Elimizdegi qolaylı biznes ortalıǵı, demografiyalıq ósiw, insan kapitalına berilip atırǵan itibar Ózbekstandı investorlar ushın eń tartımlı mámleketlerden birine aylandırmaqta.

Prezidentimiz Múrájatında bunı atap ótti. Usı jıldıń ózinde sırt elli sherikler menen 140 milliard dollarlıq jańa investiciyalıq kelisimlerge erisildi. Kelesi jılı 50 milliard dollar sırt el investiciyasın tartıw mólsherlengen.
Bunnan bılay hár bir dollar investiciya, bárinen burın, aldınǵı texnologiyalar transferi, sırt elde bazarı anıq, joqarı qosımsha qunlı ónimler islep shıǵarıwǵa, energiya, suw, jer hám basqa da tábiyǵıy resurslardan paydalanıwda nátiyjelilikti arttırıwǵa, jergilikli jumısshılardı jańa texnologiyalar menen islewge oqıtıw hám miynet ónimdarlıǵın arttırıwǵa xızmet etiwi kerek ekenligi atap ótildi.
– Yaǵnıy joqarı texnologiya hám jańa kompetenciyalardı alıp kirgen, eksportqa islegen investor eń isenimli sherigimiz boladı, – dedi mámleketimiz basshısı.
Bunday strategiyalıq investorlarǵa joybar ushın jerler bazar bahasında tikkeley beriledi. Jerdiń kategoriyası ózgergende nabıt bolǵanı ushın tólemdi 10 jılǵa shekem bólip-bólip tólewge ruqsat beriledi.
Jerdi rásmiylestiriw, kategoriyasın ózgertiw, qurılıs hám infrastrukturaǵa jalǵanıwǵa ruqsatnama alıw ushın investorlar úyma-úy júrmeydi. Olarǵa “bir ayna” principi tiykarında kompleksli xızmet kórsetetuǵın elektron platforma iske qosıladı hám barlıq ministrlikler oǵan jalǵanadı.

ÓzA