Búgingi kúni elektronika hám baspa platalar sanaatı dúnyadaǵı tez rawajlanıp atırǵan tarawlardıń biri bolıp esaplanadı. Ózbekstanda bul baǵdarda birge islesiwdi keńeytiw hám zamanagóy texnologiyalardı engiziw perspektivaları xalıq ushın joqarı sapalı ónimler, sanaat infrastrukturasın rawajlandırıw hám xalıqaralıq standartlarǵa sáykes keletuǵın ónimler islep shıǵarıw imkaniyatın beredi.

Sonlıqtan, Qıtaydıń elektronika tarawında jumıs alıp baratuǵın kompaniyaları menen birge islesiw perspektivaları mámleketimiz ushın strategiyalıq áhmiyetke iye.
“Ózeltexsanaat” associaciyasında Qıtay Xalıq Respublikasınıń elektronika hám elektrotexnika tarawında jumıs alıp barıwshı bir qatar kompaniyalarınıń wákilleri menen ótkerilgen ushırasıwda usınday imkaniyatlardı tallawǵa áhmiyet qaratıldı.
Onda tárepler birge islesiw perspektivaların dodaladı. Atap aytqanda, Ózbekstanda baspa elektron platalar (PCB) islep shıǵarıwdı jolǵa qoyıw perspektivaları boyınsha “Shenzhen Welldone Circuit” kompaniyası wákilleri menen óz-ara pikirlesti.
Sóylesiwler dawamında mámleketimizde baspa platalar islep shıǵarıw texnologiyaları, xalıqaralıq sapa hám qáwipsizlik standartları, injenerlik sheshimler hám sanaat infrastrukturasınıń imkaniyatları dodalandı. Sonday-aq, elektronika, sanaat avtomatikası, avtomobil elektronikası hám qayta tiklenetuǵın energetika tarmaqlarında baspa platalarǵa bolǵan talap máselelerine ayrıqsha itibar qaratıldı.
Ushırasıw juwmaqlarına bola, Ózbekstan hám Qıtay kompaniyaları bul baǵdardaǵı birge islesiw máselelerin qosımsha úyreniw, texnikalıq-ekonomikalıq táreplerdi tallaw hám aldaǵı waqıtları múmkin bolǵan birge islesiw túrleri boyınsha sóylesiwdi dawam ettiredi.

N.Ziyodullaeva, ÓzA