“Prezident shırshası” saltanatlı ilajı úlken-kishi kewline birdey zawıq, tolqınlanıw, entigiw baǵıshlaytuǵını sózsiz. Mine, derlik on jıldan berli elimizde mámleketimiz basshısınıń ideyası tiykarında “Prezident shırshası” saltanatları ózgeshe sawlat, kóterińki keypiyat penen belgilenbekte.

Paytaxtımızdaǵı “Ózbekstan” xalıqaralıq ánjumanlar sarayında shólkemlestirilgen “Prezident shırshası” saltanatları kishkenelerge zawıq, quwanısh baǵıshladı.
Sociallıq qorǵaw milliy agentligi tárepinen shólkemlestirilgen saltanatlı ilajǵa Mehribanlıq úyleri, arnawlı mektep-internatlar, shańaraqlıq balalar úyleriniń kishkeneleri, kóp perzentli, ayrıqsha járdemge mútáj balalar mirát etildi.
Saray foyesindegi úlken shırsha átirapında balalar qosıqlar aytıp atır. Usı jerdiń ózinde kórkem dóretiwshilik penen shuǵıllanıw, súwret salıw, hár qıylı qızıqlı oyınlar oynaw ushın zárúr sharayatlar jaratılǵanı itibarǵa ılayıq.
Sońǵı jılları bilimlendiriw tarawın túp-tiykarınan reformalaw, onı jańasha mánis-mazmun menen bayıtıw baǵdarında úlken kólemdegi reformalar alıp barılıp atırǵanın atap ótiw kerek.
Mámleketimizde jas áwladtı hár tárepleme qollap-quwatlaw, olardıń kewlinde quwanısh hám úmit oyatıw mámleketlik siyasattıń tiykarǵı baǵdarlarınan biri bolıp esaplanadı. Mine, usı ǵamqorlıq hám itibardıń ayqın kórinisi sıpatında shólkemlestirilip kiyatırǵan “Prezident shırshası” bayram ilajları balalardıń eń súyikli hám asıǵıp kútken bayramlarınan biri bolıp esaplanadı.
Bul bayram ilajların mazmunlı, kóterińki ruwxta hám joqarı dárejede ótkeriw maqsetinde, Sociallıq qorǵaw milliy agentligi tárepinen tiyisli ministrlikler hám uyımlar menen birgelikte sistemalı hám nátiyjeli jumıslar ámelge asırılmaqta. Atap aytqanda, balalar ushın bayramǵa tán ortalıq jaratıw, olardı sapalı sawǵalar menen quwandırıw hám hár bir balanıń itibardan shette qalmawın támiyinlewge ayrıqsha áhmiyet qaratılmaqta.
Sonıń ishinde, Mehribanlıq hám Múriwbet úyleri tárbiyalanıwshıları, ” SOS – balalar máhálleleri,” Shańaraqlıq balalar úylerinde tárbiyalanıp atırǵan balalar, sonday-aq, ata-ana qaramaǵınan ayırılǵan balalar hám elimizdiń tınıshlıǵı jolında qaytıs bolǵan huqıq qorǵaw uyımları xızmetkerleriniń perzentleri ushın arnawlı “Prezident sawǵaları” tayarlandı.
Jámi 11 mıń 125 dana usınday sawǵalar qáliplestirilip, olardıń quramına balalardıń bilim alıwı hám bos waqtın mazmunlı ótkeriwine xızmet etetuǵın 24 atamadaǵı oqıw quralları, sonday-aq, balalar súysinip jeytuǵın 34 atamadaǵı mazalı ónimler kirgizildi.
Házirgi waqıtta Prezident sawǵaları mámleketimiz aymaqları boylap belgilengen mánzillerge jetkerilmekte. Bul baslama balalardıń kewlinde Jańa jıl quwanıshın jáne de arttırıw, olardıń erteńgi kúnge bolǵan isenimi hám arzıw-niyetlerin bekkemlewge xızmet etedi. Mámleketimiz basshısınıń jas áwladqa bolǵan turaqlı itibarı hám ǵamqorlıǵı nátiyjesinde bunday iygilikli ilajlar keleshekte de izbe-iz dawam ettiriletuǵını belgilengen.
– “Prezident shırshası” bayramında birinshi márte qatnasıp atırman, – dedi Tashkent qalasındaǵı shańaraqlıq balalar úyiniń tárbiyalanıwshısı, 9 jasar Shahrizoda Alyorbekova. – Bayram barlıq joldaslarım sıyaqlı, maǵan da júdá unadı. Biz súwretler saldıq, ayaq oyınǵa tústik, hár qıylı qızıqlı oyınlar oynadıq.
– Búgingi “Prezident shırshası” ilajın balalarımız asıǵıp kútken edi, – dedi paytaxtımızdaǵı A.Xlebushkina atındaǵı 22-Mehribanlıq úyiniń direktorı Dilfuza Jwraeva. – Olar bayramǵa ádewir burın – ele dekabr ayınıń baslanıwınan burın tayarlıq kórdi. Taqmaqlar, qosıqlar úyrendi, Jańa jıl temasında túrli súwretler saldı.
Bayram shaǵında. Gózzal shırsha átirapındaǵı shoq oyınlar, ertek qaharmanları, cirk kórkem óneri sheberleri menen ushırasıwlar kishkenelerge umıtılmas zawıq baǵıshladı. Eń tiykarǵısı, kishkeneler bul bayram mısalında Watanımız, mámleketimiz hám jámiyetimiz, xalqımızdıń mehirin jáne bir márte sezdi.
Saltanatlı ilajda balalardı bilim hám aǵartıwshılıq, jaqsılıq, miyrim-shápáát, Watansúyiwshilikke shaqırıwshı muzıkalı teatrlastırılǵan tamasha kishkeneler itibarına usınıldı. Bulardıń barlıǵı sociallıq-medicinalıq jaǵdayına qaramastan, barlıq balalar mámleketimizdiń itibarı hám ardaǵında ekeniniń ámeldegi ayqın úlgisi.

ÓzA