyalıq hám talap joqarı bolǵan kásiplerge sáykes halda úskenelep baramız. Germaniya, Shveycariya, Ullı Britaniya, Qıtay, Koreya sıyaqlı mámleketlerdiń aldınǵı bilimlendiriw baǵdarlamaları engizilgen texnikumlardıń sanın 100 ge jetkeremiz.
Búgin sizlerge jáne bir jańalıq jetkermekshimen: 2026-jılı 7 wálayatta, 2027-jılı bolsa qalǵan aymaqlarda Aldınǵı kásiplik sheberlik texnikumı hám “Kásipler qalashası” jumısı jolǵa qoyıladı. Onda Aldınǵı kásiplik sheberlik texnikumları aymaqtaǵı basqa texnikumlar ushın metodikalıq hám ámeliy baza sıpatında jumıs alıp barsa, “Kásipler qalashası” – mektep oqıwshıların qurılıs, servis, awıl xojalıǵı, sanaat, transport, “jasıl” energetika sıyaqlı tarawlardaǵı zamanagóy kásiplerge baǵdarlawǵa xızmet etedi.
Bul sistemanı mámleketimizde úsh jıl aldın jolǵa qoyıp, oqıwshılardı qamtıp alıwdı 15 procentke jetkerdik.
Búgin avtomobil qurılısı, “jasıl” energetika, qurılıs, transport, toqımashılıq, awıl xojalıǵı, turizm, servis, IT sıyaqlı baǵdarlarda 70 mıńǵa shamalas oqıwshı “dual bilimlendiriw” tiykarında oqıp, ayına 10 million sumǵa shekem miynet haqı almaqta.
Endi texnikum hám jumıs beriwshiler arasındaǵı birge islesiwdi jańa basqıshqa alıp shıǵamız. Atap aytqanda, “dual tálim” tiykarında oqıtıwdı nátiyjeli shólkemlestirgen kárxanalarǵa 7 jıl múddetke 5 milliard sumǵa shekem jeńilletilgen kredit ajıratıladı; isbilermenlik reytinginde qosımsha 5 ball beriledi; kárxanalar jumısqa alǵan texnikum oqıwshısı ushın 1 procentlik sociallıq salıq jeńilligi jáne úsh jılǵa sozdırıladı.
Sonday-aq, 2026-jıldan baslap texnikumlarda bilim alıp atırǵan 100 mıń oqıwshıǵa birinshi márte stipendiya tólenedi; “ayrıqsha” bahalarǵa oqıp atırǵan, tańlaǵan kásibin puqta iyelep atırǵan perzentlerimizge bolsa arttırılǵan muǵdardaǵı stipendiyalar beriledi.
Ekonomikanıń tiykarǵı baǵdarları ushın joqarı intellektuallıq potencialǵa iye bolǵan kadrlardı tayarlawǵa itibardı kúsheytiwimiz zárúr.
Jizzaq politexnika institutın Vengriyanıń abıraylı “Obuda” universitetiniń basqarıwına beriw boyınsha qarar qabıl ettik.
Jaqında Yaponiyaǵa saparımız dawamında Ózbekstanda “Cukuba” milliy universiteti menen birgelikte anıq pánler boyınsha jańa joqarı oqıw ornın shólkemlestiriw haqqında kelisip aldıq.
Biz bul tájiriybeni dawam ettirip, anıq pánler hám texnika baǵdarındaǵı joqarı oqıw orınlarımızǵa dúnyanıń eń abıraylı universitetlerin tartamız.
Jáne bir másele – miynet bazarına jılına 300 mıń joqarı maǵlıwmatlı kadrlar kirip kelmekte. Endi joqarı oqıw ornı pitkeriwshileri hám jumıs beriwshiler arasında kópir bolıp xızmet etetuǵın sanlı ekosistema jaratamız. Jáne bir másele – miynet bazarına jılına 300 mıń joqarı maǵlıwmatlı kadrlar kirip kelmekte. Endi joqarı oqıw ornı pitkeriwshileri hám jumıs beriwshiler arasında kópir bolıp xızmet etetuǵın sanlı ekosistema jaratamız. Onda studentlerdiń akademiyalıq kórsetkishleri hám kárxanalardaǵı bos jumıs orınları haqqındaǵı maǵlıwmatlar onlayn túrde kórinip turadı. Bul ekosistema pitkeriwshi kurs studentleri ushın ózine say jumıs tabıw, kárxanalarǵa bolsa maman kadrlardı tartıw imkaniyatın beredi.
Bıyıl densawlıqtı saqlaw xızmetkerleri menen eki márte ushırasıp, kórip shıǵılǵan barlıq máseleler boyınsha óz aldına párman hám qararlar qabıl ettik.
Medicina sistemasında da kásiplik bilimlendiriwdi rawajlandırıw ushın Angliyanıń “Pearson” kompaniyası menen hár bir aymaqtaǵı birewden texnikumda xalıqaralıq standart tiykarında miyirbiykeler tayarlaw baslandı. Endi mine usı texnikumlarǵa Germaniya, Shveycariya, AQSh, Yaponiya sıyaqlı mámleketlerdiń bilimlendiriw baǵdarlamaları da engiziledi. Usı tiykarda xalıqaralıq talaplarǵa juwap beretuǵın, shet tillerdi biletuǵın miyirbiykeler quramın qáliplestiremiz.
Keń kólemli reformalarımızdı densawlıqtı saqlaw sistemasın sanlastırıw boyınsha da jedel dawam ettiremiz. Medicina mákemelerin birden-bir kózqaras tiykarında shólkemlestiriw ushın “master reje” islep shıǵıladı.
Bunnan tısqarı, infarkt, insult, onkologiyalıq, nefrologiyalıq sıyaqlı juqpalı bolmaǵan keselliklerdi emlew hám transplantaciya, vakcinaciya, ana-bala salamatlıǵın qorǵaw baǵdarlarına ótken jıllarǵa salıstırǵanda 1,5 esege kóp – 3,5 trillion sum ajıratamız.
Qádirli doslar!
Ekologiyalıq teńsalmaqlılıqtı támiyinlew, “jasıl” energetika hám suw resurslarınan aqılǵa uǵras paydalanıw besinshi tiykarǵı baǵdarımız bolıp esaplanadı.
Iri kárxanalarǵa filtr, tazalaw qurılmasın hám hawaǵa shıǵarılatuǵın zıyanlı zatlardı monitoring etiw stanciyasın ornatıw ushın birinshi basqıshta 100 million dollarlıq kredit liniyası ashıladı.
Kelesi jılı Samarqandta Global ekologiyalıq fondtıń gezektegi assambleyası hám Oraylıq Aziya xalıqaralıq ekokórgizbesi ótkeriliwi rejelestirilgen. Bul ilajlar tarmaqlar, aymaqlar hám biznes ushın sherikler tabıw, jańa ekologiyalıq joybarlardı birgelikte baslawǵa úlken imkaniyat jaratadı.
Tashkent qalası hám Tashkent wálayatında 2 mıńǵa shamalas kómir hám gazde ısıtılatuǵın ıssıxana bar. Olardan hawaǵa jılına 137 mıń tonna zıyanlı zat shıǵadı. Endi kómirde filtrsiz isleytuǵın qazanxanalardan waz keshemiz. Olardı paytaxt átirapınan kóshirip, barlıq jerde oraylasqan qazanxanalar arqalı ısıtıwdı jolǵa qoyamız. Usı maqsette 200 gektardan az bolmaǵan agroklasterler shólkemlestiriledi, olardıń quramına ótetuǵın ıssıxanalarǵa ayrıqsha subsidiya beriledi.
Qalalarımızdaǵı tıǵılıslar tek ǵana adamlardıń turmısın qıyınlastırıp qoymastan, al ekologiyaǵa da úlken zıyan jetkermekte. Sonlıqtan, dúnya tájiriybesinen kelip shıǵıp, avtomobiller shıǵarıp atırǵan zıyanlı elementlerdiń dárejesine qarap, ekologiyalıq stikerler sisteması engiziledi. Úlken muǵdarda zıyanlı elementler shıǵaratuǵın avtomashinalardıń paytaxt hám wálayat orayları jáne qalalarǵa kiriwi sheklenedi. Bunday transport quralların jańasına almastırıw yamasa olarǵa filtr ornatıw ushın mámleket tárepinen qollap-quwatlaw ilajları kóriledi.
Bunıń ushın óz aldına Qor shólkemlestiriledi. Eski mashinasın almastıraman degenlerge avtokredit procentiniń bir bólegi qaplap beriledi. Filtr ornatıp, zıyandı azaytıwǵa tayar bolǵan aydawshılar ushın qárejetleriniń bir bólegi boyınsha subsidiya ajıratıladı.
Ázim paytaxtımız hám iri qalalarda jámiyetlik transporttı rawajlandırıw tiykarǵı wazıypamız boladı. Qala kóshelerinde avtobus hám taksiler ushın arnawlı jollar kóbeytiledi. Tashkent, Samarqand hám Namangan qalalarında transport háreketin intellektuallıq svetoforlar arqalı basqarıw sisteması engiziledi.
Ekologiyalıq avtomobillerdi kóbeytiw boyınsha bes jıllıq baǵdarlamanı ámelge asıramız. Onda jergilikli elektromobillerge 12 procentlik, sırt el elektromobillerine bolsa 16 procentlik avtokreditler ajıratıladı.
Elektromobillerdi quwatlaw stanciyaların shólkemlestiriw ushın isbilermenlerge 10 procentlik jeńilletilgen kreditler beriledi; jerlerdi aukcionnan 2 ese arzan bahada satıp alıw imkaniyatı jaratıladı.
Elektromobillerdi quwatlaw stanciyalarında avtomobillerdi zaryadlawda 1 kilovatt-saat elektr energiyası bahasınıń 300 sumnan asqan bólegi mámleketlik byudjetten qaplap beriledi.
Elektromobilde taksi xızmetin kórsetetuǵın puqaralarǵa da bir qatar jeńillikler beriledi.
Eń tiykarǵısı, bul jumıslardı durıs jolǵa qoysaq, paytaxtımız, wálayat orayları hám iri qalalar tek ǵana ekotransport háreketlenetuǵın aymaqqa aylanadı.
Shań-tozańlardıń aldın alıw ushın Surxandáryada 10 mıń gektarda “jasıl mákan” hám Sırdáryada 84 kilometrlik “jasıl diywal” qurıladı. Qaraqalpaqstan, Xorezm, Buxara hám Nawayıda jámi 250 mıń gektar, sonıń ishinde, Araldıń qurıǵan ultanında 115 mıń gektar jerde terek hám putalar egiledi.
Hár bir aymaqta botanika hám dendrologiya baǵları jáne 20 danadan saya-salqın seyil etiw kósheleri qurıladı.
Kárxanalarda ekostandartlardı engiziw ushın kelesi bes jılda keminde 30 mıń ekologiya menedjerine talap payda boladı. Sonıń ushın 2026-jılı hár bir aymaqta “jasıl” texnikumlar shólkemlestirilip, dual bilimlendiriw tiykarında jılına 10 mıń qánige tayarlaw jolǵa qoyıladı.
Jańa jılda Oraylıq Aziya Jasıl universitetiniń jumısın keńeytemiz.
Hawa, suw hám topıraq sapasın anıqlaw imkaniyatın beretuǵın kompleksli laboratoriyalar shólkemlestiriledi. Qalalarda tábiyiy ventilyaciyanı kúsheytiwge qaratılǵan izertlewler ótkeriledi.
Ulıwma, ekologiya tarawına 2026-jılı 1 trillion 900 milliard sum qaratıladı.
Keyingi bes jılda 6 mıń megavattlı quyash, samal hám gidroelektr stanciyaları iske qosıldı, ulıwma generaciyada “jasıl” energiyanıń úlesi 30 procentke jetti.
Jaqında sheriklerimiz benen jámi 3,5 mıń megavattlı 4 milliard 200 million dollarlıq jańa “jasıl” quwatlıqlardıń qurılısına start berdik. Bul jumıslarımız arqalı 2026-jıldıń ózinde 7 milliard kub metr tábiyǵıy gaz únemlenedi hám hawaǵa 11 million tonna zıyanlı elementlerdiń shıǵıwınıń aldı alınadı.
Húrmetli watanlaslar!
Dúnyada suw tamtarıslıǵı mashqalası barǵan sayın áhmiyetli bolıp barmaqta. Sonıń ushın reformalarımızdıń dáslepki kúnlerinen-aq suwdan aqılǵa uǵras paydalanıwdı mámleketlik siyasat dárejesine alıp shıqtıq.
Jaqında suwdı únemleytuǵın texnologiyalardı keńnen qollanıw, suw imaratların modernizaciyalaw, suwǵarıw ilajları boyınsha kelesi úsh jılǵa bahası 5,5 milliard dollarlıq úlken baǵdarlama qabıl ettik.
Baǵdarlama sheńberinde suwdı únemleytuǵın texnologiyalardıń qamtıp alıwı 61 procentke yamasa 2,6 million gektarǵa jetkeriledi. Nátiyjede jılına 2,5 milliard kub metr suw únemlenedi, 200 mıń tonna puwlı gaz azaytıladı.
Ulıwma, suwdı únemleytuǵın texnologiyalardı engiziw ilajlarına 2026-jılı jámi 3 trillion 300 milliard sum qaratıladı.
Sonday-aq, 1 mıń 300 kilometr iri magistral kanallar beton menen qaplanadı. Onıń ushın byudjetten 3 trillion sum jumsaladı. Bul qosımsha túrde jılına 500 million kub metr suwdı únemlew imkaniyatın beredi.
Bunnan tısqarı, orınlardaǵı ashıq drenaj hám kollektorlardı jabıq sistemaǵa ótkeriw boyınsha óz aldına baǵdarlama qabıl etemiz. Bul maqsetlerge dáslepki basqıshta 2026-jıl ushın 100 million dollar ajıratamız.
Kanallardı jabıq sistemaǵa ótkeriw boyınsha da úlken joybarlardı baslaymız. Qashqadáryadaǵı “Paxtaabad” kanalın basımlı qubırǵa ótkeriw boyınsha 134 million dollarlıq joybar bul baǵdardaǵı birinshi qádem boladı.
Bular arqalı qosımsha túrde 20 mıń gektar egislik jer ashıladı, jáne 25 mıń gektar maydan kepillengen suw menen támiyinlenedi.
Házirgi waqıtta paytaxtımız, wálayat orayları hám qalalarda “jasıl” aymaqlardı kóbeytiw ushın suwǵarıw, drenaj sistemaların qayta tiklew zárúr. Bir sóz benen aytqanda, qalalardıń barlıq kóshelerindegi salmalarda suw aylanıwı kerek. Bunıń ushın 160 million dollarlıq úlken baǵdarlama sheńberinde Tashkent qalasında 150 kilometr jabıq drenaj sisteması qurıladı, 197 kilometr kanal hám kollektorlar ońlanadı; 63 kilometr jańa kanallar qurılıp, qalada salqın mikroklimat jaratıladı.
Basqa aymaqlardıń basshıları da shetten keminde 20-25 million dollar qarjı alıp kelip, kelesi jıldan wálayat orayları hám iri qalalarda bunday joybarlardı baslaydı.
Húrmetli deputat hám senatorlar!
Altınshı tiykarǵı baǵdarımız bolǵan zamanagóy mámleketlik basqarıw hám ádil sud-huqıq sisteması baǵdarındaǵı reformalarımızdı dawam ettiremiz.
Bárinen burın, 2026-jıldan baslap Elektron húkimet platforması túp-tiykarınan jańalanadı. Endi barlıq mámleketlik uyımlardıń 1 mıńnan aslam mámleketlik xızmetleri; 5 mıńnan aslam funkciya hám wazıypaları; 200 maǵlıwmatlar bazası hám málimleme sisteması; 100 mıńnan aslam mámleketlik xızmetkerdiń máhálle, rayon, wálayat, respublika dárejesindegi wákillikleri Birden-bir sanlı platformaǵa integraciyalanadı.
Platformaǵa kelip túsken múrájatlar, olardı orınlawshılarǵa bólistiriw hám kórip shıǵıw múddetin qadaǵalaw jasalma intellekt arqalı ámelge asırıladı.
Ápiwayı etip aytqanda, máhálleden baslap respublika dárejesinde sheshiletuǵın hár bir máseleniń orınlawshısı, múddeti, resursı bir jerde kórinip turadı.
Eń áhmiyetlisi, mámleketlik xızmetlerdi kórsetiwde insan faktorısız, korrupciya hám artıqsha byurokratiyadan jıraq ekosistema jaratamız. Mámleketlik xızmetlerdi proaktiv hám jıynalmalı túrde kórsetiw sistemasın rawajlandıramız.
Ápiwayı sózler menen túsindirsem, jańa úy qurǵan puqara kadastr hújjetin alıw ushın múrájat etse, jańa platforma suw, elektr hám gazge jalǵanıw máselesin de dárhal sheship beredi. Bunday xızmetler 2026-jılı 100 ge jetkeriledi.
Sh.Shermatov, A.Toshqulov, U.Husainov kelesi jılı Namangan, Surxandárya wálayatları hám Tashkent qalası, sonday-aq, olardaǵı rayon hám máhállelerde qurılıs, ádillik, joqarı bilimlendiriw, salıq uyımları hám olardıń wálayat, rayon bólimlerinde usı platformanı tolıq sınaqtan ótkeriwi shárt.
Hár bir ministr, tarmaq basshısı hám hákimler de jańa jılda tap usınday jumıslardı óz rayonındaǵı sistemada jolǵa qoyıwdı baslawı, mámleketlik xızmetlerdi xalıqqa jáne de jaqınlastırıw boyınsha juwapkershilikli islewi kerek.
Húrmetli májilis qatnasıwshıları!
Búgingi kúnde Oliy Majlisimiz eń kúshli parlamentlerge tán bolǵan barlıq qadaǵalaw wákilliklerine iye. Atap aytqanda, 2023-jıldan berli sırtqı qarız muǵdarın parlamentimiz belgilep kelmekte.
Endi mámleket kepilligi astında sırtqı qarız alıw máselesin maqullawdı da parlament wákilligine ótkersek, ne deysizler?
Kóplegen islep shıǵarıwshılar hám isbilermenlerdiń pikirin úyrenip, 2026-jıl 1-yanvardan mámleketlik satıp alıwlarda ashıq-aydın hám ádil sistema jaratıp atırmız. Bul – isbilermenlerimizge 300 trillion sumlıq kepillikli bazarda ózleriniń tovar hám xızmetleri menen belsene qatnasıwı ushın úlken imkaniyatlar esigin ashadı.
Bunnan bılay mámleketlik satıp alıwlarda tovar, jumıs hám xızmetlerdi tikkeley satıp alıw múmkin bolǵan jaǵdaylar tek ǵana nızam menen belgilenedi.
Xabarıńız bar, konstituciyalıq reformalarımız sheńberinde wálayat hákimleri hám jergilikli keńeslerdiń basshıları lawazımların bir-birinen ajıratqan edik. Endi bul sistema 2026-jıl 1-yanvardan 208 rayon hám qalada da jolǵa qoyıladı. Házirgi waqıtta bul áhmiyetli siyasiy reforma – hákimler hám atqarıw uyımlarınan Keńeslerge múnásibetti pútkilley ózgertiwdi talap etedi.
Bunnan bılay deputat sorawlarınıń orınlanıwı hár sherekte tallanıp, nemquraydılıqqa jol qoyılǵan jaǵdaylar boyınsha prokuraturaǵa usınıs kirgiziledi.
Reformalardıń nátiyjeliligin támiyinlewde puqaralıq jámiyeti institutlarınıń roli áhmiyetli.
Sol sebepli olardı qollap-quwatlaw boyınsha siyasat keleshekte de izbe-iz dawam ettiriledi. Atap aytqanda, puqaralıq jámiyetin rawajlandırıw boyınsha bes jıllıq strategiya islep shıǵıladı. Bul institutlarǵa sociallıq buyırtpa beriw sisteması sanlastırılıp, qarjılandırıw kólemi 2 esege arttırıladı.
Bunnan tısqarı, qayırqomlıq shólkemlerin dúziw tártibi ápiwayılastırıladı, esap beriw hám ashıq-aydınlıq mexanizmleri jetilistiriledi.
Qaytalap aytaman, elimizdegi keń kólemli jańalanıwlar dáwirinde ashıq-aydınlıq siyasatınan hesh qashan artqa qaytpaymız. Sóz hám baspasóz erkinligin támiyinlew tiykarǵı wazıypamız bolıp qaladı.
Húrmetli deputat hám senatorlar!
Sud-huqıq sistemasın xalıqqa jaqınlastırıwǵa qaratılǵan jumıslarımızdı izbe-iz dawam ettiremiz.
Biz ádil sudlaw procesin “sanlı sud” koncepciyası tiykarında shólkemlestiriwdi basladıq. Endi tergewdi de sanlastırıw arqalı insan huqıqlarınıń qorǵalıwın kúsheytemiz. Onda jınayat haqqındaǵı arzanı qabıl etiwden baslap, isti sudqa ótkeriwge shekemgi basqıshlarǵa jasalma intellekt texnologiyaları engiziledi hám insan faktorı qısqartıladı.
Elimizde tergew sudyaları jumıs baslaǵanı – xalıqaralıq tán alınǵan “Xabeas korpus” institutın qollanıwdıń gezektegi áhmiyetli basqıshı boldı. 2026-jıldan tergew sudyalarına sankciya hám májbúrlew sharaların ózgertiw hám biykarlaw wákilliklerin de beremiz. Ádil sudlawdı ámelge asırıwda jámiyetshiliktiń qatnasıwın hám rolin arttırıp baramız.
Endi jınayat procesine inglis huqıqındaǵı mámleketlerde unamlı nátiyje bergen “xalıq wákilleri kollegiyası” institutı basqıshpa-basqısh engiziledi. Onda oǵada awır hám jámiyette shawqımǵa sebep bolıp atırǵan jınayatlar jámiyetshilik wákilleriniń qatnasıwında kórip shıǵılıwı sud húkiminiń jáne de ádil bolıwına xızmet etedi.
Sud qararlarınıń sózsiz orınlanıwın támiyinlemey turıp, puqara hám isbilermenlerdiń huqıqınıń isenimli tikleniwine erisip bolmaydı. Sol sebepli májbúriy orınlaw procesine nátiyjeli alternativ mexanizmlerdi de kirgizemiz. Nátiyjede tarawǵa jasalma intellekt engizilip, kelesi eki jılda orınlaw háreketleriniń 30 procenti insan faktorısız ámelge asırıladı.
Kórip tursızlar, jedellik penen ózgerip atırǵan dúnyada náshebentlik qáwpi xalıqtıń genofondı ushın eń úlken qáwipke aylanıp barmaqta. Tilekke qarsı, búgingi globallasıw dáwirinde bunday qáwip-qáter Ózbekstandı da shetlep ótpey atır.
Bıyıl 14 mıńnan aslam náshebentlik jınayatı dizimge alınǵan. Olardıń 3 mıńǵa shamalasın jaslar islegenligi bárshemizdi tereń oylandırıwı kerek.
Narkotikalıq sawdalar transshegaralıq hám virtual xarakterge iye bolıp barmaqta. Bul bolsa jınayatlardı anıqlawda jańa usıllardı qollanıwdı, zamanagóy bilim hám kónlikpelerdi puqta iyelewdi talap etpekte.
Jaqında bul másele boyınsha Milliy baǵdarlama qabıl ettik. Endi narkojınayatshılıqqa qarsı gúresiwdi ulıwmamilliy háreketke aylandırıp, jámiyette bul illetke mawasasız ortalıq jaratamız.
Kim bul wazıypa tek ǵana huqıq qorǵaw uyımlarınıń jumısı, dep oylasa, qátelesedi.
Elimizdegi hár bir bala, hár bir jas – biziń perzentimiz, olardı náshebentlik tásirine taslap qoyıwǵa hasla jol qoymaymız.
Náshebentlikti tamırı menen joq etiw, jaslarımızda kúshli ruwxıy immunitetti qáliplestiriw boyınsha barlıq kúsh hám imkaniyatlarımızdı jumsaymız.
Narkojınayatlarǵa qarsı gúresiw boyınsha respublikalıq jumısshı topar mámleketlik uyımlardıń kúsh hám imkaniyatların iske qosıp, kelesi jılı narkotiklerdi islep shıǵarıw hám tarqatıw kanallarına shek qoyıw boyınsha jańa sistema jaratsın.
Bul – Prezidenttiń tapsırması, bul – ata-analardıń qálewi, bul – jámiyettiń talabı!
Tınıshlıq húkim súrgen, nızam ústin bolǵan, puqaralardıń qáwipsizligi támiyinlengen jerge investiciya da keledi, bul jerde turizm de rawajlanadı. Biraq sońǵı waqıtları ózin nızamnan ústin qoyǵan, isbilermenlerge basım ótkerip, olardıń biznesin iyelep alıwǵa urınıp atırǵan, ekonomikamızǵa úlken zıyan keltiretuǵın quramalı finanslıq jınayatlardı islep atırǵan, ózin “qazı” dep esaplap, adamlar arasındaǵı qarjı almasıw máselelerin sheship júrgen ayırım jınayıy toparlar da baqlanbaqta.
Eń ashınarlısı, “ańsat pul tabaman,” degen úmitte bileginde kúshi bar ayırım sportshılar da bunday jınayıy toparlarǵa qosılıp qalmaqta.
Jáne bir jaman tárepi – Ózbekstan puqaralarınan ibarat jınayıy toparlardıń ayırım sırt mámleketlerde de bar ekenligi elimizdiń xalıqaralıq abırayına unamsız tásir kórsetpekte.
Hámme esitsin: bunday jınayıy toparlardıń jumısına shek qoyıwǵa kúsh-qúdiretimiz jetedi hám onı álbette isleymiz!
Ózbekstanda – puqaralarımız, isbilermenlerimiz hám investorlarımızdı hár qanday jaǵdayda da isenimli qorǵaytuǵın mámleket bar, Konstituciya bar, nızamlar bar!
Hayal-qızlardıń qádir-qımbatın ornına qoyıw, perzentlerimizdi qorǵaw – ázelden er adamlar ushın ar-namıs hám maqtanısh máselesi bolıp kelgen. Biraq jámiyetimizde hayal-qızlar hám balalardıń hár qıylı zorlıqlarǵa ushırap atırǵanı ullı tariyxqa, joqarı mánawiyat hám aǵartıwshılıqqa iye bolǵan, shańaraqtı muqaddes dep biletuǵın xalqımızǵa hasla jaraspaydı.
Keyingi eki jılda hayal-qızlar hám balalarǵa shańaraqlıq zorlıq jaǵdayları boyınsha 2 mıńnan aslam jınayat anıqlanǵan.
Hesh qashan umıtpayıq, shańaraqlıq zorlıq – bul tek ǵana shańaraqtıń ishki isi emes, bul – pútkil jámiyetke tiyisli másele. Hayaldı óz mashqalası menen jalǵız qaldırıwǵa hesh kimniń haqısı joq!
Hayal-qızlar hám balalarǵa bolǵan zorlıqtıń aldın alıw boyınsha respublikalıq muwapıqlastırıwshı keńesi barlıq mámleketlik uyımlar hám keń jámiyetshilikti mobilizaciya etken halda, bunday unamsız jaǵdaylardı saplastırıw boyınsha nátiyjeli jumıs isleytuǵın sistema jaratsın.
Parlamentimiz, puqaralıq jámiyeti institutları da bul processlerde belsene qatnassa, álbette nátiyje boladı.
Qayta-qayta aytaman. Korrupciya – mámlekettiń rawajlanıwına tosqınlıq etetuǵın, ádillik hám nızam ústinligin izden shıǵaratuǵın, jámiyette isenim ortalıǵın tómenletetuǵın eń áhmiyetli qáwip.
Korrupciyaǵa jol qoyıw bolsa – reformalarımızǵa qıyanet bolıp esaplanadı. Bul illetke qarsı gúresiw boyınsha 2026-jılı “ayrıqsha jaǵday” járiyalaymız.
Barlıq uyımlarda komplaens hám korrupciyaǵa qarsı ishki qadaǵalawǵa juwapker orınbasar lawazımı engiziledi. Esap palatasınıń wákili jumısı jolǵa qoyıladı. Bul basshılar sistemadaǵı hadal emes shaxslardı anıqlaw, sonday-aq, byudjet qarjılarınıń talan-taraj etiliwi hám lawazımınan paydalanıw jaǵdaylarınıń aldın alıw boyınsha tásirsheń qadaǵalaw ornatadı hám Prezident aldında esap beredi.
Mámlekettiń hár bir sum qarjısı, resursı boyınsha jeke juwapkershilik kúsheytiledi.
“Lawazım, ataǵım bar, maǵan hesh kim tiymeydi,” degenler qátelesedi. Nızam aldında hámme teń!
Ishki isler, prokuratura, salıq, bajıxana, qarjı, bank, iri mámleketlik kompaniyalar, ministrlikler hám hákimlikler, bir sóz benen aytqanda, birde-bir uyım hám shólkem qadaǵalawdan shette qalmaydı.
Komplaens xızmetiniń jumısına tosqınlıq etkenler – korrupciyaǵa sherik, dep bahalanadı hám juwapkershilik soǵan jarasa boladı.
Prezident Administraciyası Komplaens xızmeti bul sistemanı 1-yanvardan baslap barlıq mámleketlik uyımlar hám shólkemlerde iske qosıp, dizgindi bekkem qolǵa alsın.
Lawazımına qaramastan, paraxorlıq hám óz mápine paydalanıw boyınsha hár bir jaǵday boyınsha Prezident Administraciyasınıń Komplaens xızmeti jeke maǵan maǵlıwmat kirgizip baradı.
Húrmetli májilis qatnasıwshıları!
Dúnyada quramalı geosiyasiy hám ekonomikalıq mashqalalar barǵan sayın háwij almaqta. Bunday qıyın jaǵdayda barlıq mámleketler menen teń huqıqlı hám konstruktivlik qatnasıqlardı jáne de bekkemlew, salmaqlı hám aqılǵa uǵras ashıq sırtqı siyasat alıp barıwǵa qaratılǵan jumısımızdı dawam ettiremiz.
Jaqın qońsılarımız benen kóp ásirlik doslıq, jaqsı qońsıshılıq, strategiyalıq sheriklik hám óz-ara isenim ruwxındaǵı baylanıslarımızdı bunnan bılay da rawajlandırıwǵa tiykarǵı áhmiyet qaratamız. Onda regionımız mámleketleri arasındaǵı sawda-ekonomikalıq, transport-logistika, energetika, suw, ekologiya, qáwipsizlik, mádeniyat hám bilimlendiriw tarawlarında birge islesiwdi jáne de tereńlestiremiz.
Awǵanstan menen sawda-ekonomikalıq birge islesiwdi keńeytiw, onı regiondaǵı ekonomikalıq processlerge keńnen tartıw tiykarǵı maqsetlerimizden biri bolıp qaladı.
Tiykarǵı sırt elli sheriklerimiz esaplanǵan Rossiya, Qıtay, Amerika Qurama Shtatları, Túrkiya, Germaniya, Franciya, Italiya, Ullı Britaniya, Qubla Koreya, Yaponiya, Saudiya Arabstanı, Birlesken Arab Ámirlikleri, Qatar, Iordaniya, Kuveyt, Oman, Hindstan, Pakistan hám basqa da mámleketler menen kóp táreplemeli hám óz-ara paydalı baylanıslardı bunnan bılay da keńeytiw itibarımız orayında boladı.
Sonday-aq, Qubla-Shıǵıs Aziya, Jaqın Shıǵıs, Afrika, Latın Amerikası mámleketleri menen jańa hám perspektivalı baǵdarlarda paydalı birge islesiwdi bekkemlew, Qubla Kavkaz hám Qubla Aziya mámleketleri menen qatnasıqlardı keńeytiw strategiyalıq baǵdarlarımızdan biri boladı.
Pursattan paydalanıp, búgingi ánjumanımızda qatnasıp atırǵan sırt mámleketlerdiń húrmetli elshilerine qarata: biz benen baylanıslardı keńeytip, Ózbekstannıń Jáhán sawda shólkemine aǵza bolıwın belsene qollap-quwatlap atırǵanı ushın mámleketlerińiz húkimetlerine ayrıqsha minnetdarshılıq bildiremen.
Abıraylı xalıqaralıq hám regionallıq shólkemler, ekonomikalıq institutlar menen tıǵız birge islesiwdi jańa basqıshqa alıp shıǵamız.
Xalıqaralıq valyuta qorı, Jáhán banki, Aziya rawajlanıw banki, Islam rawajlanıw banki, Evropa tikleniw hám rawajlanıw banki, Aziya infrastrukturalıq investiciyalar banki hám basqa da jetekshi finans institutları menen birgelikte ekonomikamızdı texnologiyalıq modernizaciyalaw, infrastrukturanı rawajlandırıw, turaqlı energetika hám transport joybarların ámelge asırıw baǵdarındaǵı jumıslardı dawam ettiremiz.
Ǵárezsiz Mámleketlerdiń Doslıq Awqamı, Shanxay birge islesiw shólkemi, Túrkiy mámleketler shólkemi, Islam birge islesiw shólkemi sheńberinde dástúriy, keń kólemli sheriklik baylanısların jáne de keńeytemiz.
Bunday ullı wazıypalar bizden elimizde tınıshlıq hám turaqlılıqtı, milletler hám dinleraralıq doslıq hám awızbirshilikti bunnan bılay da bekkemlew, Qurallı Kúshlerimizdiń jawıngerlik potencialın arttırıwdı talap etedi. Onıń ushın biz barlıq zárúr ilajlardı ámelge asıramız.
Áziz watanlaslarım!
Búgin sizler menen 2026-jıl hám kelesi bes jıl ushın úlken sheklerdi belgilep aldıq.
Erisilgen úlken nátiyjeler, jańa tiykarǵı wazıypalar “Ózbekstan – 2030” strategiyasın qayta kórip shıǵıwdı talap etpekte. Elimizdiń kelesi bes jıllıq rawajlanıwına baylanıslı bolǵan bul hújjet keń jámiyetshiliktiń dodalawınan ótkerilip, xalqımızdıń pikir-usınısları tiykarında jetilistiriledi. Parlament wákillerin de bul processte óz usınısları menen belsene qatnasıwǵa shaqıraman.
Kelesi jılı mánawiyat tarawın jáne de rawajlandırıp, sociallıq-mádeniy turmısımızdaǵı áhmiyetli sánelerdi keńnen belgileymiz. Sonıń ishinde, barlıq tabıs hám jeńislerimizdiń tiykarı bolǵan Watanımız ǵárezsizliginiń dańqlı 35 jıllıǵın úlken bayram sıpatında ótkeremiz.
Sonday-aq, Sahıpqıran Ámir Temur, Mir Áliysher Nawayı babalarımızdıń qutlı tuwılǵan kúnlerine tayarlıqtı házirden baslawımız kerek. Bunday ullı sánelerdi joqarı dárejede, hár tárepleme múnásip ótkeriw ushın álbette tiyisli qararlardı qabıl etemiz. Olardı ámelge asırıwda máhálleler, tálim-tárbiya orayları, miynet jámáátleri, zıyalılarımız, sırt eldegi elshixanalarımız, ulıwma, pútkil xalqımız belsene qatnasadı, dep isenemen.
Qádirli hám húrmetli watanlaslar!
Búgin sizlerge, sizler arqalı pútkil el-jurtımızǵa múrájat etip aytpaqshıman: búgin tariyxtıń ózi, turmıstıń ózi moynımızǵa úlken bir juwapkershilikti júklemekte.
Janajan Watanımız búgin jańasha siyasiy-huqıqıy, sociallıq, ruwxıy qatnasıqlar tiykarında jasap, miynet etip atırǵan, erkin pikirleytuǵın, azat hám erkin insanlardıń úlkesine aylanbaqta.
Hámmemizge belgili, Mırza Ulıǵbek babamız bunnan altı ásir burın adamzat ushın juldızlar kartasın jaratqan edi. Búgin bolsa biz házirgi hám keleshek áwladlarımız ushın baxıtlı ómirge alıp baratuǵın jol kartasın jaratıwımız kerek.
Mine usı haqıyqattı tereń sezinip, hámmemiz birlesip háreket etsek, hár qanday joqarı shekti iyelewge uqıplımız, hesh qanday kúsh bizdi óz jolımızdan qaytara almaydı.
Bir bolsaq, birden-bir xalıq, birden-bir millet bolıp alǵa umtılsaq, gózlegen úlken maqsetlerimizge álbette jetemiz!
Men bul jolda márt hám ullı mártebeli xalqımızǵa isenemen!
Ózbekstannıń sheksiz kúshi hám imkaniyatlarına, áziz jaslarımızdıń kúsh-ǵayratına isenemen!
Pursattan paydalanıp, el-jurt mápi, Watan táǵdirin oylap, muqaddes jerimizdiń haqıyqıy perzentleri, pidayı saqshıları bolıp, ózin ayamay, shın kewilden miynet etip atırǵan siz, ázizlerge, dóretiwshi xalqımızǵa shın kewilden minnetdarshılıq bildiremen.
Bársheńizge bekkem densawlıq, shańaraqlıq baxıt-ıǵbal, jańa jılda úlken tabıslar hám áwmetler tileymen.