Ózbekstan Respublikası Prezidentiniń “Jetim balalar hám ata-ana qaramaǵınan ayırılǵan balalardı mámleket tárepinen qollap-quwatlawdıń jańa sistemasın engiziw ilajları haqqında”ǵı ńararınıń orınlanıwı sheńberinde Qaraqalpaqstan Respublikasında jaslardı qollap-quwatlaw baǵdarında bir qatar iygilikli jumıslar ámelge asırıldı.

Atap aytqanda, juwmaqlanıp atırǵan 2025-jıl dawamında Qaraqalpaqstan boyınsha jámi 86 jas zamanagóy, barlıq qolaylıqlarǵa iye turaq jaylar menen támiyinlendi. Bul bolsa jaslardıń sociallıq qorǵalıwın kúsheytiw, olardıń erkin turmısqa qádem qoyıwı hám keleshek rejelerin ámelge asırıwında bekkem tiykar bolıp xızmet etpekte.
Qaraózek hám Nókis rayonlarında da usı qarardıń orınlanıwı sheńberinde 4 jasqa rayon oraylarında boy tiklegen turaq jaylardan zamanagóy 2 xanalı jaydıń giltleri saltanatlı túrde tapsırıldı. Bunday iygilikli isler Prezidentimiz tárepinen jaslarǵa bolǵan turaqlı itibar hám ǵamqorlıqtıń ayqın kórinisi bolıp esaplanadı.
Jaslar ushın jáne de keń imkaniyatlar jaratıw, olardıń turmıs sharayatın jaqsılaw hám sociallıq turaqlılıqtı támiyinlewge qaratılǵan bunday ilajlar ele de dawam ete beredi.

Qaraqalpaqstan xabar agentligi