Qaraqalpaqstan tariyxında umıtılmas waqıyalarǵa bay túrde ótip atırǵan 2025-jılı elimiz ekonomikasınıń barlıq tarawlarında úlken ózgerisler hám jańalanıwlar júz bermekte.

Sońǵı jılları Ózbekstan Respublikası Prezidenti tárepinen Qaraqalpaqstan ushın óz aldına bir qatar párman hám qararlar qabıl etilip, mámleketimizdiń basqa aymaqlarında bolmaǵan bir qansha imkaniyatlar hám jeńillikler berildi. Bunday ilajlar isbilermenlikti rawajlandırıw hám keńeytiwge, jańa investiciyalıq joybarlardı iske túsiriwge bekkem tiykar bolıp xızmet etip atır.
Usınday iygilikli jumıslar qatarında Nókis qalasında xalqımızdıń abadan turmısın támiyinlewde áhmiyetli orın tutatuǵın ulıwma bahası 48,5 mln. dollar bolǵan, jılına 18 mıń tonna iyirilgen jip islep shıǵarıw quwatlıǵına iye hám 400 jumıs ornın jaratatuǵın «Nókis SSP Texnopark» kárxanasın aytıp ótsek boladı.
Jańa jıl aldında bul iri sanaat kárxanasınıń iske túsiriliw múnásibeti menen ashılıw saltanatı ótkerildi.
Onda Qaraqalpaqstan Respublikası Joqarǵı Keńesi Baslıǵı Amanbay Orınbaev shıǵıp sóylep, jıynalǵanlardı jańa kárxana jumıs baslaǵanı menen qızǵın qutlıqladı.
Sońınan ilaj qatnasıwshıları kárxananıń islep shıǵarıw imkaniyatı hám jumısshılar ushın jaratılǵan sharayatlar menen jaqınnan tanıstı.
Álbette, iske túsip atırǵan bul kárxana xalqımız iygiligi jolında elimiz ekonomikasın hám sanaatın rawajlandırıwǵa uzaq jıllar dawamında xızmet etetuǵınlıǵına bekkem isenemiz.

Qaraqalpaqstan xabar agentligi