Elimizde erteńgi keleshegimiz bolǵan jas áwladlardıń zaman talabına say bilim alıwı hám óner iyelewi ushın kóplegen qolaylı sharayatlar jaratılıp berilmekte. Ásirese, sociallıq qollap-quwatlawǵa mútáj balalardı hár tárepleme qorǵaw hám qollap-quwatlaw baǵdarında dıqqatqa ılayıqlı isler ámelge asırılmaqta.

Sonıń ishinde, hár jılı mámleketimizde jańa jıl bayramı aldında Prezidentimiz tárepinen baǵıwshısın joǵaltqan shańaraq balalarına bayram sawǵaların tapsırıw dástúrge aylanǵanın aytıp ótiwimiz orınlı.
Usınday bayram ilajı Qaraózek rayonında ótkerilip, onda rayon hákimi Anvar Baymuratov balalardı jańa jıl bayramı menen qızǵın qutlıqladı.
Ilajda Prezidentimizdiń balalarǵa bolǵan ayrıqsha ǵamqorlıǵına toqtalıp, bıyılǵı jıl jaslarımız turmısında úlken jańalanıwlar, jetiskenlikler menen juwmaqlanıp atırǵanlıǵın atap ótti hám rayon aymaǵında jasawshı baǵıwshısın joǵaltqan shańaraqlardıń balalarına Prezident sawǵaların tapsırıldı.
Bayram keshesinde balalarǵa arnalǵan koncert baǵdarlaması qoyıp berilip, bul jas áwladlar qálbinde umıtılmas tásirler qaldırdı.

Adilbay Orazov,
Qaraqalpaqstan xabar agentligi sholıwshısı.