Múrájatta Prezidentimiz “Eń áhmiyetli jetiskenliklerimiz haqqında sóz etkende, kúsh-jigerli sportshılarımızdıń abıraylı xalıqaralıq jarıslarda erisken jeńislerin qanaatlanıwshılıq penen atap ótiw orınlı,” dep atap ótti.

Bárinen burın, Ózbekstan futbolı ushın 2025-jıl haqıyqıy tariyxıy jıl boldı. Milliy saylandı komandamız birinshi márte Jáhán chempionatına jollamanı qolǵa kirgizdi.
Sheber shaxmatshılarımız jáhán kubogında múnásip qatnastı. Ásirese, náwqıran grossmeysterimiz Javohir Sindorovtıń jáhán kuboginiń eń jas jeńimpazı bolǵanı bárshemizge úlken maqtanısh baǵıshlaydı.
Ótken háptede 9-17 jasar shaxmatshılar arasında rapid hám blic baǵdarları boyınsha jáhán chempionatında elimiz wákilleri 5 altın, 2 gúmis hám 5 qola medalın qolǵa kirgizip, ulıwma komandalıq esapta 1-orındı iyeledi.
Mártlik hám jigerlilik iyesi bolǵan sportshılarımız bıyılǵı Jaslar arasındaǵı Paraaziya oyınlarında 125 altın, 77 gúmis hám 52 bronza medalın qolǵa kirgizip, qatnasıwshı mámleketler arasında eń joqarı nátiyjeni kórsetti.

ÓzA