“2026-jıl – Máhálleni rawajlandırıw hám jámiyetti ilgeriletiw jılı”.

Mámleketshilik tariyxımızda insan qádirin ulıǵlaw, xalıq penen pikirlesiw hám reformalardıń nátiyjesin hár bir shańaraqta seziw ullı maqset etip belgilengen. Mámleketimiz basshısı Shavkat Mirziyoevtiń Oliy Majliske hám Ózbekstan xalqına jollaǵan Múrájatında belgilep berilgen tiykarǵı wazıypalardıń orınlanıwı sıpatında 2026-jıldıń “Máhállelerdi rawajlandırıw hám jámiyetti ilgeriletiw jılı” dep járiyalanıwı Jańa Ózbekstannıń rawajlanıwında jańa dáwirdi baslap beredi.
Prezidentimizdiń atap ótkenindey, “Máhálle – jámiyettiń júzi. Eger máhálle abat bolsa, pútkil mámleket abat boladı. Máhállede ózgeris bolsa, demek, pútkil jámiyet ózgerip atır”. Bul qarar tiykarında mámleketlik basqarıwdı tikkeley xalıqqa jaqınlastırıw, adamlardıń dárti hám táshwishi menen jasawday joqarı juwapkershilik jámlengen.
Múrájatta ayrıqsha itibar qaratılǵan xalıqtıń salamatlıǵı máselesi 2026-jılı tikkeley máhálle dárejesindegi medicina menen úylesedi. Prezidentimiz alǵa qoyǵan “medicinanı xalıqqa jaqınlastırıw” ideyası tiykarında hár bir máhállede profilaktika hám salamat turmıs tárizin úgit-násiyatlaw jańa basqıshqa kóteriledi. Máhállelerde medicinalıq punktlerdiń jumısın jetilistiriw, tar sheńberdegi qánigelerdiń qatnasıwında medicinalıq tekseriwlerdi máhálleniń ózinde shólkemlestiriw arqalı keselliklerdi erte anıqlaw hám salamat millet genofondın saqlaw ilajları kóriledi. Sebebi, Prezidentimizdiń atap ótkenindey, “Biz ushın eń úlken baylıq – bul xalqımızdıń densawlıǵı bolıp esaplanadı” hám bul baylıqtı saqlaw máhálleden baslanadı.
Sonıń menen birge, Múrájatta ekologiyalıq turaqlılıq hám “Jasıl mákan” ulıwma milliy joybarınıń orınlanıwı máhálle belsendileriniń tiykarǵı wazıypalarınan biri sıpatında belgilendi. 2026-jılda hár bir máhálle óziniń “jasıl aymaǵı” hám baǵlarına iye bolıwı, qorshaǵan ortalıqtı qorǵaw mádeniyatı shańaraqlardan baslanıwı jámiyetti rawajlandırıwdıń áhmiyetli shárti bolıp esaplanadı. Máhálle kesiminde ekologiyalıq qadaǵalaw kúsheytilip, aymaqlardı shıǵındılardan tazalaw hám kóklemzarlastırıw jumısları ulıwmaxalıqlıq háreketke aylanadı. Bul tek ǵana tábiyattı saqlaw emes, al xalıqtıń jasaw sharayatınıń sapasın pútkilley jaqsılawǵa xızmet etedi.
Jámiyetti rawajlandırıw haqqında sóz bolǵanda, Múrájatta ayrıqsha atap ótilgen hayal-qızlardıń baxtı hám sanlı texnologiyalardı engiziw máselesi 2026-jıl baǵdarlamasınıń ózegin quraydı. Elbasshımız aytqanınday, “Hayaldı razı etsek, shańaraq razı boladı, shańaraq razı bolsa – jámiyet razı boladı”.
Máhállelerde “Hayal-qızlar dápteri” arqalı mánzilli járdem beriw menen birge, “Sanlı máhálle” joybarı sheńberinde barlıq sociallıq xızmetler onlayn túrge ótkeriledi. Bul bolsa, hár bir puqaraǵa mámleketlik xızmetlerden óz máhállesinde, artıqsha áweregershiliksiz paydalanıw imkaniyatın beredi.
Juwmaq ornında aytıw múmkin, 2026-jıl – Máhálleni rawajlandırıw hám jámiyetti ilgeriletiw jılı Múrájatta belgilengen “Insan qádiri ushın” principiniń ámeliy kórinisi boladı. Mámleketimiz basshısınıń atap ótkenindey, “Máhálle sistemasın rawajlandırıw – bul keleshegimizdi rawajlandırıw degeni”. Máhálleniń abatlıǵı, ondaǵı medicinalıq hám ekologiyalıq ortalıqtıń turaqlılıǵı Jańa Ózbekstannıń tiykarın jáne de bekkemleydi. Bul iygilikli maqset jolında birlesiw hám máhálleni haqıyqıy xalıqshıl strukturaǵa aylandırıw abadan keleshek hám joqarı rawajlanıwdıń eń isenimli kepili bolıp esaplanadı.

Alouddin Ǵafforov,
ÓzA